Lokwita n'ag'aŋ sulu na wiiɗi paakai 21 - Ɗû na sɗik na wiini Alaw

Manase pai na Yuda

¹ Manase a suma pai sek ɗa buzani doogo pi sulu, a za buza warɗi pai buza doogo doogo ɵim pi ɵim aha war Yeruzalem. Emini yikiɗi ɓa: Hefsi-Ba.

² A paya payai na meefeŋ wuzani arni EPIƊ-ƊAI, a za ɗa a wazagai na haharai na pinziba n'EPIƊ-ƊAI a birgiɗi edi wuzaɗi aliɗi Izrayel e ɗi ka e ziŋ ɗa.

³ A waya a rga hlai zi ɓaka na Ezekiyas n'epini a hoŋ azumai ɗa amai pra, a rga gûwiŋ zi yi ɓaka wiini alaw Baal, a pa luwuŋ z'alaw tiɓ maini Akab pai na Izrayel a na ka a paŋ ɗa ɵa. A hurga azumai wuzani wazagai zi rgi n'arbani hlai n'amai ɗa, a za ɵeŋni lai.

⁴ A rga gûwiŋ zi yi ɓaka amlai war tempel na wiini EPIƊ-ƊAI na war Yeruzalem, a tempel n'EPIƊ-ƊAI a muɗa gaini mini ɓa: aga a sumna amlai warni ɗa.

⁵ A rga gûwiŋ zi yi ɓaka wiini wazagai zi rgi n'arbani hlai n'amai ɗa paŋ amlai warni pakatai na sulu na wiini tempel na wiini EPIƊ-ƊAI ɗa.

⁶ A ya ahini maa edi aŋ ɓaka yit, a za wazagai zi hiila zamai zamai viya, a hala miɗi ɗai zi siɗi wuti gaiɗi n'e hiɗi kalaŋ gaiɗi ɗai zi mri ɗa lai. A ɓilkini agulni EPIƊ-ƊAI gaini sda na maafanai n'a zaŋ wuzani arni ɗa.

⁷ A ɗiyiti Alaw na muni Akera n'a ziziniti ɗa amlai warni tempel n'EPIƊ-ƊAI a miɗini wiini David gaini Salmun n'ahini gaini ɓa: aga a sumna arbaɗi ɗai haa kureɗ ɗa amlai warni tempel hanɗa, aha war Yeruzalem fuŋ n'abai n'a varaŋ arbani fuŋ na wiiɗi pinziba na war Izrayel paŋ ɗa.

⁸ A miɗiɗi zamai pra ɓa: na ɓa aliɗi Izrayel e zi pini wala na mu gidiɗi miɗini paŋ, e gidi pini Ɗû na mu siŋɗi tini Musus ɵeŋ na wiya lai ɗa, aga mu hiniɗi yaw aŋ giliŋi edi gaigai sini afti na mu siŋɗi wiiɗi tamai ɗi par kir kai.

⁹ Amma e zi pini miɗi na wiini EPIƊ-ƊAI kai. Manase a wûliɗi edi haa e bindi e zi meefeŋ ɗa e sûwiɗi pinziba n'EPIƊ-ƊAI a vidiɗi edi wuzaɗi aliɗi Izrayel ɗa.

¹⁰ Nɵa EPIƊ-ƊAI a muɗa gaiɗi war miɗi ɗaini na mini Alaw maini nɵa:

¹¹ Manase pai na Yuda a za wazagai na haharai hanɗa paŋ, a za meefeŋ maa a suwa na wiiɗi pinzibaɗi Amoritekai n'e ɗi ka wuzani par ɗa, a kiɗi ɗai na Yuda war tuwur gaini alawaini na zamai zi rgi ɗa.

¹² Buri hanɗa, EPIƊ-ƊAI, Alaw na wiiɗi Izrayel a na muɗa maini nɵa: aga mu hinasi gir midiɗi Yeruzalem gaiɗi Yuda, a gir n'abai na ɗif n'a ɵinaŋ li gaini ɵimani paŋ ɗa hunai te yimaŋ paŋ.

¹³ Aga mu tûûriti Yeruzalem edi maini na mu tûûriti Samariya gaini pinzibani Akab ɗa edi nɵa. Aga mu ɵitiɗi ɗai na war Yeruzalem ɗa edi maini tasa n'e ɵiti warni edi, asakal par e pi azumai duk ɗa nɵa.

¹⁴ Aga mu hina piɗi ɗaiŋa n'e hini ɗa edi, aga mu siɗi war tiɗi gawɗi, aga e virmiɗi, e mili wazagai na midini aftiɗi par lai.

¹⁵ Buri ɓa haa sini mefeŋ na tamaiɗi e niyisi edi war Egipte par haa girna, siɗi aŋ ɓilkitiŋa agula ɵa, e zi wuzani ara ɗa a wazagai na maafanai ɵa, e hili gaini na ɗa wuzaɗi sek sek.

¹⁶ Pai Manase a ma felɗi ɗai na tiɗi warni seŋ kai edi viya, haa fuŋ n'abai na Yeruzalem ɗa paŋ a va gaini fel hanɗa, hanɗa a tika sini ki n'a kiɗi ɗai na Yuda war tuwur, aŋ piyi payai na meefeŋ wuzani arni EPIƊ-ƊAI ɗa.

¹⁷ Labar na midini Manase, sda n'a zaŋ ɗa paŋ gaini tuwur n'a zaŋ ɗa lai ɗa, aŋ gaini ɗû war maktuɓ na wiiɗi paakai na Yuda kai ɗi?

¹⁸ Manase a mra, a hala gaiɗi tamaini, e piŋ warni zardeŋ n'aha ahani, na yikini zamai ɓa: zardeŋ na wiini Uzza. Ammon n'ahini a suma pai war balamni.

Ammon pai na Yuda

¹⁹ Ammon a suma pai sek ɗa buzani caaɓa pi sulu, a buza warɗi pai buza sulu a Yeruzalem. Emini yikiɗi ɓa: Mesullemet, t'ahini Harus n'a Yotba par.

²⁰ A paya payai na meefeŋ wuzani arni EPIƊ-ƊAI maini Manase n'epini ɗa nɵa.

²¹ A tikiti te futi na wiini epini ɵa kal kal. A za ɵeŋ na wiini alawai zamai zi rgi n'e pini a na ka a zaŋ ɗa, a hurga azumai wuzani lai.

²² A hina EPIƊ-ƊAI, Alaw na wiiɗi tamaini edi mak, a tikiti futi n'EPIƊ-ƊAI a siŋkitini ɗa kai.

²³ Abakaiɗi askarai na wiini Ammon e rgi warɗi aŋ zini meefeŋ, e fiɗiŋ aha warni dalamni.

²⁴ Amma ɗai na Yuda ɗa, e fiɗiɗi nagai n'e rgi warɗi miɗini ɗa edi kafa, e tiki Yoziyas n'ahini aŋ pai war balamni.

²⁵ Labar na midini sdani Ammon n'a zaŋ ɗa, aŋ gaini ɗû war maktuɓ na wiiɗi paakai na Yuda kai ɗi?

²⁶ E pi Ammon war waŋ na wiini, war zardeŋ na wiini Uzza. Yoziyas n'ahini a suma pai war balamni.