Lokwita n'ag'aŋ sulu na wiiɗi paakai 7 - Ɗû na sɗik na wiini Alaw

¹ Aliza a waya seŋ a muɗa: EPIƊ-ƊAI a muɗa maini nɵa: dawai ler maini hanɗa ɵa ta ɗa, mini kosko na Samariya ɗa, kilo doogo pi sulu na wiini avudi aga a suma sulai zi arzaŋ ktai, kilo caaɓa pi puɗu na wiini orge ɗe aga a suma sulai zi arzaŋ ktai lai.

² Ɗif n'a sa simi wiini pai, n'a na kureɗ gaini a miɗini wiini ɗif na mini Alaw maini nɵa: koo ɓa EPIƊ-ƊAI a mala mini hlai n'amai edi mal tekeɗe kaw ɗa na ku muɗaŋ na ɗa a kiɗa a za ta ɗi? Aliza a wiyini seŋ: arku aga a talaŋ sme, amma aga a guna muku kai.

³ Ɗai na dugomai puɗu e ɗi fu mini magalani fuŋ n'abai ɗa ca, e miɗi arbaɗi marɗi: Sumu won na ca aŋ biyi mri ɗa buri maɗa?

⁴ Mu hulumu ɗa aha war fuŋ n'abai ɗa ɗe wiyamai te na aga te fuɗumu, mu sumnumu won na ca ɗe aga mu murumu a mri ɵa lai, marya ɗa hulumu aha war kaŋ na wiiɗi ɗai na Siriya ɗa, na ɓa e firiyi e hunumu karmu maa tese, na ɓa e firiyi e fuɗumu edi maa suwi lai.

⁵ Koskoi na futi te nawa li ɗa, e fiki e hili war kaŋ na wiiɗi ɗai na Siriya ɗa, hlai n'e cû gobi sini kaŋ ɗa e nivi ɗif ktai maa warni kai.

⁶ EPIƊ-ƊAI a hina suurani vokɗi askarai n'abai na gaini saret zi gaw, gaini plasai lai a wa aha war kaŋ na wiiɗi ɗai na Siriya. Nɵa nagai e miɗi arbaɗi marɗi: pai na Izrayel ɗa a miliɗisi paakai na wiiɗi Hititekai gaiɗi n'Egipte par pini yaw aŋ hutumumu sike.

⁷ Won hlai na futi te nawa li ɗa, e pri edi e ki siɗi e hinisi gumuɗi, plasaiɗi gaini ablehökaiɗi edi, e hinisi kaŋɗi ɵa hiyak.

⁸ Ɗai na dugomai hanɗa e cû war kaŋ ɗa, e niyi amlai war gumu ktai yaw, e simi, e ci, asakal par e mili arzaŋ, or gaini sapa lai, e hili e ŋûyûŋ cok, e hili e niyi war gumu zamai yaw e mili wazagai na warni e hili e ŋûyûŋ cok pra.

⁹ Nɵa ɗai na dugomai e miɗi arbaɗi marɗi: na mu zuŋmu na ɗa a pɗem kai, mefeŋ na girna a mefeŋ na wiini labar na pɗem, na ɓa mu sumu labar hanɗa edi duvukna kai haa hlai a sɗa edi haw ɗa, aga mu nuvumu gir. Hulumu aha war fuŋ n'abai ɗa, mu zumu labar ahani pai ɗa ta.

¹⁰ E hilisi e yikiɗi ɗai n'e giɗimi mini magala na wiini fuŋ n'abai ɗa, e miɗiɗi: mi niyi haa aha war kaŋ na wiiɗi ɗai na Siriya ɗa, ɗif ktai aryi blaŋ kai, wulani ɗif a wa ɵimani hum kaalai. A na ɗa a plasai gaini ablehökai na gaini niggi ɓak ɓak, gumu ɗe kadai zaw zaw lai.

¹¹ Ɗai zi giɗimi mini magala e yiki aha zaw, e si labar ahani pai sek ta lai.

¹² Pai a faka amai duvuk, a yikiɗi ŋarakai na wiini a miɗiɗi: mu ziki zaida na ɗa miɗini wala na ɗai na Siriya e rgiŋ warɗi aŋ ziŋ sumu; e siɗi ɓa, tumu ɗa, walamu zi simi aŋ kai, e niyi edi warni kaŋ na wiiɗi par, e ŋûyi edi arni hlai cok cok gaini hiini na ɓa, hlai na ɗai na Izrayel par e niyiɗi li edi war Samariya par ɗa e yimiɗi karɗi kaai kaai, e niyi aha war fuŋ n'abai ɗa lai.

¹³ Ktai arbaɗi ŋarakai a tika seŋ a miɗini: piyumu plasai na gdaŋai ɵim, arbani n'a hina na wiiɗi ɗai zi fuŋ ɗa. Wala n'aga a za siɗi, a na n'aga a ziɗi ɗai na Izrayel n'e hini ka aha war fuŋ n'abai gaini hlaiɗi paŋ lai. Mu ɵunuɗumu woni kapai seŋ hanɗa a yima edi mudumu gaglai kaai.

¹⁴ Pai a ɵina ɗai gaini saretai sulu gaini plasai na gidiyaŋ lai, buri e hili e tiliɗisi askarai na Siriya ɗa haw.

¹⁵ E tiki futi piɗi haa agoɗom wulani Yurdan ta, sapakai gaini wazagai zamai zamai viya a yaka ka piɗi war futi won hlai n'e ɗa pirmi gaini rûvi ɗa. Ɗai n'e ɵiniɗi ɗa e wiyisi e sini labar wiini pai.

¹⁶ Nɵa ɗai e niyisi anene, e virmi kaŋ na wiiɗi ɗai na Siriya maini n'EPIƊ-ƊAI a muɗaŋ ɗa nɵa. Kilo doogo pi sulu na wiini avudi a bunda a suma sulai zi arzaŋ ktai, kilo caaɓa pi puɗu na wiini orge a bunda a suma sulai zi arzaŋ ktai lai.

¹⁷ Pai a sa gɗamni mini magala tini ɗif na sini simi n'a na kureɗ gaini, amma ɗai e hiɵiŋ amai sini hlai haɵ a mra maini na ɗif na mini Alaw Aliza a miɗiŋni war mefeŋ na pai a halaɗi sini nɵa.

¹⁸ Buri ɓa war hlai na ɗif na mini Alaw a miɗini wiini pai ɓa: dawai ler maini hanɗa nɵa ta ɗa, kilo doogo pi sulu na wiini avudi aga a suma sulai zi arzaŋ ktai, kilo caaɓa pi puɗu na wiini orge ɗe aga a suma sulai zi arzaŋ ktai lai mini kosko na Samariya ɗa,

¹⁹ Ɗif n'a sa simi wiini pai a tika seŋ a miɗini wiini ɗif na mini Alaw ɓa: koo EPIƊ-ƊAI a mala mini hlai n'amai edi mal tekeɗe kaw, seŋ hanɗa a kiɗa a za ɗe? Aliza a wiyini seŋ ɓa: a na ɵa, aga ku talaŋ gaini arku, amma aga ku suma simi hanɗa kai.

²⁰ A za sini ɗa a seŋ hanɗa, vokɗi ɗai a haɵaŋ amai sini hlai haɵ, a mra su.