Lokwita n'ag'aŋ sulu na wiiɗi paakai 19 - Ɗû na sɗik na wiini Alaw

Ezekiyas a zilba hinini ɗif na mini Alaw Esaya

¹ Won hlai na pai Ezekiyas a ɵina seŋ hanɗa, a ɓasa sapa na sini edi, a wa sapa zi tuwi sini, a hala amlai war tempel na wiini EPIƊ-ƊAI.

² Asakal par a ɵina Eliyakim abai na midini dalam na wiini pai, gaini sekreter Sebna, gaiɗi paakai zi ɓaka n'e fini war sda viya sini ɗif na mini Alaw Esaya n'ahini Amots nagai lai, e wi sapa zi tuwi siɗi,

³ e miɗini wiini Esaya maini nɵa: Ezekiyas ɓa girna ɗa, a mefeŋ zi kwimi, zi gir, zi siyer lai. Maini na ɗai e miɗiŋ na ɵa ɗa: “ahi midini edi ta, amma emini gdaŋɗi na te siŋka kapai a wasi edi gaini aŋ kai”.

⁴ Ablaŋtaŋkai, EPIƊ-ƊAI, Alaw na wiiku a ɵina seŋ na pai n'Asiriya a ɵinasi abai na midini dalamni aŋ muɗaŋ, aŋ tirka Alaw na karni ɗa ya ɗi. Ablaŋtaŋkai EPIƊ-ƊAI, Alaw na wiiku ɗa aga a tikini gir midini burini seŋ n'a ɵinaŋ mini par ɗi. Nɵa ɗa, tuku Esaya siiwa EPIƊ-ƊAI buriɗi ɗaiku n'e hini karɗi ɗa haw kai ɗi.

⁵ Ɗai na pai Ezekiyas a ɵiniɗi ɗa e cû sini Esaya.

⁶ Esaya a miɗiɗi: hili ki miɗini wiini Epin-gezaki ɓa: EPIƊ-ƊAI a na muɗa maini nɵa: seŋ na ku ɵinaŋ na ɗai na wiini pai n'Asiriya e miɗiŋ sa aŋ meefeŋ paŋ ɗa ku hunaŋ kai.

⁷ Tala, aga mu sini hiini ktai, aga a nava labar n'aha par, pini labar hanɗa, aga a waya aha midini aftini, a co li aha midini aftini ɗa, aga mu fuɗaŋ edi gaini kaɵkar.

⁸ Abai na midini dalam na wiini pai a ɵina ɓa pai n'Asiriya a na a Lakis kir kai, a hala a Libna aŋ hitima fuŋ n'abai hanɗa, a hala pini woni.

⁹ Pai n'Asiriya a nava labar midini Tirhaka, na Etiyopiya par ɓa: Tala a niyaɗi edi ya aŋ hitima gaiku. Pai n'Asiriya a ɵina ɗai sini Ezekiyas pra aŋ miɗini:

Pai na Asiriya a wayasi aŋ piyiɗi miɗi Yeruzalem pra

¹⁰ Ki miɗini wiini Ezekiyas pai na Yuda ɓa: ku tika hiiniku midini Alaw na wiiku gara ta, ku hiina ɓa aga a ɗalaŋa aŋ tikiti Yeruzalem ɗi ɗa, ku wula ɵa kai.

¹¹ Tuku gaini muduku ku sɗa wala na paakai n'Asiriya e ɗa e ziŋ sini afti na zamai paŋ ɗa, e tûûriŋ edi marwai marwai, tuku ku hiina ɓa aga ku mula miɗi par yaw kir kai ɗi!

¹² alawai na wiiɗi pinziba na tamaiya na wuza par e tûûriŋ edi maini: Gozan, Harran, Resef gaiɗi ɗai na Eden n'e ɗa a Telasar ɵa ɗa, e kiɗi e pliɗi edi tiɗi par ɗi?

¹³ Pai na Hamat, na Arpad, na Layir, na Sefarvayim, na Hena gaini na Iva ɗa e ɗi wata ɗa?

