Lokwita n'ag'aŋ sulu na wiiɗi paakai 18 - Ɗû na sɗik na wiini Alaw

Ezekiyas pai na Yuda

¹ War buza n'ag'aŋ hu na Oziyas n'ahini Ela pai na Izrayel aŋ warɗi pai, Ezekiyas n'ahini Akaz a suma pai midiɗi Yuda.

² A suma pai sek ɗa, buzani caaɓa pi ɵim, a za buza warɗi pai buza caaɓa pi ɵeeŋe aha war Yeruzalem. Emini yikiɗi ɓa: Abi, t'ahini Zekariyas.

³ A paya payai na pɗem wuzani arni EPIƊ-ƊAI kal kal maini David na tiyni nɵa.

⁴ A vada hlai zi ɓaka edi ɗa a ni, a haɗa alini fuŋ z'alawai na gaini ɗiyi amai zaw zaw ɗa edi, a ɗukla luwuŋ z'alaw na gaini pi tiɓ tiɓ ɗa azumai, a haɗa wala meefeŋ zi kiya na Musus a zaŋ ɗa edi buri ɓa haa sini mefeŋ ni ɗa aliɗi Izrayel e yi wala zi ɗûgûdi zi lûgûzi wuzani e sini yiki ɓa: Nehustan.

⁵ Ezekiyas a ɗiya yimini midini EPIƊ-ƊAI, Alaw na wiiɗi Izrayel. Arbaɗi paakai n'e simi war Yuda paŋ ɗa, n'e vigi wuzani par gaiɗi n'e simi asakalni par lai ɗa, ktai n'a kata gaini aŋ kai.

⁶ A naga sini EPIƊ-ƊAI, a pla mini duk kai zaŋ. A za pini gadai n'EPIƊ-ƊAI a siŋni wiini Musus ɗa.

⁷ EPIƊ-ƊAI a na fu gaini, wala paŋ n'a hiinaŋ li ɓa a zaŋ a zi ɗa a zaŋ ta. A faka amai sini pai na Asiriya, pai a kiɗa aŋ ŋa miɗini kir kai.

⁸ Ni gaini midini a rɗa amai midiɗi Filistrekai a tika futi piɗi haa aha midini afti na Gaza ta, a mula hlaiɗi zi gɗam gaini fuŋɗi n'abakai lai.

Tiki na ɗai e tikiti Samariya

⁹ War buza n'ag'aŋ puɗu na Ezekiyas aŋ warɗi pai na Yuda, a buza n'ag'aŋ muguzak na Oziyas n'ahini Ela a na aŋ pai midiɗi Izrayel ɗa lai, Salmanasar pai na Asiriya a halasi a hitimiti Samariya, a tikiti a ŋa midiɗi lai.

¹⁰ Ɗai na Asiriya e zi buza hu e tikiti Samariya ɗaw. E tikiti war buza n'ag'aŋ ɵaara na Ezekiyas aŋ warɗi pai na Yuda, a buza n'ag'aŋ ɵeeŋe na Oziyas aŋ warɗi pai midiɗi Izrayel ɗa lai.

¹¹ Pai na Asiriya a kiɗi ɗai na Izrayel war Asiriya, a siɗi hlai zi simni a Hala, na zamai ɵimani ra Habor midini afti na Gozaŋ, warni fuŋ n'abakai na Mede lai.

¹² Buri ɓa e ɵini mini EPIƊ-ƊAI, Alaw na wiiɗi kai; e hi amai midini gadai na wiini bonu n'a zaŋ gaiɗi: wazagai na Musus ɵeŋ na wiini EPIƊ-ƊAI a gidiɗi miɗini ɗa e yimiŋ kaalai, e zi pini kaalai.

Sennakerib pai na Asiriya a hitimiti Yuda gaiɗi Yeruzalem

¹³ War buza n'ag'aŋ doogo pi puɗu na Ezekiyas aŋ warɗi pai, Sennakerib pai n'Asiriya a hitima fuŋ n'abakai zi ɵaga na war Yuda ɗa paŋ, a mulaŋ lai.

