Lokwita n'ag'aŋ sulu na wiiɗi paakai 25 - Ɗû na sɗik na wiini Alaw

Nebukadnezar pai na Babilon a cikiti Yeruzalem

¹ War mefeŋ n'ag'aŋ doogo na wiini tile n'ag'aŋ doogo war buza n'ag'aŋ ɵeeŋe na Sedesiyas aŋ warɗi pai, Nebukadnezar pai na Babilon a halasi gaiɗi askarai na wiini paŋ a Yeruzalem, e pisi miɗi par tiɓ. E libi hlai n'e ŋûyi siɗi duɓani amai, e gûniti Yeruzalem amlai gaini gun.

² Fuŋ n'abai a hina gaini ciki ɵa haa sini buza na n'ag'aŋ doogo pi ktai na wiini pai Sedesiyas.

³ War mefeŋ n'ag'aŋ ɵeeŋe na wiini tile ni ɗa, wiyamai te riya amai abai ta, wala na ɗai e simiŋ aŋ kir kai.

⁴ Ɗai na Babilon e ɓili waŋ ktai siɗi ɵagai na sini fuŋ n'abai ɗa su. Askarai na Yuda e prisi edi duvuk war mini magala n'a na arbani ɵaga na sulu, gobi gaini zardeŋ na wiini pai ɗa. Askarai na Babilon e ɗi fu anene duɓani fuŋ n'abai par ɵa ca lai, pai Sedesiyas a tikiti futi na Araba sek ɗa.

⁵ Askarai na Babilon e tiki futi pini pai, e yimiŋsi midini afti na plas na Yeriko par. Askarai na wiini e ɵiri, e pri edi, e hiniŋ blaŋ.

⁶ Askarai na Babilon e yimi pai Sedesiyas, e kiŋ a Ribla wuzani pai na Babilon aŋ zitini sariya.

⁷ E ɵi wulaɗi alini wuzani arni, asakal par pai Nebukadnezar a co arni co co, a rgaŋ gaini jaɓ zi kiya na gdaŋai a kaŋ a Babilon.

⁸ War mefeŋ n'ag'aŋ muguzak na wiini tile n'ag'aŋ ɵim, war buza n'ag'aŋ doogo pi ɵeeŋe na Nebukadnezar pai na Babilon aŋ warɗi pai ɗa, Nebuzaradan abaiɗi ɗai n'e giɗimi pai, ɗif zi sda na wiini pai na Babilon a cosi a Yeruzalem.

⁹ A ɵa afu pini tempel na wiini EPIƊ-ƊAI gaini dalam na wiini pai, gaini dalamai zamai zamai na Yeruzalem ɗa paŋ lai. A ɵa afu pini dalam na wiiɗi ɗai n'abakai ta ta ɗa lai.

¹⁰ Askarai na Babilon par n'e hilisi gaini abaiɗi ɗai n'e giɗimi pai ɗa, e hiɗiti zilaagai na siɗi Yeruzalem ɗa azumai.

¹¹ Nebuzaradan abaiɗi ɗai n'e giɗimi pai ɗa, a kiɗi piɗi ɗai n'e hini aha war fuŋ n'abai ɗa aŋ bege war Babilon: nagai n'e si siɗi wiini pai na Babilon, gaiɗi n'e hini piɗi ɗai na Yuda ɗa lai.

¹² Amma a hiniɗika ɗai zamai na murgakai aha midini aftiɗi kapai e pi luwuŋ zi vin, e hirmi vowai ɗa lai.

¹³ Ɗai na Babilon ɗa e hiɗi gaarakai zi kiya n'amlai war tempel na wiini EPIƊ-ƊAI ɗa azumai, e hiɗi Saretai gaini daya n'abai zi kiya n'amlai war tempel na wiini EPIƊ-ƊAI azumai lai. E libi kiya ɗa a Babilon.

¹⁴ E mili dumbakai gaini wazagai n'e mili bonu edi gaini, gaini muguɗ, gaini kopai gaini wazagai n'e zi sda gaini amlai warni tempel si kiya ɗa paŋ.

¹⁵ Abaiɗi ɗai n'e giɗimi pai ɗa a mula wazagai n'e yi wazagai zi ɗûgûdi zi lûgûzi gaini, gaini n'e mi fel zi yiimi warni, z'arzaŋ ɗa lai, zi zi or ɗa lai.

¹⁶ Gaarakai na sulu, daya n'abai gaini Saretai na pini na Salmun a zizinaŋ burini tempel na wiini EPIƊ-ƊAI ɗa, kiloni kiyani ɗa a pɵa tini ɗif kai.