¹⁴ Ezekiyas a tikiti letre tiɗi ɗai n'e ɵiniɗisi ɗa par, a ŋiti, a niya amai warni tempel na wiini EPIƊ-ƊAI a militi letre hanɗa edi wuzani EPIƊ-ƊAI.

¹⁵ A siiwa EPIƊ-ƊAI a muɗa: EPIƊ-ƊAI, Alaw na wiiɗi Izrayel, tuku na ku sumna amai midiɗi kerubimkai, aftiɗi paakai na midiɗi yai paŋ ɗa Alaw na wiiɗi ku tuku ktai, ku za hlai n'amai gaiɗi yai ku tuku.

¹⁶ EPIƊ-ƊAI, jagasi ɵimaku ma jak, juɓura, EPIƊ-ƊAI, malasi arku edi mal, tala. Ɵina seŋ na ɗai na Sennakerib a ɵiniɗisi e ɗa miɗiŋ suku tuku Alaw na karku haw ɗa.

¹⁷ EPIƊ-ƊAI, a jre ɓa paakai na Asiriya e vidiɗi pinzibaɗi ɗai edi viya gaini aftiɗi paŋ lai.

¹⁸ E pûkû alawaiɗi arni afu, amma alawai ni ɗa a Alaw kai, a wazagai n'a rga gaini tini ɗif. Zamai ɗa a luwuŋ, zamai ɗa a ali-fuŋ lai, paakai na Asiriya e tûûriŋ edi.

¹⁹ Amma tuku EPIƊ-ƊAI, Alaw na wiyi, kûrɗiyi edi tini Sennakerib par kruɗ, kapai aftiɗi paakai na midiɗi yai paŋ e siɗi ɓa k'Alaw ku tuku EPIƊ-ƊAI ktai.

Esaya a wiyini seŋ n'EPIƊ-ƊAI a miɗiŋni wiini Ezekiyas

²⁰ Esaya n'ahini Amots a ɵina ɗai sini Ezekiyas aŋ miɗini ɓa: EPIƊ-ƊAI, Alaw na wiiɗi Izrayel a na muɗa maini nɵa: Siiwa na ku siiwaŋa burini Sennakerib pai na Asiriya ɗa, mu ɵinaŋ ya.

²¹ Seŋ n'EPIƊ-ƊAI a muɗaŋ burini a na maini nɵa: Siyon na juvi te na miisuku, te na zuku yewere, Yeruzalem na juvi, te na riya puku, te gigiza midiɗi puku.

²² Ku tirka ɗa asiya ɗa? Ku muɗa seŋ na meefeŋ na ɗa sini asiya ɗa? Ku muɗa gaini wule na gdaŋ na ɗa wiini asiya ɗa, na ku talaŋ maini ɗif na nafani aŋ kai ɵa ɗa asiya ɗa? Ku zaŋ na sa ta Alaw na sɗik, Alaw na wiiɗi Izrayel.

²³ War miɗi ɗai na ku ɵiniɗisi ɗa, ku tirkaŋa ta EPIƊ-ƊAI ku muɗa gaini warku ɓa: gaini saretaiŋa zi gaw na viya hanɗa, ta Sennakerib mu niya haa amai merfeŋni huwaŋai, haa amlai arbani jur na Liban, aŋ ɗukla luwuŋ Sedre n'abakai gaini luwuŋ Sipre na mogo kai lai. Mu hala haa amai merfeŋɗi huwuŋi na muguwi gara ɗa ta. Haa sini jur na gaini futini gara ɗa ta lai.

²⁴ Mu ɓula kalaŋ, mu ca yem na midini afti zamai zamai. Arakaini ra Nil ɗa paŋ mu hiɗikaŋ amai, hlai na mu tika aza midini afti n'Egipte.

