2 Samuwel 12 - Ɗû na sɗik na wiini Alaw

Natan a miɗini wiini David midini meefeŋni n'a zaŋ

¹ EPIƊ-ƊAI a ɵina Natan sini David, a hala sini a miɗini: war fuŋ n'abai ktai ɗai e ɗi ka sulu, na ktai azi farai, na ktai a na murga lai.

² Na zi farai ɗa adumaini viya, ɵaakaini viya lai.

³ Na murga ɗa walani zamai aŋ kai, te na ɗa t'ahiɗi adumi ktai, agwi nɵa, a wiritisi gaini wûri. A siɗi simi miɗi, te wula arbaɗi alini blaŋ, te suma ɗa a simi na ni a sumaŋ ɗa, te ca ɗa a fiyaw na ni a caŋ ɗa lai. Te fana ɗa ɵimani, te bunda maiɗi ahini nɵa.

⁴ Mefeŋ ktai, morkoi a cosi ahani ɗif zi farai ɗa, amma ni a firiya a yima pini adumaini na gaini ɵaakaini ɗa aŋ zini morkoi wiini ɗif n'a halasi ahani kai. A yimitisi ahiɗi adumi na wiini ɗif na murga ɗa kaai, a fiɗitini wiini morkoini su.

⁵ David a za hiy gara sini ɗif n'a za hanɗa, a miɗini wiini Natan maini nɵa: Gaini EPIƊ-ƊAI na karni zaŋ, ɗif n'a za hanɗa a juva burini ɗa a fiɗi n'edi.

⁶ Ahiɗi adumi ɗa, a vurga adumai puɗu aziɗi, buri a za hanɗa gaini hiinini haw warni kai.

⁷ Natan a miɗini wiini David: Ɗif ni ɗa ku tuku dama, EPIƊ-ƊAI Alaw na wiiɗi Izrayel a na muɗa maini nɵa: Mu tukuku aŋ pai midiɗi Izrayel ɗa mu ta, mu kurɗukusi tini Sawul par mu ta lai.

⁸ Mu hunuku aŋ ŋa miɗini dalam na wiini Sawul n'epin-gezaku ɗa mu ta, mu siɗi falakaini war tuku mu ta lai. Mu tukuku miɗini pinziba na Izrayel gaini na Yuda ɗa mu ta pra. Na ɓa a na arku agwi ɗa mu kiɗa mu suku zamai sini pra.

⁹ Ku kasi miisi sini gadaiŋa, ku za wala na meefeŋ wuzani ara nɵa buri maɗa? Ku fuɗa Uriya na Hittite par ɗa edi su, ku yimiti munini ɗa kaai, ku ziti aŋ muniku ta, niɗe ku saŋ edi mini kaɵkar na wiiɗi Ammonitekai ta lai.

¹⁰ Tiyana par ɗa pinzibaku aga a ɓurwa gaini mri na mini kawai kai, buri ɓa ku kasi miisi sa, buri ɓa ku tikiti munini Uriya na Hittite par ɗaw ku ziti aŋ muniku ta lai.

¹¹ EPIƊ-ƊAI a na muɗa maini nɵa: Tala aga mu hinasi gir muduku, gir hanɗa aga te zuŋku te pakataiku dama. Aga mu miliɗi falakaiku karku par mu siɗi wiini zigelku ktai, ɗai paŋ aga e siɗi edi gaglai ɓa a na fana gaiɗi.

¹² Buri ɓa, wala na ku zaŋ war ŋoyai ɗa, ta aga mu sinkaŋ war gaglai wuzaɗi Izrayel paŋ.

¹³ Nɵa David a wiyini seŋ wiini Natan: mu za tuwur sini EPIƊ-ƊAI. Natan a miɗini wiini David: Na ɓa nɵa, EPIƊ-ƊAI lai a haza tuwurku edi ya, aga ku mra kir kai.

¹⁴ Amma seŋ na ku zaŋ hanɗa, a kasi tirki n'abai sini EPIƊ-ƊAI, ku siɗi na ɗa a futi wiiɗi gawni ɓa kapai e tirkiŋ gaini, nɵa ahi na ku waŋ ɗa sai a mra edi.

¹⁵ Natan a waya ahani. EPIƊ-ƊAI a hinasi veglek a yima ahiyagwi na munini Uriya te wiŋni wiini David ɗa.

¹⁶ David a siiwa Alaw burini arwagwi hanɗa, a tika sai burini lai. A halasi li aha ɗa, a fana ɗa azumai arni alogodo.

