Lokwita n'ag'aŋ sulu na wiiɗi paakai 14 - Ɗû na sɗik na wiini Alaw

Amasiyas pai na Yuda

¹ War buza n'ag'aŋ sulu na Yowas n'ahini Yowakaz pai na Izrayel aŋ warɗi pai ɗa, Amasiyas n'ahini Yowas pai na Yuda a suma pai.

² A suma pai sek ɗa buzani caaɓa pi ɵim, a za buza warɗi pai buza caaɓa pi ɵeeŋe aha war Yeruzalem. Emini e yikiti ɓa: Yehowaddin, te na Yeruzalem par.

³ A paya payai na pɗem wuzani arni EPIƊ-ƊAI, a kata gaini David na tiyni kai sme, amma a za kal kal maini Yowas n'epini ɗa nɵa.

⁴ Gaini hanɗa paŋ ɗa, hlai zi ɓaka ɗa a vada edi kai, ɗai siɗi aŋ zi ɓaka ɵa, aŋ yi wazagai zi ɗûgûdi zi lûgûzi won hlai zi ɓaka ɵa ɗai.

⁵ Won hlai na pai na wiini Amasiyas te ɗiya gdeŋi li, a fiɗiɗi abakaiɗi askarai n'e fiɗi pai Yowas n'epini ɗa edi.

⁶ Amma a fiɗiɗi aliɗi nagai n'e fiɗiŋ ɗa kai, maini n'aŋ gaini ɗû war Ɗû na wiini Musus n'EPIƊ-ƊAI a gada midini ɓa: ɗif a fiɗiɗi tamai burini meefeŋ na wiiɗi aliɗi kai, e fiɗiɗi ali burini meefeŋ na wiiɗi tamaiɗi kaalai, ɗif paŋ a mra mini meefeŋni.

⁷ A fiɗiɗi ɗai na Edom dubu doogo edi war huduk zi manɗa, war hatam ɗa a tikiti Sela a siɗi yiki ɓa Yokteel, yiki ni ɗa a hina siɗi ɵa haa girna.

⁸ Nɵa Amasiyas a ɵina ɗai sini Yowas n'ahini Yowakaz n'ahini Yehu pai na Izrayel a miɗini: halasi edi ma hutumumu marmu.

⁹ Yowas pai na Izrayel a wiyini seŋ wiini Amasiyas pai na Yuda maini nɵa: mefeŋ ktai ɗa, duvuɗvuɗ na Liban a ɵina sini luwuŋ Sedre na Liban a miɗini: sitiŋa ahiku na muni aŋ tiki wiini ahiya ta. Amma wala na buza a halasi a vuga miɗini duvuɗvuɗ ɗa ɗaw, a saraŋ edi.

¹⁰ Aftini, ku rɗa amai midiɗi Edom ɗa ya, agulku te va gaini firiyi lai. Kola suku wiiku, amma sumnasi ahaku dam, ku niya war hatam n'a nufuku kai, na tuku gaiɗi ɗai na Yuda lai aga ki bi mini tiɓ buri maɗa?

¹¹ Amma Amasiyas a yima seŋni kai, Yowas pai na Izrayel, a hala edi mini e hitimi marɗi a Bet-Semes midini afti na Yuda.

¹² Ɗai na Izrayel e rɗi amai midiɗi ɗai na Yuda, ɗai na Yuda e pri edi, e wiyi aha war dalamɗi.

¹³ Yowas pai na Izrayel ɗa a yima Amasiyas n'ahini Yowas, n'ahini Akaziyas pai na Yuda kaai a hinaŋsi a Bet-Semes, asakal par a hala a Yeruzalem, a hûti ɵagai ɗa azumai haa hlai a za gobi kil miya puɗu, sini mini magala na wiini Efrayim par haa sini mini magala na wiini koŋni hlai ta.

