Lokwita n'ag'aŋ sulu na wiiɗi paakai 4 - Ɗû na sɗik na wiini Alaw

Aliza a zina piɗi muni na war greŋ

¹ Mefeŋ ktai munini ɗif na mini Alaw ktai te halasi sini Aliza te siiwaŋ te miɗini: ɗifku zi sda na mafa ɗa a mra su, tuku ku sɗa ɓa ni ɗa a huna EPIƊ-ƊAI. Tiyana ɗa, ɗif n'a tifiyi wala ɗa, a halasi na ɓa a miliɗi aliya na sulu ɗa, a ziɗi aŋ bagakai miɗini walani ɗa.

² Aliza a zilbiti: ku firiya ɓa mu za buriku ɗa a maɗa? Muɗaŋa haw ɗa, walaku n'a na ɗa a maɗa? Te wiyini seŋ: Walaŋa ktai maa aŋ kai, a hina ta ɗa a emel zi girdi-si agwi nɵa.

³ A muɗa: Hala siɗi ɗai na ɵimaku ɗa paŋ ku payasi wala n'e mi emel warni n'a na kadai, ku payasi viya ta.

⁴ Ku wayasi li aha ɗa, ku dogo mini hlai amai muku gaiɗi aliku duk, ku ma emel war wala zi mi emel do do, na ɓa a va li ɗa ku tikaŋ edi tar tar.

⁵ Muni te fakaɗi sini par, won hlai na te co aha, te dogo mini hlai amai miɗi gaiɗi aliɗi. Nagai e siɗisi wala zi mi emel ɗa, na te ma emel warni.

⁶ Won hlai na wala zi mi emel a va paŋ li, te miɗini wiini ahiɗi ɓa: sa zamai ktai pra. A wiyiɗi seŋ, a muɗa: zamai aŋ kir kai, nɵa emel zi ki a ɗiya zaw lai.

⁷ Te halasi te virnini wala n'a za paŋ wiini Aliza, Aliza a miɗiɗi: hala ku wura emel hanɗa edi, vurga tumuŋ na muduku ɗa, pini farai n'a hina ɗa gaiɗi aliku ki simi gaini lai.

⁸ Mefeŋ ktai, Aliza a hala war Sunem. Muni zi farai ktai te na fu woni, te siika mini buri a halaɗi a suma ahaɗi. Sini mefeŋ hanɗa par ɗa Aliza a hala li a Sunem ɗa a suma ɗa ahaɗi.

⁹ Muni te miɗini wiini mofaɗi: mu sɗa ɓa ɗif n'a na halasi ahamu kureɗ na ɗa a ɗif na wiini Alaw jre jre.

¹⁰ Rgutunumu dilimi agwi amai midiɗi dilimimu tiɓ, mu piyunumu li amlai ta, tabel ktai, wala zi simni ktai ta, lampa ta lai. Kapai a halasi li ɗa a sumna amai warɗi.

¹¹ Mefeŋ ktai Aliza a halasi ahaɗi, a niya amai warɗi dilimi na ɗa a fana warɗi.

¹² Aliza a miɗini wiini Gehazi ɗifni zi ɵeŋ buri a yikitisi emini dalam ɗa; Gehazi a yikitisi, te halasi te ɗiya wuzani Aliza.

¹³ Aliza a miɗini wiini Gehazi, ku miɗiɗi ɓa: te kaya siɗi mumu gara lai ɗa, te firiya ɓa mu zunumu piɗi ɗa war maɗa? Seŋ aŋ muku na ku firiya ɓa ku miɗiŋni wiini pai zaw wiini abaiɗi askarai na mi zini puku warni a na ɗi? Te wiyini seŋ: Teseki viya, seŋ ktai maa aŋ kai, m'an na arbaɗi ɗaiŋa, wala ktai n'a huwyaŋa aŋ kai.

¹⁴ Ali za a miɗini wiini Gehazi na ɵeŋni, mu zumu buriɗi a maɗa? A wiyini seŋ: Ahiɗi aŋ kai, mofaɗi ɗe a za wel ta lai.

