Lokwita n'ag'aŋ sulu na wiiɗi paakai 23 - Ɗû na sɗik na wiini Alaw

Sda na hahakai na Yoziyas a zaŋ war Yuda gaiɗi Izrayel

¹ Pai a ɵina piɗi n'abakai n'arbaɗi ɗai na war Yuda gaiɗi na Yeruzalem buri e diŋgisi sini.

² Asakal par a hala gaiɗi ktai amai warni tempel na wiini EPIƊ-ƊAI. Ɗai na Yuda gaiɗi na Yeruzalem ɗa paŋ: paakai zi ɓaka, ɗai na mini Alaw, gaiɗi ɗai paŋ, na agogoi gaiɗi na abakai paŋ. A ŋiɗi seŋ n'aŋ warni maktuɓ na wiini bonu n'e niviŋsi amlai war tempel na wiini EPIƊ-ƊAI ɗa.

³ Pai a ɗiyasi amai par midini hlai n'e ɗiyi miɗini par zaw, a za bonu na hehe gaini EPIƊ-ƊAI, a bonu n'a zini dewele midini aŋ tika futi pini EPIƊ-ƊAI, aŋ za pini gadaini, pini gadaini zi ɗiyi gaini zi ɗû gaiɗi agulni paŋ, gaini suŋfaɗi agulni paŋ, kapai a va seŋ n'aŋ pini bonu n'aŋ gaini ɗû war maktuɓ ni ɗa amai. Ɗai paŋ e ɗiyi war bonu hanɗa lai.

⁴ Pai a sini futi wiini Hilkiya pai zi ɓaka, wiiɗi paakai zi ɓaka n'e gi wulani gaiɗi paakai zi ɓaka n'e giɗimi mini hlai buri e milisi wazagai n'e ziziniŋ burini alaw Baal, gaiɗi Alaw na muni Akera gaini na wiini wazagai zi rgi n'arbani hlai n'amai ɗa lai paŋ edi war tempel na wiini EPIƊ-ƊAI par. E yiŋ edi anene duɓaɗi Yeruzalem par war huduk na Sedron, e ki bononi ɗa war Betel.

⁵ Yoziyas a miliɗi paakai zi ɓaka na paakai na Yuda e miliɗi aŋ yi wazagai zi ɗûgûdi zi lûgûzi war hlai zi ɓaka na war fuŋ n'abakai na Yuda gaini na ɵimaɗi Yeruzalem lai ɗa edi. A miliɗi nagai n'e yi wazagai zi ɗûgûdi zi lûgûzi wiini alaw Baal, wiiɗi futi gaini tile, gaini meeɵek gaini wazagai zi rgi n'arbani hlai n'amai ɗa paŋ edi.

⁶ A miɗiɗi wiiɗi ɗai buri e tikisi luwuŋ na wiiɗi Alaw na muni Akera edi war tempel na wiini EPIƊ-ƊAI par e kiŋ edi war huduk na Sedron anene par duɓaɗi Yeruzalem, e yiŋ edi woni, a bunda aŋ bonu, e kû bono hanɗa edi miɗini yeɵ na wiiɗi ɗai ɗa.

⁷ A ho dalam na wiiɗi zawarai n'a na ɵimani tempel na wiini EPIƊ-ƊAI ɗa azumai, na falakai e hi sapa wiiɗi nagai n'e hûrgû azumai wuzaɗi Alaw na muni Akera woni ɗa.

⁸ A tipiɗisi paakai zi ɓaka na war fuŋ n'abakai na Yuda ɗa paŋ aha war Yeruzalem, a tuura hlai zi ɓaka na nagai e ɗi ka e yi wazagai zi ɗûgûdi zi lûgûzi woni ɗa edi, a Geba par haa a Beer-seba ta. A tuura hlai zi ɓaka n'a na aha mini magala na wiini fuŋ n'abai ɗa paŋ edi. Na a suwa paŋ hlai zi ɓaka n'a na mini magala na wiini Yosva Lawan na war fuŋ n'abai hanɗa, hlai zi ɓaka ni ɗa, a na midiɗi tuku na muni na ɓa ku niya aha war fuŋ n'abai sek ɗa

⁹ Paakai zi ɓaka n'e yi wazagai zi ɗûgûdi zi lûgûzi war hlai zi ɓaka ɗa e siɗi futi aŋ zi ɓaka miɗini gûwiŋ zi yi ɓaka na wiini EPIƊ-ƊAI na war Yeruzalem ɗa kai. Amma e kiɗi e limi peŋ na is arni kai gaiɗi paakai zi ɓaka na marɗi lai.

¹⁰ A tuura hlai n'e yikiŋ ɓa Tofet n'a na Ben-Hinnom ɗa edi kapai ɗai e yiɗi aliɗi na maɵagai gaiɗi na falakai edi aŋ ɓaka wiini Alaw Molek kir kai.