¹⁴ Nɵa Ezekiyas pai na Yuda, a ɵina ɗai sini pai na Asiriya a Lakis a miɗini: mu za meefeŋ, hitimaŋa kir kai, na ku tikaŋŋa li mada paŋ ɗa, aga mu zaŋ. Pai na Asiriya a tikini tar miɗini Ezekiyas pai na Yuda, a virgini arzaŋ kilo dubu ɵeeŋe, or kilo miya ɵeeŋe lai.

¹⁵ Ezekiyas a sini arzaŋ n'amlai warni tempel na wiini EPIƊ-ƊAI gaini n'amlai war godai n'ahani pai ɗa lai.

¹⁶ War sarti ni ɗa, Ezekiyas a sa futi ɓa e hûrki or na sini porte gaini na sini luwuŋ na sini ɗa edi, luwuŋ na ni pai na Yuda gaini midini dama a sa futi ɓa e yimi or sini ɗa, a siŋni wiini pai na Asiriya.

Sennakerib pai na Asiriya a piyiɗi miɗi Yeruzalem

¹⁷ Amma pai n'Asiriya a ɵina abaiɗi askarai na wiini, gaini abaiɗi ɗaini zi sda gaini abai na midini dalamni lai a Lakis par sini pai Ezekiyas na Yuda a Yeruzalem gaini vokɗi askarai piɗi pɗem ta lai. E hili, e cû war Yeruzalem. Won hlai n'e cû woni, e ɗiyisi mini hlai na yem na warɗi avai n'amai par a kasi warni ɗaw ɗa, e ɗiyisi warɗi futi na te ka edi war vowai na wiini ɗif n'a za sapa bogro par lai.

¹⁸ E ɵini pini pai ɓa a halasi e firiyi e nivi gaini. Nɵa, Eliyakim n'ahini Hilkiya, abai na midini dalam na wiini pai, gaini Sebna na sekreter gaini Yowa, ɗif n'a giɗima maktuɓ na wiini wazagai n'a vuga n'ahini Asaf lai e niyisi edi miɗi.

¹⁹ Abai na midini dalam na wiini pai a miɗiɗi: ki miɗini wiini Ezekiyas ɓa, Pai n'abai, Pai n'Asiriya a zilbaŋsi ɓa: a pɵa tiɓ na ɗa midini ma ɗa?

²⁰ Ku hiina warku ɓa seŋ zi miɗi na taf taf kadai ɗa, a yel gaini kurfuk na war hatam ɗi! Ku pɵa na midini asiya kiɗi ɗa na kapai ku faka amai sa ɗa?

²¹ Ku pɵa na ɗa midiɗi Egipte, vayai na gaini hiɗi ɓaw, na asiya ɗi paŋ n'a baza tini li midini a ɓulaŋ fu tini ɗi? Faraw pai n'Egipte a na maini nɵa burini asiya ɗi paŋ n'a na pɵa midini ɗa.

²² Ablaŋtaŋkai aga ki wiyiŋa seŋ ɓa: ki pɵi na ɗa midini EPIƊ-ƊAI, Alaw na wiiki ɗi ɗa, Ezekiyas a tuura hlaini zi ɓaka gaini gûwiŋni zi yi ɓaka ɗa edi. A miɗiɗi wiiɗi ɗai na Yuda gaiɗi na Yeruzalem ɗa ɓa: E hûrgû azumai ɗa wuzani gûwiŋ zi yi ɓaka n'a na war Yeruzalem ɗa kiini a Ezekiyas ni kai ɗi.

²³ Nɵa ɗa, za barka, ro epin-geza, pai n'Asiriya haw le, na ɓa ɗaiku zi diɓiri plasai e ɗa ɗa, aga mu piyuku plasai dubu sulu.

²⁴ Tuku maa ku kiɗa ku birga Lawan na wiini epin-geza n'agwi na piɗi marni kai, ku pɵa na ɗa midiɗi Egipte ɓa aga te sukusi Saretai zi gaw gaiɗi ɗai n'e diɓiriŋ lai kai ɗi?

²⁵ Ki hiini ɓa, mu halasi aŋ hitima, aŋ tuura hlai hanɗa edi lai ɗa, dirini EPIƊ-ƊAI aŋ warni kai ɗi? A saŋa futi ɗa a EPIƊ-ƊAI ɓa mu hala mu hitima afti hanɗa, mu tuuraŋ edi lai.

