Lokwita n'ag'aŋ sulu na wiiɗi paakai 10 - Ɗû na sɗik na wiini Alaw

Yehu a vidiɗi pinzibani pai Akab edi

¹ Pinzibani Akab doogo doogo muguzak e ɗi fu aha warɗi Samariya. Yehu a ɗo letre wiiɗi n'abakai na wuzaɗi ɗai, n'abakai n'arbaɗi ɗai gaiɗi nagai n'e hitriɗi gadai wiiɗi aliyagoi lai maini nɵa:

² alini epin-gezaki ɗe e ɗa gaiki, tiki ki siɗiɗi, saretai ɗe aŋ tiki, plasai gaini wazagai zi gaw aŋ tiki lai, ki ɗa aha war fuŋ n'abai zi ɵaga lai, won hlai na ki niviti letre hanɗa li ɗa,

³ ki tili arbaɗi alini gaiɗi tiyakaini ɗa, n'arbaɗi na hangalni pɗem a suwa paŋ, n'a kiɗa a simiti pai ɗa, ki tikiŋ midiɗi Paramai na wiini epini ta, ki ɗiyi pini par gdaŋ ca.

⁴ E hûni gara, e miɗi arbaɗi marɗi: paakai sulu maa e ɗiyi mini kai, kapai tumu mu kuɗumu mu ɗiyumu mini maɵa maɵa ɗa?

⁵ Abaiɗi ɗai na ahani pai, abaini fuŋ n'abai, gaiɗi n'abakai n'arbaɗi ɗai gaiɗi nagai n'e hitri gadai wiiɗi aliyagoi lai, e ɵini sini Yehu e miɗini: tiyi miɗi ɗaiku, aga mi zi wala na ku miɗiyi gaini paŋ, tiyi aga mi tiki ɗif aŋ pai kai, za maini na ku dara nɵa.

⁶ Yehu a ɗûti letre zamai pra a miɗiɗi: na ɓa ki ɗa gaya, na ɓa ki ɵini ma lai ɗa, dawai ler maini hanɗa ɵa ɗa, ki hilisi sa a Yizreyel gaini humokɗi alini epin-gezaki tiki. Amma war sarti ni ɗa, pinzibani epingezaɗi na doogo doogo muguzak ɗa, e ɗi fu gaini ɓûrwi ahaɗi ɗai n'abakai na war Samariya ta ta kapai e wûliɗi amai war gadai na pɗem.

⁷ Won hlai n'e niviti letre hanɗa tar, e yimiɗi alini pai ɗa, e fiɗiɗi gaini hlaiɗi, e mili humokɗi war dologo, e ɵiniŋni wiini Yehu a Yizreyel.

⁸ Ɵeŋ ktai a halasi a miɗini wiini Yehu ɓa: e kisi humokɗi alini pai ɗa a na anene. Yehu a muɗa: ki piŋ midini marni tiɓ tiɓ sulu anene mini magala na wiini fuŋ n'abai ɗa par a fana woni sai gorof par.

⁹ Gorof par na hlai a sɗa edi li ɗa, Yehu a niyasi anene, a ɗiya wuzaɗi ɗai zaw a miɗiɗi: tiki ɗa, seŋ midiki kai, mu faka amai sini pai Yoram n'epin-geza, mu fuɗaŋ edi lai mu ta, amma nagai n'e ɗi na paŋ ɗa a fiɗiɗi edi ɗa asiya lai ɗa?

¹⁰ Ki yimiŋ midiki pɗem ɓa, seŋ ktai na mini EPIƊ-ƊAI par n'a muɗaŋ war mini ɗif na mini Alaw Eliyas sini pinzibani Akab n'aga a va amai kai aŋ kai.

¹¹ Yehu a fiɗiɗi pinzibani Akab n'e hini aha war Yizreyel ɗa paŋ edi, ɗaini n'abakai, marmakaini gaiɗi paakai zi ɓaka paŋ edi a hina ktai maa piɗi kai.