¹¹ A tuura plasai na paakai na Yuda e ziziniŋ buriɗi Alaw Futi n'a na ɵimani mini tempel na wiini EPIƊ-ƊAI gobi gaiɗi dilimi na wiini Netan-Melek ɗif na kɓur, amlai war dalamai na agogoi na ɵimani tempel ɗa, a ya saretai zi gaw na buriɗi alaw Futi ɗa edi lai.

¹² Pai a sa futi buri e tûûri gûwiŋ zi yi ɓaka na paakai na Yuda e ziziniŋ, n'a na amai war poriyo na wiini Akaz, midiɗi dilimi na midiɗi plas. A tuura gûwiŋ zi yi ɓaka na Manase a zizinaŋ aha war pakatai na sulu na wiini tempel na wiini EPIƊ-ƊAI, a sa futi ɓa e hûŋ azumai, e libi deɓerni edi war huduk na Sedron.

¹³ Pai a tuura hlai zi ɓaka n'a na wuzaɗi Yeruzalem tar, amai par ɵimani huwuŋ zi luwuŋ Olive na Salmun pai na Izrayel a zizinaŋ burini alaw Astarte, hihir na wiiɗi ɗai na Sidon, burini alaw Kemos, hihir na wiiɗi ɗai na Mowab gaini alaw Milkom, hihir na wiini pinzibani Ammon ɗa lai edi.

¹⁴ A haɗa ali-fuŋ z'alaw edi, a ɗukla luwuŋ z'alaw azumai, a mula keɵkeɗi ɗai war balamni ca ca.

Yoziyas a za sda na hehe arbaɗi pinzibaɗi Izrayel na doogo na war gal n'azumai sek

¹⁵ gûwiŋ zi yi ɓaka n'a Betel gaini hlai zi ɓaka na Yerobowam n'ahini Nebat a zizinaŋ, a kiɗi aliɗi Izrayel war tuwur gaini ɗa, Yoziyas a hoŋ azumai. A ho gûwiŋ zi yi ɓaka ɗa azumai gaini hlaini zi ɓaka ɗa lai, a ya hlai zi ɓaka ɗa edi, a bundaŋ aŋ bonu, luwuŋ z'alaw ɗe a ɵaŋ arni afu su lai.

¹⁶ Asakal par hlai n'a na ɵa arni, a tala yeɵɗi ɗai amai midini boŋor ɗa, a ɵina ɗai aŋ milinisi keɵke war waŋ ɗa par, a yaŋ amai midini gûwiŋ zi ɓaka ɗa. A tuuraŋ maini miɗi na wiini EPIƊ-ƊAI na ɗif na mini Alaw a ɗuula gaini ɗa nɵa, seŋ na ɗif na mini Alaw a ɗuula gaini ɗa a va amai.

¹⁷ A zilba ɓa: wala n'aŋ gaini rgi tiɓ maini yeɵ ɵa na ɗa a maɗa? Ɗai na war fuŋ n'abai ɗa par e wiyini seŋ e miɗi: a yeɵ na wiini ɗif na mini Alaw n'a halasi a Yuda par, n'a muɗa ka miɗini wala na ku zaŋsi tiyana miɗini gûwiŋ zi yi ɓaka na Betel hanɗa.

¹⁸ A miɗiɗi: hiniŋ, ɗif a tetema keɵkeni ɗa kai. Nɵa, e hini keɵkeni gaini keɵkeni ɗif na mini Alaw n'a halasi a Samariya ɗa.

¹⁹ Yoziyas a tuura tempel na war hlai zi ɓaka na war fuŋ n'abakai na war Samariya, na paakai na Izrayel e ziziniŋ kapai e ɓilkini agulni EPIƊ-ƊAI gaini paŋ edi. A za siɗi kal kal maini n'a zaŋ siɗi Betel ɗa nɵa.

²⁰ A fiɗiɗi paakai zi ɓaka n'e ɗa war hlai zi ɓaka ɗa amai midini gûwiŋ zi yi ɓaka. A ya keɵkeɗi ɗai amai midini lai. Asakal par a wayasi aha war Yeruzalem.

Ziɗi fet na wiiɗi Paska

²¹ Pai Yoziyas a sa miɗi wiiɗi ɗai ɓa: ki ziti fet na wiiɗi Paska na wiini EPIƊ-ƊAI Alaw na wiiki, maini n'aŋ gaini ɗû war maktuɓ na wiini bonu ɗa nɵa.

²² Haa sini mefeŋ na gaŋgalaŋai e tiki piɗi aŋ ŋi aha warɗi Izrayel par, sini mefeŋ na wiiɗi paakai na wiiɗi Izrayel gaiɗi na Yuda par, fet na wiiɗi Paska na maiɗi hanɗa nɵa te za ka duk kai.