²⁶ Nɵa, Eliyakim n'ahini Hilkiya, Sebna gaini Yowa e miɗini wiini abai na midini dalam na wiini pai maini nɵa: Mi siiwuku, miɗiyisi gaini mini seŋ na wiiɗi ɗai na Aram ɗa tiyi mi ɵini ya. Ku miɗiyi gaini mini seŋ na wiiɗi Yudiyakai ɵimaɗi ɗai n'e ɗa amai midiɗi ɵagai par aŋ ziɓiri na ɗa kai.

²⁷ Abai na midini dalam na wiini pai a wiyiɗi seŋ: Seŋ n'epin-geza a ɵinaŋasi aŋ muɗaŋ ɗa a na burini epin-gezaku gaiku tuku kiiki ɗi, nagai n'e simnisi amai par midiɗi ɵagai hanɗa, aga e bindi e simi fulaiɗi, e ci huŋwaiɗi lai gaiki tiki ɗa e ɗi nagai kai ɗi?

²⁸ Nɵa abai na midini dalam na wiini pai a ɗiya amai zaw, a ɗuula gaini gdaŋni war mini seŋ na wiiɗi Yudiyakai, a muɗa: Ziɓiri seŋ na wiini Pai n'abai, Pai n'Asiriya ɗa.

²⁹ Pai a na muɗa maini nɵa: ki hini Ezekiyas a dûûliki kai buri a kiɗa a piliki edi war ta par kai.

³⁰ Ki tiɓi pini Ezekiyas n'aga a ziki midiki ɓa: ki pɵi midini EPIƊ-ƊAI, aga a piliki edi fakat fakat, n'a miɗiki lai ɓa fuŋ n'abai hanɗa aga a sa tini pai n'Asiriya kai ɗa kai.

³¹ Pai n'Asiriya a na muɗa maini nɵa: ki yimi seŋni Ezekiyas ɗa kai, ki zi marmai gaya, wiyisi amlai pa, nɵa asiya asiya paŋ aga a luma ali luwuŋ zi vin gaini ali luwuŋ Fige na wiini, aga a ca yem war kiliŋi na wiini par lai.

³² Asakal par aga mu halaɗi, mu kiki midini afti na maini na wiiki nɵa. Afti n'a za algama, n'a za vin na hehe, afti n'a za wala zi simi gaini luwuŋ zi vin, afti n'a za luwuŋ Olive, n'a za emel, afti n'a za emelni ami lai. Nɵa aga ki simni karki, ki mri kai. Ki yimi pini Ezekiyas n'a na dûûliki ɓa EPIƊ-ƊAI aga a plumu edi kir kai.

³³ Alawai na wiini pinziba hanɗa e kiɗi e ɗiliŋa aŋ tika aftiɗi kai ɗi?

³⁴ Alawai na wiiɗi Hamat, gaiɗi na wiiɗi Arpad e ɗi wata ɗa? Alawai na wiiɗi Sefarvayim, gaiɗi na wiiɗi Hena gaiɗi na wiiɗi Iva ɗa e ɗi wata ɗa? Alawai hanɗa e ɗiliŋa aŋ tikiti Samariya kai ɗi?

³⁵ Arbani alawai na wiini afti hanɗa paŋ ɗa, ktai n'a pla aftini edi war ta par a na wata ɗa? Na kapai EPIƊ-ƊAI a pliti Yeruzalem edi war ta par ɗa.

³⁶ Ɗai e simni hiyak, e wiyini seŋ kai, buri pai Ezekiyas a miɗiɗi ɓa: e wiyini seŋ kai.

³⁷ Asakal par Eliyakim n'ahini Hilkiya abai na midini dalam na wiini pai, sekreter Sebna gaini Yowa, ɗif n'a giɗima maktuɓ na wiini wazagai n'a vuga, n'ahini Asaf, e wiyisi sini Ezekiyas, sapa na siɗi gaini ɓisi edi, e miɗini seŋ na abai na midini dalam na wiini pai n'Asiriya a miɗiŋɗisi ɗa.