Lokwita n'ag'aŋ sulu na wiiɗi paakai 5 - Ɗû na sɗik na wiini Alaw

Aliza a zuula Naaman na dugum n'abaiɗi askarai na wiini pai na Siriya

¹ Naaman n'abaiɗi askarai na wiini pai na Siriya a ɗif na epin-gezani a daraŋ gara, wala n'a zilbaŋ li tini paŋ a siŋni paŋ, buri ɓa, EPIƊ-ƊAI a sa rɗi n'amai wiiɗi Siriya ɗa gaini. Amma ɗif zi hatam na agulni a huna kai hanɗa a na fu dugum.

² Ɗai na Siriya par e niyi edi aŋ virmi wazagai, war wiyiɗi n'aha sek ɗa, e hili aha war Izrayel e yimitisi ahiyagwi na agwi ktai aŋ bagai na mini gaw. Ahiyagwi hanɗa te hina aŋ za sda wuzaɗi munini Naaman.

³ Mefeŋ ktai ahiyagwi hanɗa te miɗiɗi wiiɗi emin-gezaɗi: aiya! na ɓa epin-geza a hala fu na hili sini ɗif na mini Alaw n'a na war Samariya ɗaw ɗa, a kiɗa a zuula veglekni zi dugum hanɗa sike.

⁴ Naaman a ka seŋ hanɗa wuzani epin-gezani a muɗa: ahiyagwi na Izrayel par ɗa te muɗa seŋ a n'a na.

⁵ Pai na Siriya a miɗini: hala woni, aga mu suku letre tuku ɗaw wiini pai na Izrayel ɗa. Naaman a hala ɗa, a mula arzaŋ tini kilo miya hu, or kilo doogo doogo ɵaara, sapa na gaini yikini yikini doogo lai.

⁶ A sitini letre wiini pai na Izrayel ɗa ta, seŋ n'aŋ warɗi maini nɵa: mu ɵunutukuɗi letre na ɗa tini ɗifŋa zi sda Naaman ɗa mal, ku zuulasi veglekni zi dugum ɗa.

⁷ Asakal n'a ŋiti letre ta ɗa, pai a ɓasa sapa na sini edi a muɗa: ta m'Alaw n'a kiɗa a sa suŋfa wiini ɗif lai, a kiɗa a tikaŋ edi lai zaw! na kapai pai a ɵinaŋasi ɗif ma ɓa mu zûûlini veglekni zi dugum ɗa. Yimiŋ midiki pɗem ɓa pai ɗa a paya gaya na ɗa a seŋ.

⁸ Won hlai na ɗif na mini Alaw Aliza a ɵina ɓa pai na Izrayel a ɓasa sapa na sini edi ɓas ɗa, a ɵina ɗai sini pai aŋ miɗini ɓa: pai a ɓasa sapa na sini edi buri maɗa? Naaman ɗa a halasi sa le, kapai a yima midini ɓa ɗif na mini Alaw a na aha warɗi Izrayel.

⁹ Naaman a hala gaini plasaini, gaini Saretni zi gaw lai a yima miɗi dilimi na wiini Aliza kaai.

¹⁰ Aliza a ɵina ɗif sini a miɗini ɓa: ku hala, ku ma suku azi muguzak agoɗom war Ra Yurdan, aga ku zuula, suku aga a bunda hilu lai.

¹¹ Naaman a fakasi mini hlai par gaini hiy a muɗa: mu hiina ɓa aga a niyasi anene ma, a ɗiya zaw a siiwa EPIƊ-ƊAI, Alaw na wiini ɗa, a tikiti tini midini hlai n'a na veglek ɗa, a zuula dugum na sa ɗa lai.

¹² Pini n'a na ɵa ɗa, ra n'abakai na war Damaskus: Abana na gaini Parpar ɗa, yem na warni ɗa a suwa yem n'a na war Izrayel gaini hlaini paŋ ɗa kai ɗi? Mu kiɗa mu masi sa woni kapai mu zuula kaai; a bunda arni plasaini, a hala gaini hiy

¹³ Ɗai na pini ɗa e hili sini e miɗini: epingezayi, na ɓa ɗif na mini Alaw a muɗuku na ɗa gaini wala na zini gir ɗa, ku zaŋ azi kai ɗe? Amma tiyana n'a muɗuku ɓa ku ma ɗa a suku nɵa yooka kadai kapai ku bunda hilu ɗa, ku zaŋ kai ɗa buri maɗa?

