2 Peter 1 - Ɗû na sɗik na wiini Alaw

Ɵiɓini wuti

¹ Simun Peter, ɗif zi sɗa lai, apostel na wiini Yesu Kristu lai, sɗi nagai n'e nivi yimi na wûrini abai maini na wiyi nɵa, pin jre-ɗikat na wiini Alaw na wiimu gaini Ɗif-zi-kûri Yesu Kristu.

² Yum gaini ɵeɗ a sa siki abai pin sɗi na ki sɗi Alaw gaini Yesu Epiɗ-ɗai na wiimu.

Fiɗi was aŋ siŋki yiki n'Alaw a yikikisi gaini ɗa edi

³ Alaw war spakni a sumu wazagai paŋ n'a kiɗa aŋ zina pini payaimu, war yimimu na pini, a siŋkumu aŋ sɗa ni n'a yikumusi gaiɗi abai na wiini, gaini gdaŋ na wiini lai.

⁴ Gaiɗi abai, gaini spak, Alaw a za ɵinini-ha n'abakai gara, na pɗamai gara lai sumu, nɵa won hlai na ki nivi ɵinini ha hanɗa li ɗa, ki kiɗi ki niyisi edi warɗi yai na gaini hûfi tini suuna na maafanai par, ki kiɗi ki tipi ktai gaini Alaw lai.

⁵ Buri hanɗa, ki fiɗi was, kapai ki tiki payai na pɗem sini yimi na wiiki, sini payai na pɗem ɗa ki tiki sɗi na jre,

⁶ sin sɗi na jre ɗa, ki tiki ɗilini-si, sin ɗilini-si ɗa ki tiki siiki, sin siiki ɗa, ki tiki yimi na pin Alaw,

⁷ sin yimi na pin Alaw ɗa, ki tiki diri zi tawal, sini diri zi tawal ɗa, ki tiki diri na sɗi ɗai paŋ lai.

⁸ Buri ɓa na ɓa wazagai hanɗa aŋ siki, na ɓa a za li viya lai ɗa, aga a hiniki kadai yaw kai, muɗaŋ kaalai, burini sɗi na mu suɗumu Epiɗ-ɗaimu Yesu Kristu ɗa.

⁹ Amma ni na wazagai hanɗa aŋ sini kai ɗa, ni a ɗif na melveŋ, arni aŋ gai dûgû duk, buri miɗini a wula gaini tuwurni na ɗipar n'a haza edi ɗa lai.

¹⁰ Nɵa, tawalakai, aga ki fiɗi was a suwa pra, buri ki siŋki yiki na ki yikisi gaini edi, gaini viri na ki virisi gaini lai. Na ɓa ki zi maini hanɗa nɵa ɗa, aga ki ɵiɓi tukum kai zaŋ.

¹¹ Aga ki niyi aha, warɗi pai na te vada kai, na wiini Epiɗ-ɗai, Ɗif zi kûri na wiimu Yesu Kristu, gaini seŋ kai.

¹² Pin hanɗa, aga mu ɵiki midiki gaini wazagai hanɗa kûreɗ-kûreɗ, tiki ki sɗi hanɗa ya ɵa lai, ki ɗiyi gdaŋ ya war jre na ki niviŋ ya lai tekeɗeɗi.

¹³ A tala ara pɗem gai futini lai, na ɓa m'aŋ war si hanɗa hai ɗa, aga mu ɵiki midiki gaini hanɗa kapai ki simni karki.

¹⁴ Buri mu sɗa edi gaglai maini n'Epiɗ-ɗaimu Yesu Kristu gaini midini dama a siŋkaŋa ɗa nɵa, ɓa sarti n'aga mu hina si hanɗa edi ɗa a ŋasi ya gobi.

¹⁵ Amma aga mu fuɗa was, kapai asakal na mu yima edi li ɗa, midiki aga a kɵa gaini wazagai hanɗa lai.

Tiyi mi tiliti abai na wiini Kristu gaini aryi

¹⁶ Buri tiyi mi siŋkiki miɗini spakni gaini gizini Epiɗ-ɗaimu Yesu Kristu ɗa, pin labarna jre kai, n'a ɵina gaini gir, na ɗai e hiiniŋ war yel na wiiɗi ɗa kai, buri ɓa tiyi mi ɗi zaidakai na mi tiliti abaini gaini aryi.

¹⁷ Buri Alaw Api a sini kol gaiɗi abai, won hlai na wule a halasi edi sɗi abai n'amai na te suwa paŋ par ɓa: Hanɗa a ahiya na mu daraŋ gara, n'a vaŋa firiyiŋa amai gara lai.

¹⁸ Wule hanɗa tiyi mi ɵiniŋ gaini ɵimayi, a wasi amai war fuŋ n'Alaw par, won hlaina mi ɗa gaini amai midiɗi huwuŋ na sɗik.

¹⁹ Tiyi mi yimi ɓa seŋ na miɗi ɗai na min Alaw ɗa, a wala n'aŋ gaini ɗiyi gdaŋ, tiki ki tiki hangalki sini ɗa a futini, a na maiɗi lampa na te za gaglai war hlai na gegeŋ haa hlai a sɗasi edi nɵa, haa maaɵiki na gorof par te diyasi amai war agulki.

²⁰ Avut paŋ, tiki ki sɗi ɓa, miɗi na wiiɗi ɗai na min Alaw n'aŋ war ɗû ɗa, a muɗa edi buri na ɓa ɗif ktai a siŋkaŋ ka edi gaglai wuzani hlai par ɗa a na ɵa kai.

²¹ Buri miɗi na wiiɗi ɗai na min Alaw a muɗa edi pin diri na wiini ɗif kai, ɗai e miɗi mini Alaw edi ɗa pin huguni Seze sɗik.