¹⁵ Aliza a muɗa: Yikitisi haw; Gehazi a yikitisi, te halasi te ɗiyasi mini hlai par zaw.

¹⁶ Aliza a miɗiɗi: buza na wuzamu, sarti maini hanɗa ɵa ɗa aga ku yima ahi didikku. Te miɗini: epin-geza, ɗif na wiini Alaw zaw kai, ku duula ta na ɗa maɵa ɗa?

¹⁷ Buza na wuzaɗi ɗa haa sini sarti n'Aliza a muɗa gaini ta ɗa, muni te tika fel, te wa ahi maini na ni a miɗiŋɗi ɗa nɵa.

Aliza a ɵiya ahiɗi muni na Sunem ɗa war mri par

¹⁸ Ahiyagwi a za dai dai, mefeŋ ktai ɗa a hala edi pini epini n'a na edi war vowai gaiɗi ɗai zi hiɗi.

¹⁹ Ahiyagwi a ɗuula a muɗa: apa, mada ɗa, apa, mada ɗa, epini a miɗini wiini ɗifni zi sda: kiŋɗi witaw aha wiiɗi emini.

²⁰ Ɗif zi sda a tikaŋ a kiŋɗi wiiɗi emini lai; emini te tikaŋ amai tiɗi ta, haa girvudi n'arba ta ɗa ahiyagwi ɗa a mra su.

²¹ Nɵa te niya amai warɗi dilimini ɗif na wiini Alaw ɗa, te fanaŋ amai midini liyni waŋ, te dogo si mini hlai amai duk te halasi wiiɗi.

²² Te yika mofaɗi te miɗini: za barka, ɵinaŋasi ɗif zi sda ktai gaiɗi ablohoi su mu dabasi sini ɗif na wiini Alaw gaini aza nɵa ta, mu na wayasi.

²³ Mofaɗi a zilbiti: girna ɗa a merfeŋni tile kaalai, a Sabbat kaalai lai ɗa ku hala ahani girna tetew buri maɗa? Te wiyini seŋ: jam bas.

²⁴ Te ziziniti ablohoi ɗa, te miɗini wiini ɗif zi sda: hulumu, ɵaɗi wuzaɗi ablohoi ɗa, ku ɗiya warɗi futi kai, sai na mu muɗuku li.

²⁵ Te hala, te niya amai midiɗi huwuŋ Karmel sini ɗif na wiini Alaw. Won hlai na ɗif na wiini Alaw a tiliti te na halasi edi par gaigai ɗa a miɗini wiini Gehazi na ɵeŋni: tala muni hamu na Sunem par te na!

²⁶ Lawa miɗi, zilba labar na siɗi ɗa, ku yima labarni mofaɗi gaini ahiɗi lai. Muni te wiyini seŋ, sai jam.

²⁷ Won hlai na te co amai midiɗi huwuŋ sini Aliza ɗa, te yima ezini ɗa, Gehazi a firiya a hûgûti edi sini Aliza par, amma Aliza a miɗini: hiniti buri t'aŋ war huwyi. EPIƊ-ƊAI a ŋoya seŋ hanɗa wuza, a muɗaŋa gaini kai.

²⁸ Te muɗa: ta, mu zilba ahi tuku tuku epin-geza ɗi? Mu muɗuku ɓa ku duulaŋa kadai meere kai kai ɗi?

²⁹ Aliza a miɗini wiini Gehazi: zizina suku, ku tikiti amaraŋaiŋa tuku, hala, warɗi futi ɗa, ku nava li gaini ɗif ɗa, ku ɵiɓini wuti kai, ɗif a ɵuɓuku wuti li ɗe ku yimaŋ kaalai. Ku co li ɗa ku tikiti amaraŋaiŋa ɗa midini arni ahiyagwi ta.

³⁰ Amma emini ahiyagwi te miɗini: gaini EPIƊ-ƊAI na karni zaŋ, gaiku tuku zaŋ lai mu ɓurwa gaiku kai. Aliza a faka amai a hala gaiɗi.

