1 Timotewus 5 - Ɗû na sɗik na wiini Alaw

Arni vok na kiini ta ta na wiiɗi ɗai zi yimi

¹ Ɗif na wel ɗa, ku ɓaraŋ gdaŋ kai, amma ku gdaŋ maini api nɵa, - gawlakai ɗa, maiɗi tawalakai nɵa,

² falakai n'abakai ɗa, maiɗi tamai nɵa, drakai ɗa maiɗi aliɗi-ami nɵa, war hilu.

Falakai na war greŋ

³ Ku siɗi hormo wiiɗi falakai na war greŋ, falakai n'e hini war greŋ jre jre ɗa.

⁴ Na ɓa muni na war greŋ aliɗi e ɗa, zaw tiyakaiɗi e ɗa ɗa, aga e hitri aŋ siŋki yimiɗi na pin Alaw edi aha war pakataiɗi dama avut, kapai asakal par ɗa e siɗi aŋ zi pɗem siɗi tamaiɗi lai, buri hanɗa a n'Alaw a firiyaŋ ɗa.

⁵ Muni na war greŋ jre jre ɗa, na te hina kiiɗi ktai ɗa, te pɵa na ɗa miɗini Alaw, te siika war siiwi duvuk gaini girvudi paŋ, te tuwa sini Alaw lai.

⁶ Amma na na te za pin dirini neŋ-si ɗa, t'aŋ gaini mri su, koo ɓa t'aŋ karɗi ɗi.

⁷ Aga ku gidiɗi maini nɵa, kapai nagai e simni gaini seŋ midiɗi kai,

⁸ Na ɓa ɗif a tika hangalni siɗi ɗaini kai, a suwa paŋ siɗi zagalakaini kai ɗa, a hina edi na ɗa a yimi ɗa tar. Meefeŋ na wiini ni ɗa a suwa ɗif n'a yima kai ɗa.

⁹ Kapai yikiɗi muni na war greŋ a ɗo azumai war maktuɓ ɗa, sai te muni na buzaɗi doogo doogo ɵaara ta amai sek, na te tika wus ktai pal,

¹⁰ na ɗai e zi zaida midiɗi burini sdaɗi na pɗamai ɓa: Te wûliɗi aliyagoi amai, te yimiɗi morkokoi siɗi, te ma eziɗi na sɗik edi, te zina piɗi nagai n'e ɗa war gir, te za sda na pɗamai paŋ.

¹¹ Amma falakai na war greŋ na drakai ɗa ku ɗûɗi azumai kai, buri ɓa won hlai na dirini neŋ-si a sipiɗi li edi sin Kristu par, e diri e tiki maɵagai,

¹² nagai e ki siɗi na ɗa miɗi sariya, buri e hini yimiɗi n'avut ɗa edi ta.

¹³ A ni ktai kai, e zi wala ktai kai, aŋ hitri siɗi ɗa e jugi min fuŋ ɗa yaw yaw, e zi kai ɗa a sɗa ktai kai, e ɓiki sariya gara, e wi siɗi war seŋ n'a tiliɗi kai ɗa, seŋ na zi miɗi kai ma e miɗiŋ wiiɗi tiɓ.

¹⁴ Nɵa firiyiŋa ɓa falakai na war greŋ, na drakai ɗa, e mili maɵagai, kapai e wii ali, e zi aŋ falakai n'e giɗimi dalamɗi, kapai gawmu a nava futi aŋ muɗa wala na meefeŋ siɗi kai.

¹⁵ Buri ɓa tiyana ɗa, zamai e wili edi, e tiki futi pin Satan ya.

¹⁶ Na ɓa muni zi yimi t'aŋ gaiɗi falakai na war greŋ war pinzibaɗi, aga te zina piɗi, kapai e hini aŋ guma miɗini tipi kai, kapai tipi a kiɗa a zina piɗi falakai na war greŋ jre jre ɗa.

N'abakai zi giɗimi tipi

¹⁷ N'abakai n'e giɗimi tipi gaini futini ɗa, aga e nivi vrak azi sulu, a suwa paŋ nagai n'e zi sɗa war ɓikini seŋ gaini hitri.

¹⁸ Buri ɗû a muɗa: aga ku nagga min ɵe won hlai n'a na giɵa wai ɗa kai. Ɗif zi sda ɗa a kiɗa aŋ nava vrakni lai.

¹⁹ Seŋ na ɗai e pin midiɗi n'abakai, ku yimaŋ kai, sai na ɓa ɗai n'e kisi seŋ hanɗa e zi sulu zaw hu ɗi.

²⁰ Nagai n'e zi tuwur ɗa, ku ɓiriɗi wuzaɗi ɗai paŋ, kapai na zamai ɗa e hûni lai.

²¹ Mu siiwuku wuzani Alaw, wuzani Kristu Yesu, wuzaɗi ɗai zi ɵeŋ na war fuŋ-n'Alaw, zi viri edi lai, buri aga ku za pini gadai hanɗa gaini hiini na meefeŋ muduku kai, gaini ɓraw arbaɗi ɗai kaalai.

²² Ku purma aŋ tika tuku midini ɗif kai, ku wa suku war tuwur na wiini ɗif kai, ku giɗima suku tuku dama hilu.

²³ Aga ku ca ɗa a yem kiini kai, ku ca vin agwi agwi lai burini warku n'a na fuɗuku gaini suku n'a na huwyuku kûreɗ-kûreɗ.

²⁴ Tuwur na wiiɗi ɗai zamai ɗa a na edi gaglai, ɗai e siɗiŋ maa wuzani hlai n'e ziɗi sariya kai hai, amma na wiiɗi ɗai na zamai ɗa, a siŋka edi asakal par.

²⁵ Nɵa lai, sɗa na pɗamai paŋ a na edi gaglai, n'a siŋka edi kai maa aga a siŋka edi lai.