¹⁴ A mula or gaini arzaŋ gaini wazagai n'e niviŋ amlai warni tempel ɗa paŋ, gaini na war godai na ahani pai ɗa, gaiɗi nagai n'e yimiɗi mini hatam ɗa, asakal par a waya aha war Samariya.

¹⁵ Labar na midini sdani Yowas n'a zaŋ, kurfukni na war hatam, gaini hatam n'a hitimaŋ gaini Amasiyas pai na Yuda ɗa, aŋ gaini ɗû war maktuɓ na wiiɗi paakai na Izrayel ɗa kai ɗi?

¹⁶ Yowas a mra, a hala gaiɗi tamaini, e piŋ a Samariya gaiɗi paakai na Izrayel. Yerobowam n'ahini a suma pai war balamni.

¹⁷ Amasiyas n'ahini Yowas pai na Yuda, a buza asakalni mrini Yowas n'ahini Yowakaz pai na Izrayel ɗa par buza doogo pi ɵim.

¹⁸ Labar na midini sdani Amasiyas ɗa aŋ gaini ɗû war maktuɓ na wiiɗi paakai na Yuda kai ɗi?

¹⁹ Warɗi Yeruzalem, ɗai e rgi warɗi aŋ zini meefeŋ, a pra edi a Lakis. E ɵini ɗai pini war Lakis e yimiŋ e fiɗiŋ.

²⁰ E libiŋsi gaini plasai, e piŋ a Yeruzalem gaiɗi tamaini war fuŋ n'abai na wiini David.

²¹ Ɗai na Yuda gaini hlaiɗi paŋ e tiki Azariyas war balamni, war hlai ni buzani a za doogo pi ɵaara.

²² Azariyas a rɗa amai midiɗi Elat a wiyitisi piɗi Yuda, a rgiti amai lai, asakalni na Amasiyas a hala gaiɗi tamaini ɗaw par.

Yerobowam n'ag'aŋ sulu pai na Izrayel

²³ War buza n'ag'aŋ doogo pi ɵim na Amasiyas n'ahini Yowas aŋ warɗi pai, Yerobowam n'ahini Yowas pai na Izrayel a suma pai war Samariya a buza warɗi pai buza doogo doogo puɗu pi ktai.

²⁴ A paya payai na meefeŋ wuzani arni EPIƊ-ƊAI, a hina tuwur na Yerobowam n'ahini Nebat a kiɗi ɗai na Izrayel woni aŋ ziŋ ɗa, ktai maa edi kai.

²⁵ A tikasi aftiɗi Izrayel war tiɗi gawɗi par a ni, a Lebo-hamat par war gal n'azumai par haa sini yem-ra n'abai na Araba war gal n'amai sek ɗa ta, maini n'EPIƊ-ƊAI, Alaw na wiiɗi Izrayel a muɗaŋ war mini ɗif na mini Alaw Yunas n'ahini Amittai na Gat-Hefer par.

²⁶ Buri EPIƊ-ƊAI a tala gir n'abai na aliɗi Izrayel e ɗi warni ɗa, ɗif nɵa n'a lûwiɗi ɗuwal aŋ kai, bege kaalai, kempe kaalai.

²⁷ EPIƊ-ƊAI a firiya a haza yikiɗi ɗai na Izrayel edi midini afti par kai, a piliɗisi edi gaini Yerobowam n'ahini Yowas.

²⁸ Labar na midini sdani Yerobowam n'a zaŋ, kurfukni na war hatam, hatam n'a hitimaŋ, mili n'a mulasi fuŋ n'abakai: Damaskus gaiɗi Hamat tiɗi Yuda par a wiyiŋɗi wiiɗi Izrayel lai ɗa, aŋ gaini ɗû war maktuɓ na wiiɗi paakai na Izrayel ɗa kai ɗi?

²⁹ Yerobowam a mra, a hala gaiɗi tamaini paakai na Izrayel. Sakariyas n'ahini a suma pai war balamni.