1 Timotewus 1 - Ɗû na sɗik na wiini Alaw

Wuti

¹ Pawlus, apostel na wiini Kristu Yesu, pin miɗi na wiini Alaw, Ɗif-zi-kûri na wiimu, gaini Yesu Kristu, n'a biyi-na-pin-ɵeɗ na wiimu.

² Sin Timotewus, ahiya na jre war yimi. Alaw Api gaini Epiɗ-ɗaimu Kristu Yesu, e suku yum, hiinini haw gaini ɵeɗ lai.

Ki zi hangal gaiɗi ɗai n'e hitri hitri na jre kai

³ Maini na mu guduku, won hlai na ku hala war Makedoniya sek ɗa nɵa, buri ku sumna war Efesus, kapai ku gidiɗi ɗai zamai aŋ hitri hitrai na zamai kai.

⁴ Aŋ yimi labar na jreni aŋ kai gaini na wiini girini pinziba n'a pini a vada kai, n'a zina pin sispai kadai, a zina pin sdani Alaw n'a za war yimi ɗa kai.

⁵ Wala na gadai hanɗa a sa burini, a diri n'a halasi warɗi agul na hilu par, war hiini na pɗem par, war yimi na jre par lai.

⁶ Zamai n'e sili edi ɵimaɗi hanɗa ɗaw ɗa, e bindi e miɗi ɗa a seŋ n'a nafa kai

⁷ E firiyi e zi siɗi aŋ ɗai zi hitri gadai, e siɗi wala n'e miɗiŋ ɗa kaalai, n'e ɗiyi miɗini gdaŋ na ɗa maa e siɗiŋ kaalai.

Sdani gadai

⁸ Mu suɗumu edi gaglai ɓa gadai ɗa a wala na pɗem, na ɓa ɗif a za gaini woɗi futini ɗa.

⁹ Mu suɗumu ɓa gadai ɗa a za burini ɗif na jre ɗa kai, amma buriɗi nagai n'e zi pini gadai ɗa kai, gaiɗi na hiraŋai, n'e sini hormo wiini Alaw gaini wazagai na sɗik kaalai, n'e fiɗi tamaiɗi na maɵagai gaiɗi na falakai lai edi, n'e ɵiɓi belek,

¹⁰ ɗai n'e zi maɵara, n'e fini gaiɗi marɗi na maɵagai, n'e cikili bagakai, z'alasakai, n'e hi wala miɗi war eles, gaini wazagai zamai zamai paŋ n'a tapa gaini hitrai na jre ɗa kai,

¹¹ pin labar na pɗem na wiiɗi abai na wiini Alaw zi ɵeɗ, labar napɗem n'a sasi war ta aŋ sogom.

Sini tese na sini Alaw

¹² Mu sa tese n'abai gara sin ni n'a saŋa gdaŋ ya, Kristu Yesu Epiɗ-ɗai na wiimu, buri a ŋaŋa aŋ ɗif na jre war ɵeŋ,

¹³ paŋ ktai avut mu na ka mu ɗif na mu tirka Alaw, zi zi gir wiiɗi ɗai, zi kiri ɗai lai, amma Alaw a za yum sa buri mu za hanɗa war siɗi kai, buri yimi kai na wiya lai.

¹⁴ Nɵa, yum na wiini Epiɗ-ɗaimu a za sa abai gara gaini yimi, gaini diri na war Kristu Yesu.

¹⁵ Seŋ hanɗa a jre, ɗif a kiɗa aŋ yimaŋ gaini giriŋi kai ɓa: Kristu Yesu a halasi warɗi yai buri a kûriɗi na tuwarai, ta ɗa mu n'avut arbaɗi nagai hanɗa.

¹⁶ Amma sa ta ɗa Alaw a za yum, kapai gaya ta ɗa, Yesu Kristu a siŋka ziyini-seŋ na gaini hangal na wiini ɗa edi, aŋ wala zi siŋki buriɗi nagai n'aga e yimi warni, sin suŋfa n'a vada kai.

¹⁷ Kol gaiɗi abai sin Pai n'a vada kai, n'a mra kai, na ɗif a talaŋ kaalai, Alaw na ktai, haa hlai n'a vada kai, n'a vada kai. Amen.

Hitimi hatam na pɗem

¹⁸ Gadai na mu suŋku tuku ɗa, Timotewus, ahiya, pin miɗi na wiiɗi ɗai na min Alaw e miɗiŋsi a ɗipar muduku, ku ɗiya midini seŋ na wiiɗi ɗa, kapai ku hitima hatam na pɗem,

¹⁹ ku giɗima yimiku gaini hiini na pɗem lai, hiini hanɗa, zamai e hiniŋ edi, nɵa yimiɗi a buɗuha maini hulum n'a pa nɵa.

²⁰ Himenewus gaini Aleksander e ɗi arbaɗi ɗai hanɗa, mu siɗi edi tin Satan, kapai e gidi, a yima midiɗi lai ɓa ɗif a sɗa aŋ tirka Alaw kai.