1 Timotewus 6 - Ɗû na sɗik na wiini Alaw

Bagakai

¹ A juva ɓa nagai paŋ n'e ɗa aŋ bagakai e tiliɗi epin-gezakaiɗi maiɗi ɗai n'e kiɗi aŋ nivi kol nɵa, kapai ɗai e miisi yikini Alaw kai, e miisi hitrai ɗa kaalai.

² Nagai na epin-gezakaiɗi e ɗi ɗai zi yimi ɗa, aga e siɗi hormo kai buri ɓa e ɗi tawalakaiɗi ɗi ɗa, aga a za nɵa kai; amma aga e zini piɗi gaini futini, a suwa, buri ɗai na nagai e zini piɗi na ɗa e ɗi ɗai zi yimi, gaiɗi na zi diri gara lai. Hanɗa a wazagai n'aga ku hitraŋ edi, ku gada midini lai.

Hitrai n'a kata pin hunai na pin Alaw kai

³ Na ɓa ɗif a hitra hitri zamai, a za pin seŋ na sɗik na wiini Epiɗ-ɗaimu Yesu Kristu gaini hitri n'a kata gaini hunai na pin Alaw kaalai ɗa,

⁴ kûlûni-si a ŋulvaŋ tik, a sɗa wala ktai kai, a paya ɗa a sispai na rak rak gaini hiy na pin wala zi yiki, hanɗa a kasi sile gaini sispai gaini tirki, hiini na meefeŋ na midiɗi marɗi,

⁵ sispai n'a vada kai, arbaɗi ɗai na hiiniɗi a na ɗikat kai, e siɗi jre kai, n'e tili hunai na pin Alaw maini wala n'a kasi der nɵa.

⁶ A jre, hunai na pin Alaw ɗa a der n'abai gara. Na ɓa ɗif a tika hangalni ta sini wala n'aŋ tini ɗa.

⁷ Buri ɓa mu kumusi wala ktai tumu warɗi yai kai, aga mu tukumu wala ktai tumu kai ɵa lai.

⁸ Nɵa na ɓa mu ɗumu sumumu lai, mu wumu sumu lai ɗa, hanɗa a kuɗumu ta.

⁹ Amma nagai n'e rgi warɗi buri e bindi aŋ ɗai zi farai, e kɵi war tanai, war azaw, war hiini na maafanai viya zi wili ɗai edi, n'a ka ɗai war ɓilki n'edi gaini bi n'edi lai.

¹⁰ Buri dirini farai hanɗa a sirdaini meefeŋ paŋ, zamai n'e tiki mriɗi edi min ɗa, e wili edi gaigai sin yimi ɗa par, e wi siɗi kiiɗi dama war gir n'abai lai.

Gadai na Pawlus a siŋni wiini Timotewus

¹¹ Amma tuku, ɗif na wiini Alaw, ku pra edi sin wazagai hanɗa par, za jre-ɗikat, ku huna pin Alaw, ku ɗiya war yimi, ku sumna war diri, war siiki, gaini hangal.

¹² Ku hitima hatam na pɗem, na wiini yimi, yima suŋfa n'a vada kai, na ku yikasi sini, na ku za zaida na pɗem edi gaini muku wuzaɗi zaidakai viya lai.

¹³ Mu guduku wuzani Alaw n'a sa suŋfa wiini wazagai zi rgi paŋ, wuzani Yesu Kristu, n'a za zaida na pɗem edi gaini mini wuzani Pontius Pilatus,

¹⁴ gadai na ku navaŋ ɗa, ku yimaŋ pɗem, ku sumna hilu, ɗif a muɗa meefeŋ suku kai haa sin mefeŋ n'EPIƊ-ƊAI Yesu Kristu a siŋkasi sini edi gaglai,

¹⁵ Aga a siŋkaŋsi edi ɗa a Alaw war sarti n'aŋ gaini ɗiyi zaw ɗa, Ni ɗa a epini ɵeɗ, epini spak paŋ lai a Paiɗi paakai, a abaiɗi Epin-gezakaiɗi ɗai n'e ŋi paŋ lai

¹⁶ Ni na ktai n'a mra kai, n'a sumna war gaglai na ɗif a kiɗa sini kai na ɗf a talaŋ duk kai, a kiɗa a talaŋ kaalai sini Ni, kol gaini spak n'a vada kai. Amen.

Gadai siɗi zi farai

¹⁷ Ku gidiɗi zi farai na warɗi yai hanɗa buri aga e kûli siɗi kai, e tiki hiiniɗi miɗini farai n'a nafa kai ɗa kai, amma e tiki hiiniɗi miɗini Alaw n'a sumu wazagai paŋ abai, kapai mu firyumu gaini,

¹⁸ kapai e zi pɗem, e zi aŋ ɗai zi farai gaini sɗa na pɗamai, e ɓûrwi wazagaiɗi gaiɗi na zamai, e tipi siɗi amai gaiɗi ɗai paŋ.

¹⁹ Maini hanɗa nɵa aga e tipi farai pɗem ta aŋ godai buri mefeŋ na wuzamu sek, kapai e nivi suŋfa n'a vada kai na jre lai.

Miɗi n'asakal

²⁰ Tuku Timotewus, ku giɗima wazagai n'a sa war tuku, ku taɓa pin seŋ zi miɗi na baiya kadai n'a kata pin yimi kai ɗa kai, gaini sispai na wiini siɗi na jre kai

²¹ Zamai n'e yimi pini ɗa, e hini yimi ɗa edi. Yim na wiini Alaw a sumna gaiki.