Lokwita n'ag'aŋ sulu na wiiɗi paakai 2 - Ɗû na sɗik na wiini Alaw

Alaw a yima Eliyas amai, Aliza a tika balamni

¹ Yimi n'amai na wiini Eliyas n'arbani berber n'abai ɗa a za maini nɵa: mefeŋ ktai ɗa, Eliyas gaini Aliza e hilisi a Gilgal par piɗi marɗi,

² e cûsi war hlai ktai ta ɗa, Eliyas a miɗini wiini Aliza: za barka, sumna ka na dam, EPIƊ-ƊAI a ɵinaŋa na ɗa a Betel na ta. Aliza a wiyini seŋ: gaini EPIƊ-ƊAI na karni zaŋ, gaiku tuku zaŋ lai, mu ɓurwa gaiku kai, e hili a Betel piɗi marɗi.

³ Ɗai na mini Alaw na Betel e hilisi sini Aliza e miɗini: girna ɗa EPIƊ-ƊAI aga a tika epin-gezaku amai war fuŋ n'Alaw amai par muduku, ku sɗa ɵa ya ɗi? A wiyini seŋ: ta mu sɗa ɵa ya lai, ki miɗiŋa seŋ hanɗa kai.

⁴ Eliyas a miɗini: za barka Aliza, sumna ka na dam, EPIƊ-ƊAI a ɵinaŋa na ɗa a Yeriko na ta. A wiyini seŋ: gaini EPIƊ-ƊAI na karni zaŋ, gaiku tuku zaŋ lai, mu ɓurwa gaiku kai, e hili piɗi marɗi a Yeriko.

⁵ Ɗai na mini Alaw na war Yeriko e hilisi sini Aliza e miɗini: girna ɗa EPIƊ-ƊAI aga a tika epin-gezaku amai war fuŋ-n'Alaw amai par muduku, ku sɗa ɵa ya ɗi? A wiyiɗi seŋ: mu sɗa ɵa ya lai, ki miɗiŋa seŋ hanɗa kai.

⁶ Eliyas a miɗini za barka, sumna ka na dam, EPIƊ-ƊAI a ɵinaŋa na ɗa agoɗom wulani ra Yurdan ta. A wiyini seŋ: gaini EPIƊ-ƊAI na karni zaŋ, gaiku tuku zaŋ lai, mu ɓurwa gaiku kai. E hili piɗi marɗi ɵa.

⁷ Eliyas gaini Aliza ɗa e ɗiyi agoɗom wulani ra Yurdan tar, ɗai na mini Alaw zamai doogo doogo ɵim e hilisi piɗi par e ɗiyisi edi duɓaɗi par agwi

⁸ Nɵa Eliyas a wa sapa na sini edi, a faaɗaŋ tika tika, a ɵiɓa yem gaini. Yem a ɓasa ca a yima na sek lai, na sek lai, gaini sulogoiɗi e vigi ɗa hlai huleŋ.

⁹ Won hlai n'e ɗa vigi ɗa, Eliyas a miɗini wiini Aliza: wuzani hlai n'EPIƊ-ƊAI a yikaŋa edi suku par ɗa, ku firiya mu za suku par ɗa a maɗa? Aliza a wiyini seŋ: mu siiwuku a juva ɓa seze n'aŋ suku na ɗa mu nava ɵa ta ta sulu.

¹⁰ Eliyas a miɗini: ku zilba na ɗa a wala n'a nava gir kaw ɗi ɗa, ku tala mu yima li edi suku par tar ɗa, aga a za suku maini nɵa, na ɓa ɵa kai ɗa aga a za kai.

¹¹ Won hlai n'e hili piɗi marɗi yaw, e hiɗi kalaŋ lai ɗa, Saret z'afu ktai gaini plasai z'afu lai a halasi a niya arbaɗi a ɓûrwiɗi siɗi marɗi par. Eliyas a yima amai war fuŋ-n'Alaw arbani berber n'abai ɗa.

