2 Samuwel 2 - Ɗû na sɗik na wiini Alaw

David a bunda aŋ pai na Yuda, a sumna aha war Hebron

¹ Asakal hanɗa par, David a zilba EPIƊ-ƊAI a miɗini: Mu hala war fuŋ n'abai ktai na Yuda ɗe? EPIƊ-ƊAI a miɗini: Hala! David a zilba pra: Mu hala war fuŋ n'abai na wata ɗa? EPIƊ-ƊAI a wiyini seŋ: A Hebron.

² David a hala woni gaiɗi falakaini na sulu ɗa Ahinowam na Izrayel par gaiɗi Abigayil na munini Nabal na Karmel par.

³ David a hala gaiɗi ɗai na pini ɗa, ɗif paŋ gaini pakataini pakataini, e simni war fuŋ na ɵimaɗi Hebron ɗa.

⁴ Ɗai na Yuda par e hilisi a Hebron, woni e mini emel midini David kapai e ziŋ aŋ pai na Yuda. Ɗai e hilisi e miɗini wiini David ɓa: E pi Sawul ɗa e ɗi ɗai na war Yabes na Galaad par.

⁵ David a ɵina ɗai siɗi ɗai na war Yabes na Galaad a miɗiɗi: EPIƊ-ƊAI a ɓikiki, tiki na ki zi sda na gaini futini sini epin-gezamu Sawul, haa ki piŋ tiɓ ɗa.

⁶ Tiyana ɗa EPIƊ-ƊAI a za pɗem siki, a siki yum lai, ta ɗe aga mu za siki nɵa lai, pini na tiki ki ziŋ ɗa.

⁷ Tiyana ɗa yimiti agulki, ɗiyi gdaŋ, Sawul n'epin-gezamu a mra su, amma ta ɗai na Yuda e tikiŋa aŋ pai midiɗi ta.

Ɗai e tiki Isboset n'ahini Sawul aŋ pai na Izrayel, David a hina midiɗi Yuda lai

⁸ Abner n'ahini Ner abaiɗi askarai na wiini Sawul a yima Isboset n'ahini Sawul ɗa a kaŋ a Mahanayim.

⁹ A tikaŋ aŋ pai midini afti na Galaad, na wiini Aser, na Yizreyel, na wiini Efrayim gaini na wiini Benyamin ɗa lai, a dara a muɗa midini afti na wiini pinziba na doogo na wiiɗi Izrayel.

¹⁰ Isboset n'ahini Sawul a suma pai midiɗi Izrayel sek ɗa buzani doogo doogo puɗu, a buza warɗi pai buza sulu. Amma pinzibani Yuda e hini pini David ɵa.

¹¹ Buza na David a zaŋ warɗi pai na Yuda a Hebron ɗa a na buza muguzak gaini tile ɵaara.

Hatam na war Gabawon

¹² Abner n'ahini Ner gaiɗi ɗai na wiini Isboset n'ahini Sawul ɗa e fikisi a Mahanayim par a Gabawon sek.

¹³ Yowab n'ahiɗi Seruya gaiɗi ɗai na wiini David e niyisi edi lai. Vok na sulu hanɗa e nivi gaiɗi marɗi ɵimaɗi avai na Gabawon, e pi ɵimaɗi avai na par lai na par lai.

¹⁴ Abner a miɗini wiini Yowab: Mu firiya ɓa gawlakai e fiki amai e titimi marɗi wuzani armu haw. Yowab a wiyini seŋ: Yo! seŋ aŋ kai.

¹⁵ E fiki amai miɗi marɗi, pɵaɗi ɗai doogo pi sulu war pinzibani Benyamin gaini Isboset n'ahini Sawul ɗa par, ɗai doogo pi sulu piɗi ɗai na wiini David par lai.

¹⁶ Askar paŋ ɗa a ɵaka midini maini na mini pini kaɵawni ɵaɓ, a bulaŋ paɵani gaini kaɵkarni haa e yiki azumai ktai e mri miɗi marɗi ca. E sini yiki wiini hlai hanɗa ɓa: “Vowai zi huwuŋ”. Hlai hanɗa aŋ war Gabawon.

