2 Peter 3 - Ɗû na sɗik na wiini Alaw

Koo ɓa mefeŋ na wiini Epiɗ-ɗai a cosi gobi kai ɗi aga a cosi

¹ Tiki zi diri gara, hanɗa te letre na te g'aŋ sulu na mu ɗûti siki. War letre na sulu hanɗa paŋ, mu dara mu ɵiki midiki kapai ki sɗi aŋ hiini hiini na pɗem;

² kapai midiki a kɵa gaini seŋ na ɗai na min Alaw na sɗik e miɗiŋsi a ɗipar, gaini seŋ zi gadai n'apostelai na wiiki e hitriŋki, gadai na wiini Epiɗ-ɗai Yesu Kristu.

³ Avut paŋ aga ki sɗi ɓa war mefeŋ n'asakal ɗa, ɗai zi anya aga e hilisi, gaini seŋ zi miisi war miɗi, aga e piyi pin diriɗi na meefeŋ,

⁴ Aga e miɗi: Gizini Epiɗ-ɗai n'a muɗa gaini ɗa aŋ wata ki ɗi? Haa sin mefeŋ na tamaimu e mri par, haa girna, wala ktai maa a bunda kai, wazagai paŋ a na maini n'a war piɗi yai zi tiki par.

⁵ Buri ɓa, e wili midiɗi gaini ɗa aŋ bulaŋ, a sɗa ɓa a ɗipar, hlai n'amai a na fu, afti a niyasi edi arni yem par lai, a za gaini yem gaini seŋ na wiini Alaw.

⁶ Gaini seŋ ni dama, yai na te na ka warni mefeŋ hanɗa, te ba arni yem.

⁷ Pin seŋ hanɗa dama, hlai n'amai gaiɗi yai na tiyana aŋ war gɗam, buri a ya edi gaini afu, a na biyiti sariya, gaini bi n'edi na wiiɗi ɗai n'e yimi war Alaw kai.

⁸ Amma tiki zi diri gara, wala ktai a na, na tiki aga ki wili midiki gaini kai, hanɗa ɓa: Burini Epiɗ-ɗai ɗa, mefeŋ ktai a na maini buza dubu ɗaw nɵa, buza dubu ɗaw a na maini mefeŋ ktai nɵa lai.

⁹ ɵinini ha n'EPIƊ-ƊAI a zaŋ ɗa, aga a va amai, aga a za kai maini na zamai e hiiniŋ na ɗa ɵa kai, a za witaw kai na ɗa buriki tiki, a firiya ɓa ɗif ktai maa a ba kai, paŋ e bindi bindi na gamai.

¹⁰ Amma mefeŋ na wiini Epiɗ-ɗai aga a gizi, maini ɗif zi mihill nɵa, war mefeŋ ni ɗa, hlai n'amai ɗa aga a vuga, gaini suura n'abai gara, wazagai n'arbani hlai n'amai ɗa, afu aga a yaŋ, a hiliya edi lai, yai gaini wazagai na warɗi paŋ, sariya aga te ɗukla midini.

¹¹ Na ɓa wazagai paŋ aga a hiliya edi maini hanɗa ɵa ɗa, tiki lai ki tiki hangalki sini payaiki ɗa, aga ki piyi payai na sɗik, ki yimi pini Alaw lai.

¹² Aga ki biyi gizini mefeŋ na wiini Alaw. Kapai mefeŋ hanɗa a halasi witaw lai ɗa, aga ki piyi mai hanɗa nɵa. Buri ɓa war mefeŋ ni ɗa, hlai n'amai n'a na ya ɗa aga a hiliya, wazagai zi rgi n'a na ɗa, aga a hiliya lai.

¹³ Amma pin miɗi na wiini Alaw ɗa, tumu mu biyumu na ɗa a hlai n'amai na hehe, gaiɗi yai na hahai, na jre ɗikat aga a za warɗi.

Ki zi hangal

¹⁴ Nɵa lai tiki zi diri gara, war bayai hanɗa, aga ki fiɗi was aŋ simni gaini didiɓi kai, gaini bli ɓlok kai war ɵeɗ,

¹⁵ Ki yimi ɓa zi n'EPIƊ-ƊAI a za gaini hangal na ɗa, a na burini kûri na wiiki, maini na Pawlus tawalmu zi diri gara a ɗoŋ ka siki pin yel n'a sa sini nɵa.

¹⁶ Hanɗa a wala n'a zaŋ war letrekaini paŋ, won hlai n'a na muɗa miɗini seŋ hanɗa, seŋ zamai n'a ɵina gir woni a na, ɗai n'e sɗi wala kai, na gaini ɗiyi pɗem war yimi kai ɗa, e viɗiŋ edi maini n'e ziŋ gaini ɗû zamai zamai ɗa ɵa lai, e zi hanɗa sini bi n'edi na wiiɗi dama.

¹⁷ Tiki zi diri gara, hlai na ki cû woni ta na ɗa, aga ki zi hangal, ɵa kai ɗa, wili n'edi na wiiɗi ɗai n'e yimi pini Alaw kai ɗa, aga tiniki edi, haa ki kɵi azumai war ɗiyiki na gdaŋ par.

¹⁸ Ki wili ɗa amai sek war yum, gaini sɗini Epiɗ-ɗai Yesu Kristu, Ɗif-zi-kûri na wiimu. Kol ɗa a wiini tiyana par haa hlai n'a vada kai, n'a vada kai. Amen.