¹⁷ N'abakai n'arbaɗi ɗai n'ahani e siiwiŋ buri a sumna amai dam, amma a ɗiya kai, a suma wala kaalai.

¹⁸ War mefeŋ n'ag'aŋ muguzak ɗa, arwagwi a mra su. Ɗai na ahani ɗa e hûni labar n'aga e siŋni wiini David ɗa. E hiini ɓa, won hlai na arwagwi a na ka karni hai ɗa, mu muɗunumu ɗa a ɵina kai, tiyana ɗa kapai mu muɗunumu ɓa arwagwi a mra su ɗa, maɵa maɵa ɗa? Aga a fuɗa sini su ɗa kaai.

¹⁹ David a tiliɗi ɗai na ahani e ɗa ŋûriyi arbaɗi marɗi, a sɗa ɓa arwagwi ɗa a mra su. David a zilbiɗi: Arwagwi a mra su ɗi? E wiyini seŋ e miɗi: A mra su.

²⁰ Nɵa David a fakasi amai, a ma sini, a za emel sini, a bunda sapa na sini lai. Asakal par a hala amlai war tempel na wiini EPIƊ-ƊAI a hurga azumai wuzani. Won hlai n'a wayasi aha a zilba simi a suma lai.

²¹ Ɗai n'ahani e miɗini: Ku za ɵa ɗa a maɗa? Won hlai na arwagwi a na ka karni hai ɗa, ku tika sai buri ni, ku tuwa buri ni lai, tiyana n'a mra su ɗa, ku fakasi amai fak ku suma ɗa!

²² A wiyiɗi seŋ: Hlai na arwagwi a na ka karni hai ɗa, mu tika sai, mu tuwa lai, mu hiina ɓa ablaŋtaŋkai ɗa EPIƊ-ƊAI aga a hiina haw buriya, arwagwi ɗa aga a mra kai ɗi.

²³ Amma tiyana ɗa, a mra su koo. Mu tika sai zamai ɗa a na mini maɗa? Mu kiɗa mu wayaŋsi karni pra ɗi? Mu hala ka pini sek na ɗa mu ta ɵa, amma ni a kiɗa a wayasi sa sek kir kai koo.

Wi na wiini Salmun

²⁴ David a siɗi arai zi pi wiiɗi Batseba na munini, a fana gaiɗi, te wa ahi zamai, David a sini yiki ɓa: Salmun. EPIƊ-ƊAI a daraŋ gara lai.

²⁵ A ɵina ɗif na mini Alaw Natan sini David aŋ sini labar ni ɗa, Natan a sini yiki ɓa Yedidiya a dara a muɗa: Zi diri gara na wiini EPIƊ-ƊAI, buri diri n'EPIƊ-ƊAI a daraŋ ɗa.

David a tika fuŋ n'abai na Rabba

²⁶ Yowab a hitimiti Rabba na wiiɗi Ammonitekai, a tika hlai na pai a sumna warni aŋ fuŋ ɗa ɗaw.

²⁷ Nɵa Yowab a ɵina ɗai sini David a miɗini: Mu hitimiti Rabba, mu tika hlai zi yem ɗa ɗaw lai.

²⁸ Tiyana ɗa, tipiɗisi ɗai na Izrayel n'e hini ɗa, halasi ku caka fuŋ n'abai hanɗa cak, ku tikaŋ. Na ɓa mu tikaŋ li mu ta ɗa, aga e sini yikiŋa wiini fuŋ n'abai hanɗa.

²⁹ David a tipiɗi ɗai ɗa, a hala a Rabba a hitimiti, a tikiti lai.

³⁰ A tikiti bogorai na wiini paiɗi Ammonitekai edi midini par ɗaw. Gumaɗi ɗa a za kilo doogo doogo hu na wiini or, ali fuŋ na pɗamai siɗi duɓak duɓak, e pitini midini David. David a mulasi der na pini hatam woni par viya.

³¹ Amma ɗai na kadai na warni par ɗa, a tikiɗi sda zi dewele midiɗi ta ta. Zamai e zi sda gaini si, na zamai e kirhi ɗa a ali fuŋ, na zamai e bili ɗa a luwuŋ, na zamai e wi ɗa a brik lai. Fuŋ n'abakai na wiiɗi Ammonitekai a zaŋ ɗa maini hanɗa ɵa. Asakal par David gaiɗi ɗaini e wiyisi aha war Yeruzalem.