²³ Fet na wiiɗi Paska na burini EPIƊ-ƊAI na te za maiɗi hanɗa nɵa ɗa, te za ɗa aha war Yeruzalem, war buza n'ag'aŋ doogo pi mitwis na Yoziyas aŋ warɗi pai ɗa.

Miɗi na midiɗi pai na wiini Yoziyas

²⁴ Ɗai n'e hiɗi kalaŋ gaiɗi ɗai zi mri, ɗai zi siɗi wuti, alawai zi rgi n'agogoi n'e ɗiyiŋ amlai war dalam gaini alawai zi rgi zamai zamai, gaini wazagai na haharai n'a barasi midini afti na Yuda aha war Yeruzalem lai ɗa, Yoziyas a tuuraŋ edi kapai a za pini ɗû, pini seŋ n'a ɗo war maktuɓ na Hilkiya pai zi ɓaka n'abai a navaŋ amlai warni tempel na wiini EPIƊ-ƊAI ɗa.

²⁵ Wuzani Yoziyas par, pai ktai n'a wayasi sini EPIƊ-ƊAI gaiɗi agulni paŋ, gaini suŋfaɗi agulni paŋ, gaini gdaŋni paŋ lai maini ɗû na wiini Musus a gada midini nɵa ɗa aŋ kai. Asakal ni par pai zamai n'a za maini ɵa aŋ kaalai.

²⁶ Gaini hanɗa paŋ hiy n'abai na wiini EPIƊ-ƊAI n'a zaŋ siɗi Yuda a tika azumai kai, buri ɓa sda na Manase a zaŋ ɗa a ɓilkini agulni gara

²⁷ EPIƊ-ƊAI a muɗa: Yuda ɗa lai aga mu siɗi piɗi edi wuzani ara par maini na mu siɗi piɗi Izrayel edi ɗa nɵa. Aga mu hiniti Yeruzalem, fuŋ n'abai na mu varaŋ ɗa edi, gaini tempel na mu muɗa miɗini lai ɓa, aga mu za simniŋa woni ɗa lai.

²⁸ Labar na midini sda na Yoziyas a zaŋ paŋ ɗa aŋ gaini ɗû war maktuɓ na wiiɗi paakai na Yuda kai ɗi?

²⁹ Hlai n'aŋ warɗi pai ɗa, mefeŋ ktai Faraw Neko pai n'Egipte a hala aŋ hitima gaini pai na Asiriya sini ra Öfrata sek. Pai Yoziyas a dara a sini futi aŋ vigi gaiɗi ɗaini kai. Hlai na pai n'Egipte arni a mula gaini tar ɗa a fuɗaŋ edi a Megiddo.

³⁰ Asakal par ɗaini e tikiŋsi war Saret a Megiddo par e kiŋsi a Yeruzalem. E piŋ war waŋ na wiini ɗa. Ɗai na Yuda e viri Yowakaz n'ahini, e tikiŋ aŋ pai war balamni.

Yowakaz pai na Yuda

³¹ Yowakaz a suma pai sek ɗa buzani caaɓa pi hu, a za warɗi pai ɗa tile hu aha war Yeruzalem. Emini yikiɗi ɓa: Hamutal t'ahini Yirmeya n'a Libna par.

³² A paya payai na meefeŋ wuzani arni EPIƊ-ƊAI kal kal maiɗi tiyakaini ɗa nɵa.

³³ Faraw Neko a naggaŋ daŋgai a Ribla midini afti na Hamat, kapai a ŋa aŋ pai aha war Yeruzalem kir kai. Faraw Neko a tika tar midini afti na Yuda ta, e si arzaŋ kilo dubu hu, or kilo doogo doogo hu lai.

³⁴ A tika Eliyakim n'ahini Yoziyas aŋ pai ta war balamni Yoziyas n'epini, a bunda yikini ɓa: Yoyakim. Yowakaz ɗa a ɵaŋ war daŋgai su, a kaŋ war Egipte a mra woni.

³⁵ Kapai farai na Faraw a ɗiyaŋsi a vurga edi ɗa, Yoyakim a tika tar zi dewele zi arzaŋ gaini zi or midini ɗif na midini afti paŋ pini kiɗini kiɗini. Yoyakim a tapa hanɗa, a sa arzaŋ gaini or na wiini Faraw Neko ɗa edi.

Yoyakim pai na Yuda

³⁶ Yoyakim a suma pai sek ɗa buzani caaɓa pi ɵim, a buza warɗi pai buza doogo pi ktai aha warɗi Yeruzalem. Emini yikiɗi ɓa: Zebidda, t'ahini Pedaya n'a Ruma par.

³⁷ A paya payai na meefeŋ wuzani arni EPIƊ-ƊAI kal kal maiɗi tiyakaini nɵa.