²⁵ Sennakerib, ku sɗa ɓa sda hanɗa mu kataŋsi haa avut par mu ta, ku sɗa ɵa kai ɗi? Haa gamai par mu hiinaŋsi ta, tiyana mu dara mu vaŋ amai. Mu tukuku ɓa kapai ku haɗa fuŋ n'abakai zi ɵaga ɗa azumai, ku bundaŋ aŋ greŋ.

²⁶ Ɗai na war fuŋ hanɗa gdaŋɗi a vada vat, e ɗa war hunai, war siyer lai. E bindi maini evek n'edi war basga nɵa, maini sugoi n'a goɗa nɵa, maini sugoi n'a diya amai midini dalam nɵa, maini algama na neme neme a yimaŋ wuzani bûzûgûni nɵa.

²⁷ Won hlai na ku sumna azumai, won hlai na ku niya anene won hlai na ku niyasi aha lai, mu sɗa hanɗa paŋ. won hlai na ku faka sa gaini hiy ɗa, mu sɗaŋ lai.

²⁸ Buri ku faka amai sa gaini hiy n'abai, seŋku zi miɗi na ɗewek mu ɵinaŋ paŋ lai. Tiyana ɗa, aga mu pa sogom merfeŋku tiɓ, mu wa eleŋje muku ɗik lai. Aga mu wuyuku ahaku warɗi futi na ku halasi warɗi par ɗa.

²⁹ Hanɗa aga a za aŋ wala zi siŋki buriku tuku Ezekiyas war buza hanɗa, ɗai aga e simi algama n'a diya kiini. Buza na midini nɵa pra. Amma war buza n'ag'aŋ hu ɗa, aga ki sûûɗi seyem, ki hiɗiŋ, ki pi luwaŋai zi vin, ki limi alini lai.

³⁰ Nagai na war pinzibani Yuda n'e hini karɗi, aga e rûvi sirdai azumai sek gaigai, aga e wi ali amai tiɗi sek viya lai maini luwuŋ nɵa.

³¹ Buri ɓa war Yeruzalem par n'e hini agwi aga e niyisi edi, n'e kûrɗi ɗa, aga e niyisi edi midiɗi huwuŋ Siyon par lai, hanɗa a wala n'EPIƊ-ƊAI aga a zaŋ, burini diri n'a na ya warni.

³² Buri nɵa, EPIƊ-ƊAI a na muɗa midini pai n'Asiriya maini nɵa: aga a niya aha war fuŋ n'abai hanɗa kai, aga a ɵiɓa ɓaraw aha warni sek kai, aga a hitimaŋ gaini gamar kai, aga a luba afti amai azini ɵaga kapai e pri aha sek midini kai.

³³ Aga a waya duɓani warɗi futi n'a halasi warɗi par ɗaw, aga a niya aha war fuŋ n'abai hanɗa kai, a miɗi na sini EPIƊ-ƊAI par.

³⁴ Aga mu giɗima fuŋ n'abai hanɗa, aga mu plaŋ edi lai. buriya ta, burini David na ɗifŋa lai.

Ɗai na Asiriya e wiyi aha, Sennakerib a nava mri

³⁵ War duvuk hanɗa, ɵeŋ na wiini EPIƊ-ƊAI a niya aha war kaŋ na wiiɗi ɗai n'Asiriya, a fuɗa ɗai dubu miya gaini doogo doogo mitwis pi ɵim; won hlai na ɗai e fikisi amai gorof par, e nivisi ɗa a kopoŋ, e ɗi ɗai zi mri sal.

³⁶ Sennakerib pai n'Asiriya a sa miɗi wiiɗi ɗai buri e rɗi kaŋ na wiiɗi ɗa, a waya a Ninive a sumna woni.

³⁷ Mefeŋ ktai, hlai n'a na aŋ siiwa amlai war tempel na wiini Nisrok alaw na wiini, alini zamai sulu Adrammelek gaini Sareser e fiɗiŋ edi gaini kaɵkar, e pri edi midini afti n'e yikiŋ ɓa Ararat. Asarhadon n'ahini a suma pai war balamni.