³¹ Gehazi a halaɗi wuzaɗi, a tikiti amaraŋai ɗa midini arni ahiyagwi ta, amma a siŋka kaalai, a muguza kaalai. Gehazi a wayasi arni Aliza blaŋ a miɗini: ahiyagwi ɗa a ɵiya kai.

³² Aliza a cosi aha, a navasi ahiyagwi gaini mri gaini fini midini liyni waŋ.

³³ A niya amlai, a dogo mini hlai amai mini duk a siiwa EPIƊ-ƊAI.

³⁴ Asakal par a fana midini ahiyagwi waŋ, a tika mini miɗini mini ta, a mula arni midini arni sa, a mula tini midini tini sa lai. A maaɗa edi miɗini meɗ, sini ahiyagwi a tika pini a sawa.

³⁵ Aliza a niyasi azumai a guna warɗi dilimi blaŋ blaŋ, asakal par a waya a fana midini ahiyagwi pra. Nɵa ahiyagwi ɗa a tirsima azi muguzak, asakal par a mula arni edi sa.

³⁶ Aliza a yika Gehazi na ɵeŋni a miɗini: hala yikitisi muni na Sunem ɗa; a yikitisi, te halasi sini Aliza, Aliza a miɗiɗi: tika ahiku kiɗi.

³⁷ Te halasi, te bla si ɗi azumai ezini, te hurga azumai wuzani, asakal par te tikasi ahiɗi, te niyasi azumai gaini.

Doknai n'amai na gaini wala zi fiɗi ɗai arni simi na warɗi

³⁸ Aliza a wayasi a Gilgal, wiyamai te na fu midini afti war sarti ni ɗa, won hlai na ɗai na mini Alaw na marni e hilisi sini ɗa, Aliza a miɗini wiini ɵeŋni: tikiti doknai n'amai ɗa avu ta, diɗisi simi wiiɗi ɗai na mini Alaw na marmu yit.

³⁹ Ktai arbaɗi ɗai na mini Alaw par, a hala edi basga aŋ payasi wala n'arni sugoi. A navasi a rawasi aliɗi luwuni ktai haa a vasi sapani gaini ta, a halasi a ɗuklaŋ ca ca a pokoŋ avu arni sugoi ɗa puk. Ɗif ktai maa a sɗaŋ kai.

⁴⁰ E ɓûrwi simi hanɗa wiiɗi ɗai ta ta, amma won hlai n'e titimi simi hanɗa miɗi ɗa, e ɗûûli e miɗi: ɗif na wiini Alaw, mri a na avu warɗi doknai ɗa, e kiɗi e simi kir kai.

⁴¹ Ɗif na wiini Alaw a muɗa: piyiŋasi avudi ta, a pokoŋ war dognai ɗa a muɗa: ɓurwaŋ wiiɗi ɗai ɗa e simi, wala na meefeŋ warɗi dognai kir kai.

Aliza a sa simi miɗi ɗai miya ɗaw

⁴² War sarti ni dama, ɗif ktai a halasi a Baal-Salisa par, a kinisi peŋ na wiini merfeŋni seyem wiini Aliza: peŋ na wiini Orge caaɓa, sak na wiini algama na hehe ɗaw lai. Aliza a muɗa: ɓûrwiŋɗi wiiɗi ɗai e simi.

⁴³ Amma ɵeŋni a wiyini seŋ: kapai mu ɓûrwiŋɗi wiiɗi ɗai miya ɗaw maɵa maɵa ɗa? Aliza a muɗa: ɓurwaŋ wiiɗi ɗai e simi, EPIƊ-ƊAI a na muɗa maini nɵa: ɗai aga e simi haa pini a hina.

⁴⁴ ɵeŋni Aliza a ɓurwa peŋ ɗa wiiɗi ɗai wuzani arɗi, e simi haa pini a hina maini n'EPIƊ-ƊAI a muɗaŋ ɗa nɵa.