2 Samuwel 10 - Ɗû na sɗik na wiini Alaw

Ammonitekai e tikiɗi siyer wiiɗi ɗai n'abakai na wiini David

¹ Mefeŋ agwi asakal hanɗa par, pai na wiiɗi Ammonitekai a mra, Hanun n'ahini a suma pai war balamni.

² David a hiina a muɗa: Aga mu za pɗem sini Hanun n'ahini Nahas maini n'epini a zaŋ sa ta ɗa nɵa. Nɵa a ɵiniɗi ɗaini aŋ ɵiɓini wuti burini mri na wiini epini. Ɗai na wiini David e hili e cû midini afti na wiiɗi Ammonitekai.

³ Amma abakai na wiiɗi Ammonitekai e miɗini wiini Hanun n'epin-gezaɗi: Ku hiina ɓa David a ɵiniɗisi ɗai suku aŋ suku arai zi pi na ɗa buri hormo na wiini apuku ki ɗi ɗi? David a ɵiniɗisi ɗai na ɗa aŋ tili fuŋ n'abai ɗa, aŋ tili ezini hlai ɗa, kapai asakal par e tûûriŋ edi lai kai ɗi?

⁴ Hanun a yimiɗi ɗai na wiini David ɗa, a faɗa galni muɗgi na miɗi ɗa edi, a ɗukla sapa na siɗi ɗa haa amai sini flesɗi ta ta, asakal par a birgiɗi.

⁵ Ɗai e kinisi labar wiini David, David a ɵina ɗif miɗi buri e ɗi fu war siyer. Nɵa pai a siɗi miɗi maini nɵa: Simnisi a Yeriko ca, haa muɗgi na miki a diya haw, kapai asakal par ki wiyisi aha.

David a hitima gaiɗi Ammonitekai gaiɗi ɗai na Siriya lai

⁶ Ammonitekai e siɗi ɓa e bindi siɗi li haharai arni David pini sdaɗi n'e ziŋ ɗa. Nɵa e piyisi ɗai aŋ zini piɗi arbaɗi ɗai na Siriya na Bet-Rehob gaiɗi ɗai na Siriya na Soba par lai. E zi paŋ askarai dubu caaɓa. E piyisi askarai dubu ɗaw pini pai na Maaka par, piɗi ɗai na Tob par askarai dubu doogo pi sulu lai.

⁷ David a ɵina hanɗa, a ɵina Yowab gaiɗi askarai n'agulɗi a huna kai ɗa.

⁸ Ammonitekai e niyisi edi, e giri siɗi mini hatam mini magala na wiiɗi kapitalɗi gar. Ɗai na Siriya na Soba par gaiɗi na Rehob par, ɗai na Tob par gaiɗi na Maaka par lai e ɗisi fu edi par war basga kiiɗi lai.

⁹ Yowab a tala ɓa hatam aŋsi wuzani par lai, duɓani par lai, a viriɗi askarai n'e siɗi hatam gara arbaɗi askarai na war Izrayel ɗa paŋ, a giriɗi miɗi ɗai na Siriya gar.

¹⁰ Piɗi askarai n'a hina, a tika Abisag na tawalni midiɗi ta, a giriɗi miɗi Ammonitekai gar lai.

¹¹ Asakal par Yowab a miɗini wiini tawalni ɓa: Na ɓa ɗai na Siriya e sûwiŋa li gaini gdaŋ ɗa, ku lawaŋa ɗuwal, na ɓa Ammonitekai e suwuku tuku li gaini gdaŋ ɗe aga mu luwuku ɗuwal lai.

¹² Ɗiya gdaŋ, hutumumu gaini gdaŋmu buriɗi ɗaimu gaini fuŋ n'abakai na wiini Alaw na wiimu lai. EPIƊ-ƊAI a za maini n'a dara nɵa.

¹³ Nɵa Yowab gaini vok na wiini e hili aŋ hitimi gaiɗi ɗai na Siriya, amma ɗai na Siriya e pri edi wuzaɗi.

¹⁴ Won hlai na Ammonitekai e tili ɓa ɗai na Siriya e ɗa rûvi, nagai lai e pri edi wuzani Abisag, e wiyi aha war fuŋ n'abai ɗa. Yowab a wayasi edi mini hatam na gaiɗi Ammonitekai par a wayasi aha war Yeruzalem.

¹⁵ Won hlai na ɗai na Siriya e tili ɓa ɗai na Izrayel e rɗi amai midiɗi li, e tipiɗi askarai na wiiɗi paŋ war hlai ktai.

¹⁶ Hadadezer a ɵina ɗai aŋ siɗi miɗi wiiɗi askarai na Siriya n'e ɗa midini afti n'anene duɓani ra Öfrata par ɗa, nagai e hilisi haa a Helam ta, abai na midiɗi ɗa a Sobak abaiɗi askarai na wiini Hadadezer.

¹⁷ Ɗai e kinisi labar hanɗa wiini David. David a tipiɗi askarai na Izrayel ɗa paŋ, e hûwi ra Yurdan ɗa amai, e cû a Helam. Ɗai na Siriya e girisi mini David aŋ hatam, e fikisi hatam gaini lai.

¹⁸ Ɗai na Siriya e pri edi wuzaɗi ɗai na Izrayel, David gaiɗi ɗaini e fiɗi plasai n'a gidiya Saret zi gaw miya muguzak, askarai n'e diɓiri plasai dubu doogo doogo puɗu lai. E zini wuruk wiini Sobak abai na wiiɗi askarai na Siriya ɗa, a mra war hlai ni dama.

¹⁹ Won hlai na paakai n'e ɗa pini Hadadezer ɗa paŋ e tili ɓa ɗai na Izrayel e rɗi amai midiɗi li, e piyi futi aŋ simni ɵeɗ gaiɗi Izrayel, e bindi aŋ ɗai n'azumai piɗi, e wiyi wulaɗi azumai piɗi lai. Ɗai na Siriya e hûni gamai, e wiyisi aŋ zini piɗi Ammonitekai kir kai.