¹⁴ Nɵa Naaman a niya agoɗom war ra na Yurdan diga, a ziiba sini azi muguzak maini na ɗif na mini Alaw a miɗiŋni nɵa. Sini a bunda maini na wiini akoɗokai nɵa, a bunda hilu.

¹⁵ A wayasi gaiɗi ɗai na pini paŋ sini ɗif na wiini Alaw ɗa, a niya aha sini, a ɗiya wuzani a muɗa: Tiyana ɗa, a yima li mada ɓa, midiɗi yai paŋ ɗa, Alaw a na ɗa aha warɗi Izrayel tar, mu siiwuku yima katu n'agwi hanɗa ta par kaai.

¹⁶ Aliza a wiyini seŋ: gaini EPIƊ-ƊAI na karni na mu na aŋ ɵeŋni zaŋ, aga mu yima wala ktai tuku par kai. Naaman a piŋni mini haa, amma a ɗiya sini kai

¹⁷ Naaman a miɗini: ku ɗiya sini katuŋa kai na ɗa, hinaŋa mu mulaɗi afti won na par duɓani plasai atoŋo sulu, buri ɓa mu firiya mu za ɓaka zi yi, zaw ɓaka zamai wiini Alaw zamai kai, sai wiini EPIƊ-ƊAI tar.

¹⁸ Amma won hlai n'epin-geza aga a hala amlai war tempel na wiini Alaw Rimmon aŋ hurga azumai wuzani ɗa aga a yima tini graŋŋa, ta aga mu hurga azumai gaini lai lai ɗa, EPIƊ-ƊAI a saŋa ni burini wala hanɗa.

¹⁹ Aliza a wiyini seŋ: ku hala jam. Naaman a hala wiini.

Meefeŋ na wiini Gehazi, ɵeŋ na wiini Aliza

²⁰ Won hlai na Naaman a hala sini Aliza par gaigai agwi ɗa, Gehazi ɵeŋ na wiini ɗif na wiini Alaw Aliza a muɗa gaini warni: wazagai na Naaman na Siriya a kaŋsi na ɗa paŋ epin-geza a tika wala ktai maa pini kai sam, gaini EPIƊ-ƊAI na karni zaŋ, mu lawa luwi pini sai mu tika wala ktai tini par agwi.

²¹ Gehazi a faka pini Naaman gaini luwi, won hlai na Naaman a talaŋ a na lawaɗi pini, a niyasi azumai warni Saretni par a waya mini, a zilbaŋ a muɗa: jam tiɓ ɗi?

²² A wiyini seŋ: jam, epin-geza a ɵinaŋasi suku na ɓa gawlakai sulu war vok na wiiɗi ɗai na mini Alaw na midiɗi huwuŋ na Efrayim par e cûsi e ɗa ahani tiyana, a siiwuku na ɓa: ku siniɗi arzaŋ kilo doogo doogo hu lai, sapa zi yiki ɗa sulu lai.

²³ Naaman a miɗini: marya ɗa ku yima arzaŋ kilo doogo doogo ɵaara, a siika mini haa a wiini arzaŋ na kilo doogo doogo ɵaara gaini sapa zi yiki na sulu ɗa war sak sulu, a siŋɗi tiɗi ɗai sulu arbaɗi ɗai na pini kapai e libiŋ pini Gehazi.

²⁴ Won hlai n'e cû a Ofel ɗa, Gehazi a mula sak ɗa tiɗi par yaw, a mulaŋ ahani sa, a hiniɗi ɗai na sulu e hili wiiɗi.

²⁵ Amma ni ɗa a waya sini epin-gezani, Aliza a zilbaŋ a muɗa: Gehazi k'aŋsi wata ɗa? A wiyini seŋ: Mu hala war hlai kai koo.

²⁶ Aliza a miɗini: Won hlai na ɗif a prasi amai par war saretni a halasi muku sek ɗa, ku hiina ɓa war seze mu suɗukusi kai ɗi? Hanɗa a sarti na ku yima arzaŋ gaini sapa gaini luwuŋ Olive gaini luwuŋ zi vin gaini adumai gaini ɵaakai, bagakai na maɵagai gaiɗi na falakai ɗa lai woni ɗi?

²⁷ Dugum na sini Naaman ɗa aga a yumuku, tuku gaini pinzibaku paŋ haa kureɗ. Dugum a yima Gehazi tizaw, a fakasi mini Aliza par ɗa a puhura muɗukwi kaŋ tini dugum.