¹⁷ Yuvai ni ɗa, hatam ɗa a za gdaŋ gara, ɗai na wiini David ɗa e rɗi amai midini Abner gaiɗi ɗai na Izrayel.

¹⁸ Aliɗi Seruya na hu e ɗi fu woni: Yowab, Abisag gaini Asayel. Asayel ɗa ezini kolek maiɗi wudrai na buza ɵa.

¹⁹ Asayel a faka aŋ luwi pini Abner, a zaga edi miɗini ezini par kai sam.

²⁰ Abner a bundasi arni duɓani a zilbaŋ: Ku tuku Asayel ɗa tiɓ ɗi? Asayel a wiyini seŋ: Nkam, mu ta tiɓ.

²¹ Abner a miɗini: Tika futi pini ɗif zamai, ku yimaŋ, ku mula wazagai zi hatam na wiini n'aŋ tini lai. Amma Asayel a ɗiya kai, sai a paya ɗa a ni bas.

²² Abner a miɗini wiini Asayel pra: Ɗiya ta, ku tikasi futi pa kai, ku kaŋa aŋ fuɗuku edi buri maɗa, kapai dawai sek ɗa mu nava li gaini Yowab na tawalku ɗa, siyer ni ɗa mu zaŋ ɗa maɵa maɵa ɗa?

²³ Amma Asayel a firiya a hinaŋ kai ɗai. Nɵa Abner a ɓulaŋsi warni gaiɗi kawaini, haa miɗi kawai anene duɓani tiɓ. Asayel a kɵaɗi amai par gaini mrini kal kal. Ɗif paŋ n'a cosi li war hlai na Asayel a mra woni ɗa a ɗiya paŋ.

²⁴ Yowab gaini Abisag e tiki futi pini Abner. E cû a Gibeyat-Amma koskoi na futi te nawa sek. Gibeyat-Amma ɗa te na tiɗi Giya piɗi futi na dawai par sek, warɗi futi na te hala edi war basga na kaɗataŋ na Gabawon sek ɗa.

²⁵ Ɗai na war pinzibani Benyamin e tipisi sini Abner, e zi aŋ vok na abai, e ɗiyisi amai par miɗini boŋor,

²⁶ Abner a ɗuula Yowab a miɗini: Kapai sumu ɵa yaw aŋ fuɗumu marmu edi mini gaw ɵa ɗi? Ku sɗa ɓa asakal hanɗa par aga mu hinumu war tuwi nɵa kai ɗi. Aga ku miɗiɗi wiiɗi ɗaiku ɓa, e tiki futi piɗi tawalakaiɗi kir kai ɗa kaswata ɗa?

²⁷ Yowab a miɗini: Gaini Alaw na karni jaŋ, na ɓa ku muɗa miɗi kai ɗa, ɗai ɗa aga e hiniti futi na piɗi tawalakaiɗi ɗa kai, haa dawai gorof par.

²⁸ Yowab a yiba fana, ɗai paŋ e ɗiyi, e tiki futi piɗi ɗai na Izrayel kir kai, e hitimi kir kaalai.

²⁹ Duvuk ni ɗa Abner gaiɗi ɗaini e fini aŋ hili yaw war huduk na Yurdan, e bindi anene kata tini ra Yurdan ɗa pla, e vigi Bitron ɗa lai, e cû a Mahanayim.

³⁰ Won hlai na Yowab a ɗiya hili na pini Abner ɗa zaw ɗa, a tipiɗi askarai na pini ɗa tap. Arbaɗi par ɗa Asayel gaiɗi ɗai na wiini David doogo pi ɵeeŋe lai e ɗi kai.

³¹ Ɗai na wiini David ɗa, nagai e fiɗi piɗi ɗai na war pinzibani Benyamin gaiɗi ɗai na wiini Abner ɗa ɗai miya hu gaini doogo doogo ɵaara.

³² E tikisi kopoŋni Asayel ɗa, e piŋ war waŋ na wiini epini a Betlehem. Yowab gaiɗi ɗaini e fini aŋ hili yaw, gorof par hlai na futi te diyasi ta ɗa, e cû a Hebron.