¹⁷ Gaarakai na sulu, mogoni n'amai sek ɗa metir ɵeeŋe ɵeeŋe, amai par merfeŋni ɗa e rgi wala na midini gaini ɵiri edi na zi kiya na mogoni n'amai sek ɗa metir ɗaw gaini gal gal, wala maini ava ɵa gaini wi sini ɗik ɗik, alini luwuŋ grenade gaini gûni sini gun gun lai, paŋ e ziŋ gaini kiya. Gaarakai na sulu ɗa a rga maini marni ɵa, ava na sini maini marni ɵa lai.

¹⁸ Abaiɗi ɗai n'e giɗimi pai ɗa, a yima Seraya pai zi ɓaka n'abai, Sefaniya pai zi ɓaka n'aga wulani, gaiɗi paakai zi ɓaka na hu n'e giɗimi mini tempel ɗa lai.

¹⁹ A yima abaiɗi askarai ktai n'e tikiŋ miɗini sdaɗi askarai, a yima ɗai n'abakai na wiini pai ɵim n'e hini ka aha war fuŋ n'abai, a yima sekreter na miliɗi ɗai na war askar a sa tini ɗa, ɗai zamai na Yuda par gaiɗi doogo doogo ɵaara. Ɗai hanɗa paŋ e ɗi fu aha warɗi Yeruzalem.

²⁰ Nebuzaradan abaiɗi ɗai n'e giɗimi pai ɗa a ziɗi aŋ ɗai zi daŋgai, a kiɗi wiini pai na Babilon a Ribla.

²¹ Pai na Babilon a fiɗiɗi edi a Ribla, midini afti na Hamat. Nɵa ɗai na Yuda ɗa e bindi aŋ bagakai edi gaigai sini aftiɗi par.

Gedaliya Lawan na Yuda, fiɗini n'edi, pri edi na wiiɗi ɗai zamai war Egipte

²² Amma ɗai na murgakai n'e hini aha midini afti na Yuda ɗa, Nebukadnezar pai na Babilon a tika Gedaliya n'ahini Ahikam, n'ahini Safan ɗa aŋ Lawan midiɗi ta.

²³ Won hlai na abakaiɗi askarai gaiɗi ɗai na piɗi e ɵini ɓa pai na Babilon a tika Gedaliya aŋ Lawan ta ɗa, e hilisi sini a Mispa gaiɗi ɗai na piɗi ɗa, e ɗi miɗi: Yismaiel n'ahini Netaniya; Yoha nan n'ahini Koreya, Seraya n'ahini Tanhumet na Netofa par gaini Yaazaniya na Maaka par lai.

²⁴ Gadaliya a miɗiɗi wiiɗi abakaiɗi askarai gaiɗi ɗai na piɗi maini nɵa: ki hûni ɓa aga ki bindi li aŋ bagakai na wiiɗi ɗai na Babilon ɗa kai, wiyisi aha midini afti na Yuda ɗa, ki zi pini miɗi na wiini pai na Babilon ɗa lai, mu miɗiki wala ktai na meefeŋ aga a za siki kai.

²⁵ Amma war tile n'ag'aŋ muguzak na wiini buza ni ɗa, Yismaiel n'ahini Netaniya, n'ahini Elisama n'aŋ war pinziba na wiini pai a halasi a Mispa gaiɗi ɗai pini doogo e fiɗi Gedaliya edi, ɗai na Yuda gaiɗi na Babilon n'e ɗi fu gaini a Mispa ɗa lai.

²⁶ Nɵa ɗai ɗa paŋ, na agwi kai, na abai kai, abakaiɗi askarai kai paŋ e rûvi war Egipte buri e hûniɗi ɗai na Babilon ɗa ta.

Pai na Babilon a ɵasi Yoyakin edi war daŋgai par

²⁷ Buza doogo doogo hu pi muguzak, asakal n'e ki Yoyakin edi aŋ bege war Babilon ɗa, war mefeŋ caaɓa pi muguzak na wiini tile n'ag'aŋ doogo pi sulu ɗa, Ewil-Merodak a bunda aŋ pai war Babilon. War buzani dama a za yum sini Yoyakin pai na Yuda, a ɵaŋsi edi warɗi daŋgai par.

²⁸ A zaŋ aŋ marmaini ta, a sitini paramaini amai par midiɗi paakai na maini ɵa n'e ɗa gaini war Babilon ɗa paŋ.

²⁹ A wiini sapa zi daŋgai na sini ɗa edi, a bunda a suma ɗa gaini pai na Babilon ɗa haa sini mrini ta.

³⁰ Hajani na war yuvai yuvai paŋ ɗa a zina pini ɗa a pai na Babilon ɗa, haa sini mrini ta.