Yehu a fiɗiɗi n'abakai n'e ɵi wuzaɗi ɗai na war Yuda edi

¹² Yehu a faka aŋ hala a Samariya, warɗi futi won hlai n'a co a Bet-Eked na wiiɗi ɗai zi giɗimi farai,

¹³ Won hlai n'a nava gaiɗi zagalakaini Akaziyas pai na Yuda, a zilbiɗi ɓa: ki ɗi ɗai ma ɗa? E wiyini seŋ: tiyi mi ɗi zagalakaini Akaziyas, mi hili fu aŋ ɵiɓi wuti wiiɗi alini pai gaiɗi aliɗi Izabel muni n'amai n'amlai mini pai.

¹⁴ A muɗa: yimiɗi karɗi. Nagai e yimiɗisi karɗi, e fiɗiɗi edi mini kalaŋ na Bet-Eked. Pɵaɗi, ɗai doogo doogo puɗu pi sulu, ktai maa a pra edi piɗi kai.

Yehu a nava gaini Yonadab

¹⁵ Wuzani sek agwi, Yehu a nava gaini Yonadab n'ahini Rekab a n'a halasi arni sek. Yehu a ɵiɓini wuti a zilbaŋ: warku aŋ sa meefeŋ kai, maini na ta wara suku meefeŋ kai na ɵa tiɓ ɗi? Yonadab a wiyini seŋ: a na ɵa, Yehu a miɗini: na ɓa a na ɵa ɗa sa tuku. Yonadab a sini tini. Nɵa Yehu a tkaŋ amai gaini warni Saretni.

¹⁶ A miɗini: halasi gaya, tala kurfukŋa na burini EPIƊ-ƊAI ɗa. E hili piɗi marɗi war Saret na wiini Yehu.

¹⁷ Won hlai n'e cû war Samariya ɗa, Yehu a fiɗiɗi zagalakaini Akab n'e hini karɗi aha war fuŋ n'abai ɗa edi, a vidiɗi edi kafa, maini seŋ n'EPIƊ-ƊAI a muɗaŋ war mini ɗif na mini Alaw Eliyas ɗa nɵa.

Yehu a vidiɗi ɗai na mini alaw Baal ɗa edi

¹⁸ Yehu a tipiɗi ɗai na Samariya paŋ a miɗiɗi: Akab a hurga azumai wuzani alaw Baal sme, amma ta ɗa aga mu hurga azumai wuzani a suwa na wiini pra.

¹⁹ Tiyana ɗa, tipiɗisi ɗai na mini alaw Baal ɗa sa paŋ kafa, nagai n'e ɗa hûrgû azumai wuzani ɗa paŋ, paakaini zi ɓaka ɗa paŋ lai, ɗif a hinasi edi kai. Mu firiya mu za ɓaka n'abai wiini alaw Baal. Ɗif n'a halasi kai ɗa a nava ɗa a fiɗi n'edi. Kapai Yehu a za na ɗa a yel n'a vidiɗi ɗai n'e hûrgû azumai wuzani alaw Baal ɗa edi gaini.

²⁰ Nɵa Yehu a sa miɗi ɓa e yiki diŋgi n'abai burini alaw Baal, e yiki diŋgi hanɗa lai.

²¹ Yehu a ɵina ɗai edi midini afti na Izrayel ɗa paŋ, nagai n'e hûrgû azumai wuzani alaw Baal ɗa paŋ e hilisi kafa, ɗif a hinasi edi kai. E niyi amlai war tempel na wiini alaw Baal ɗa, tempel ɗa a va kiŋ.

²² Yehu a miɗini wiini ɗif na gɗamni sapa zi sda aŋ war tini ɗa, ɓa, miliɗisi sapa ɗa anene wiiɗi nagai n'e hûrgû azumai wuzani alaw Baal ɗa, a miliŋɗisi anene lai.

²³ Yehu gaini Yonadab n'ahini Rekab e cûsi amlai war tempel na wiini alaw Baal ɗa, e miɗiɗi wiiɗi nagai n'e hûrgû azumai wuzani ɓa: Ɵiɓi vulai siki pɗem tiɓ tiɓ haw, ki ɗi amlai na ɗa ki ɗi tiki taaha tiɓ ɗi, ɗai n'e hûrgû azumai wuzani EPIƊ-ƊAI e ɗa arbaki ɗi?