¹² Won hlai na Aliza a tala hanɗa, a ɗuula pini a muɗa: apa, apa tuku ku suwa saret na gaini plasai na warɗi Izrayel ɗa paŋ kai ɗi, asakal par a yima edi wuzani arni par. Nɵa Aliza a yima sapa na sini ɗa a ɓasaŋ arba ca.

¹³ A militi kaput na te yakasi amai wulani Eliyas par ɗa, a wayasi agoɗom wulani ra Yurdan, a ɗiya amai wulani Dan ɗa zaw.

¹⁴ A militi kaput na te yakasi wulani Eliyas par a ɵiɓa yem gaiɗi a muɗa: EPIƊ-ƊAI, Alaw na wiini Eliyas ɗa aŋ wata ɗa? Aŋ wata ɗa? A ɵiɓa yem pra, yem a ɓasa, a yima na sek lai na sek lai, Aliza a vuga.

¹⁵ Marni na ɗai na mini Alaw na Yeriko e tiliŋsi edi par ca e miɗi: seze n'aŋ sini Eliyas ɗa aŋ sini Aliza koo! E hilisi mini, e hûrgû azumai wuzani haa azumai midini afti.

¹⁶ E miɗini: Mi ɗa gaiɗi ɗai n'agulɗi a huna kai doogo doogo ɵim, hiniyi mi ɵiniɗi aŋ piyisi epin-gezaku ɗa ablaŋtaŋkai ɗa, seze na wiini EPIƊ-ƊAI n'a tikaŋ ɗa, a blaŋ na ɗa siɗi huwuŋ ktai su, war huduk su ɗi ɗa. A miɗiɗi ki ɵini ɗif kai.

¹⁷ Amma e siiki mini haa mini a tika ta, a miɗiɗi ɓa: Ɵiniɗi wiiki, e ɵiniɗi ɗai hanɗa, e piyiŋsi haa mefeŋ hu, e niviŋsi kai.

¹⁸ E wiyisi e nivisi Aliza a Yeriko ɵa dam, a miɗiɗi: mu miɗiki ɓa, ki hili kai ka.

Aliza a bunda yem zi liiwi na Yeriko ɗa pɗem

¹⁹ Ɗai na Yeriko e hili sini Aliza e miɗini: fuŋyi n'abai ɗa gaini futini gara maini na ku talaŋ na ɵa, amma yem na warni ɗa pɗem kai, afti ɗe a za seyem kaalai.

²⁰ Aliza a miɗiɗi: piyiŋasi sufra na hehe ta, ki miliŋasi manta warni ca, kiŋŋasi. Epiyiŋnisi ta lai.

²¹ A hala mini hlai zi liwi yem ɗa, a poko manta warni a muɗa: EPIƊ-ƊAI a na muɗa maini nɵa: yem hanɗa mu bundaŋ li pɗem, aga a fuɗa wazagai na karni kir kai, a tuura seyem n'arni afti kir kaalai.

²² Yem a bunda pɗem haa girna pini miɗi n'Aliza a muɗaŋ ɗa.

Aliza a tûûsiɗi aliyagoi n'e zini yewere

²³ Aliza a faka a Yeriko par a hala Betel, Won hlai n'aŋ warɗi futi blaŋ, aliyagoi n'agogoi e niyisi aha war fuŋ n'abai par e ɗûûli pini e miɗi: yuuh, kloti, yuuh, kloti.

²⁴ A bunda arni siɗi, a tiliɗi, a tûûsiɗi gaini yikini EPIƊ-ƊAI. Nɵa wazagai na edi buza sulu na yikini ɓa: Urs a niyasi amlai arni jur par a fuɗa piɗi doogo doogo puɗu pi sulu.

²⁵ Woni par a hala midiɗi huwuŋ Karmel, asakal par a wayasi a Samariya.