Biblia Todo Logo
Bìoball air-loidhne

- Sanasan -

2 Peter 2 - Ɗû na sɗik na wiini Alaw


Ɗai n'e hitri hitri na jrekai kai

1 Gaini hanɗa paŋ ɗa, ɗai na min Alaw na jrekai kai e ɗi ka arbaɗi ɗai na Izrayel, nɵa lai, ɗai zi hitri na jrekai kai aga e fiki amai, aga e kisi hitri zi bi ɗai arbaki gaini yel viya. Aga e zi haa e pi miɗi ɓa nagai e sɗi Epin-gezaɗi n'a wuriɗisi edi kai, aga e kisi bi n'edi tizaw midiɗi.

2 Ɗai viya aga e tipi piɗi war payaiɗi na meefeŋ, pra, buriɗi nagai, ɗai aga e miisiti futi na wiini jre-ɗikat ɗa,

3 Pin suuna n'a rga warɗi ɗa, nagai aga e ziki midiki gaini seŋ na jre kai, n'e ziziriŋsi. Buriɗi nagai ɗa sariya te tika piɗi haa gamai par, bi n'edi na wiiɗi ɗa a na za lai.

4 Na ɓa Alaw a hiniɗi ɗai zi ɵeŋ na war fuŋ n'Alaw n'e zi tuwur ɗa kai, amma a sɗi edi war hlai zi gir, na a rgiɗi gaini jaɓ na wiini gegeŋ, e ɗa war gɗam buri e biyiti sariya,

5 na ɓa a hiniti yai na wuli ɗa kai, amma a giɗima Nowa, ɗif n'a muɗa edi miɗini jre-ɗikat, ni n'ag'aŋ mitwis arbaɗi n'e kûrɗi, won hlai n'a kasi yem n'abai midiɗi yai na wiiɗi ɗai n'e yimi pini Alaw kai ɗa,

6 Na ɓa a tuura fuŋ n'abakai na Sodoma gaini na Gomora edi, aŋ bundaŋ edi aŋ eveŋ lai, aŋ siŋkiɗi wiiɗi nagai n'e yimi pini Alaw kai ɗa miɗini wala n'a na biyiɗi,

7 amma na ɓa a kurɗasi Lot edi, ni n'a ɗif na jre-ɗikat, n'a sɗa gir gara pin payai na meefeŋ na wiiɗi ɗai na maafanai hanɗa,

8 buri ɓa ɗif na jre-ɗikat hanɗa, n'a sumna arbaɗi mefeŋ mefeŋ paŋ, suŋfaɗi-agulni a nava simni na ɵeɗ kai, burini meefeŋ n'a talaŋ, n'a ɵinaŋ ɗa lai.

9 Hanɗa a siŋka ɓa: Epiɗ-ɗai a sɗa aŋ piliɗi nagai n'e yimi ɗa edi min titimi par ya, amma na jre-ɗikat kai ɗa, a giŋmiɗi buri aga a ziɗi gir war mefeŋ zi sariya.

10 A suwa paŋ, nagai na hihir a kɵa pin wulaɗi, e rûvi pin dirini neŋ-si, e miisiti abai na wiini Epiɗ-ɗai. E kûli midiɗi amai, hormo warɗi kai, e tirki spak n'abakai lai.

11 Paŋktai, ɗai zi ɵeŋ na war fuŋ n'Alaw n'e suwi gaini gdaŋ gaini spak lai maa, e tiki ka sdani spak hanɗa wuzani arni Epiɗ-ɗai kai zaŋ.

12 Amma nagai ɗa, maini wazagai n'ezini puɗu puɗu na yel miɗini kai ɗa nɵa. E tirki wala n'e sɗiŋ kai, aga e hûfi edi maini wazagai n'ezini puɗu puɗu nɵa lai.

13 E nivi meefeŋ aŋ vrak pin meefeŋ n'e ziŋ ɗa, e firiyi e vi dirɗi na meefeŋ ɗa amai girvudi kaŋ, won hlai n'e ɗa zi fet gaiki ɗa, e firiyi burini rhai n'e rhiki ɗa, simniɗi n'arbaki ɗa a wala zi siyer, zi bizi mini ɗif lai.

14 Zini maɵara edi pini arɗi do do, e vi gaini tuwur ɗa kai, e tiniɗi ɗai n'e ɗiyi gdaŋ war yimi kai ɗa, agulɗi gaini tiki miɗini suunani farai, e ɗi ali zi tuusa.

15 Asakal n'e hiniti futi na ɗikat edi ta ɗa, nagai e sili edi, e tikiti futi na wiini Balaam n'ahini Bosor na firiya vrak na wiini sɗa na meefeŋ ɗa.

16 Amma a nava gat, buri ɓa a ha amai midini gadai. Ablehoi na ɓurtum te miɗini seŋ war wule na wiini ɗif, te ɗiya dûûli na wiini ɗif na min-Alaw lai.

17 Nagai e ɗi kalaŋai na yem warni kai, e ɗi ɗugul zi faŋ na barawai a hogoŋ, gegeŋ na tikiɗim a zizina buriɗi.

18 Gaini seŋ zi miɗi na gomoŋai kadai, n'e zili sɗi amai gaini ɗa, e tiniɗi nagai n'e prisi edi piɗi nagai n'e wili edi par, gaini diri na hihir na wiini neŋ-si lai.

19 E midiɗi ɓa aga e pliɗi edi, paŋ ktai nagai gaini midiɗi dama e ɗi bagakai na wiini luɗi-n'edi, -buri ɓa ɗif paŋ ɗa a begeni wala n'a na ŋa midin ɗa.

20 Buri nɵa, na ɓa gaini sɗi na wiini Epiɗ-ɗai, Ɗif-zi-kûri na wiimu Yesu Kristu, e prisi edi war hihir na wiiɗi yai ɗa par, na ɓa e wiyi ka pra war hihir hanɗa, e hiniŋ a ŋa midiɗi lai ɗa, aga a bindiɗi maafanai a suwa n'avut ɗa pra.

21 Buri ɓa na ɓa e sɗiti fu futi na wiini jre-ɗikat kai ɗa, marya, miɗini n'e sɗiti ba, e hinisi seŋ zi gadai na sɗik n'a sa sɗi ɗa edi ta.

22 Wala n'a za siɗi na ɗa, a na seŋ joro a muɗa gaini ɓa: “Hirge ɗa a waya midini hûŋvini”, hohoi na gaini mi edi te waya aŋ bubula siɗi arni ŋoroɓok na hihir.

La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964

Bible Society of Cameroon
Lean sinn:



Sanasan