²⁴ Yehu gaini Yonadab e niyi amlai aŋ zi ɓaka zi ɵeɗ gaini ɓaka zi yi, kapai na ɗa a mula ka ɗai doogo doogo mitwis anene par ca ca, a miɗiɗi: ɗai hanɗa mu siɗi war tiki, ɗif n'a hina ɗif ktai arbaɗi par a pra edi li ɗa, ni aga a mra war balamni.

²⁵ Won hlai na Yehu a vadasi gaini zini ɓakani zi yi ɗa li, a sa futi siɗi askarai gaiɗi abakaiɗi ɗa buri e niyi amlai e fiɗiɗi edi kap, e hini ktai a prasi edi kai. E fiɗiɗi edi gaini kaɵkar. E libi kopoŋɗi edi war fuŋ n'abai ɗa par, e wiyisi e niyi haa amlai war hlai na sɗik na wiini tempel na wiini alaw Baal ɗa.

²⁶ E tikisi ahi-fuŋ z'alaw na gaini ɗiyi amai zaw ɗa amlai par war tempel na wiini alaw Baal ɗa e kiŋ anene, e biliŋ arni afu su.

²⁷ Asakal n'e tûûriŋ edi li, e hiɗi tempel ɗa mal azumai lai, war balamni ɗa, e ɓili waŋ zi fulai na wiiɗi ɗai paŋ woni tiɓ tiɓ, waŋ ni ɗa a hina woni ɵa haa girna.

Yehu, pai na Izrayel

²⁸ Yehu a vada alaw Baal ɗa edi warɗi Izrayel par maini na ɵa.

²⁹ Gaini hanɗa paŋ Yehu a hina meefeŋ na Yerobowam n'ahini Nebat a zaŋ ɗa edi kai, a kiɗi ɗai na Izrayel aŋ zi tuwur: e hûrgû azumai wuzani ali garakai zi or n'a na Betel gaiɗi Dan.

³⁰ EPIƊ-ƊAI a miɗini wiini Yehu: buri ɓa, ku za pɗem wuzani ara, ku za wala n'a firiya agula, ku za sini pinzibani Akab kal kal maini na mu firiyaŋ ɗa nɵa lai, buri hanɗa, pinzibaku ɗa, haa sini n'ag'aŋ puɗu ta, aga e simni midiɗi paramai zi pai na wiiɗi Izrayel.

³¹ Gaini hanɗa paŋ ɗa, Yehu ɗa a tika hangalni azumai aŋ za pini Ɗû na wiini EPIƊ-ƊAI, Alaw na wiiɗi Izrayel ɗa kai, a hina meefeŋ na Yerobowam a kiɗi Izrayel woni aŋ ziŋ ɗa edi kai.

³² War mefeŋ ni ɗa, EPIƊ-ƊAI a tika pini a ɗukla afti na wiiɗi Izrayel ɗa edi. A hinasi Hazayel pai na Siriya aŋ rɗa amai midiɗi, a tikasi aftiɗi na sini hagaɗi par paŋ.

³³ A tika aftiɗi na tini ra Yurdan piɗi futi na dawai par gaini na azumai par tiɗi Arower, ɵimani ra Arnon, afti na Galaad gaini na Basan n'e ɗi fu warni ɗa e ɗi pinzibani Gad, Ruben gaini Manase.

³⁴ Labarni sdani Yehu n'a zaŋ ɗa, gaini kurfukni na war hatam lai ɗa, aŋ gaini ɗû war maktuɓ na wiiɗi paakai na wiiɗi Izrayel ɗa kai ɗi?

³⁵ Yehu a mra, a hala gaiɗi tamaini, e piŋ a Samariya Yowakaz n'ahini a suma pai war balamni.

³⁶ Yehu a suma pai midiɗi Izrayel, a buza warɗi pai aha warɗi Samariya buza caaɓa pi mitwis.