1 Tesalonikekai 5 - Ɗû na sɗik na wiini Alaw

Ki simni gaini zizini buri gizini Epiɗ-ɗai

¹ Burini mefeŋ gaini hlai ɗa, tawalakai, jaaki buri ɓa ɗif a ɗoɗi siki kai.

² Buri ɓa tiki dama ki siɗi edi gaglai ɓa, mefeŋ na wiini Epiɗ-ɗai aga a halasi maini mihil na war duvuk nɵa.

³ Won hlai na ɗai e miɗi ɓa: Hlai paŋ ɵeɗ, wala na meefeŋ a sɗa aŋ za kai ɗa, war hlai ni ɓilki n'edi aga a luɓasi midiɗi tizaw tar, maini ŋiba na wiini pûkû n'a yimiti muni na te na ziya nɵa, aga e pri edi mini par kai zaŋ.

⁴ Amma tiki ɗa, tawalakai, ki ɗa war gegeŋ kai, kapai mefeŋ hanɗa a luɓasi midiki maini mihil nɵa kai.

⁵ Buri tiki paŋ ki ɗi alini gaglai, aliɗi girvudi, mu ɗumu aliɗi duvuk kai, alini gegeŋ kaalai.

⁶ Buri nɵa, aga mu kulumu weseŋ maiɗi na zamai nɵa kai, amma mu sumnumu karmu, mu sumnumo gaini ciini kai.

⁷ Buri nagai n'e kili weseŋ ɗa e kiliŋ duvuk, nagai n'e ciini ɗa e ciini duvuk lai.

⁸ Amma tumu n'aliɗi girvudi ɗa, mu sumnumu gaini ciini kai, wumu yimi gaini diri sumu aŋ safaya, pumu biyi na pin ɵeɗ na wiini kûri mudumu aŋ juki zi gaw lai.

⁹ Buri Alaw a rgumu ɗa burini hiy kai, amma kapai mu nuvumu kûri war Epiɗ-ɗaimu Yesu Kristu,

¹⁰ Ni n'a mra burimu, kapai koo ɓa mu ɗumu karmu ɗi, koo ɓa mu mrumu ɗi ɗa, mu sumnumu karmu gaini ni aŋ bonu.

¹¹ Nɵa ɗa, ki si arai zi pi wiiɗi marki arbaɗi marki, ki zini piɗi marki war wili n'amai, maini na ki ɗa ziŋ na ɗa ɵa.

Gadai n'asakal gaini ɵiɓini wuti

¹² Tiyana mi siiwiki, tawalakaya, buri ki siɗi hormo wiiɗi nagai n'e ɗa kiyi siɗi arbaki, n'e ɗa ɵi wuzaki war Epiɗ-ɗai, n'e ɗa gidiki lai.

¹³ Ki kuliɗi midiɗi amai abai, ki diriɗi lai, buri sdaɗi n'e ɗa ziŋ, ki simni ɵeɗ arbaɗi marki.

¹⁴ Tawalakai, tiyi mi siki arai zi ɓa ki gidiɗi nagai n'e ɵini gat kai ɗa, ki si arai zi pi wiiɗi nagai na hiiniɗi aŋ gai tûrli, zini piɗi na hurofai, ki yimi seŋ siki gaiɗi ɗai paŋ.

¹⁵ Ki zi hangal, ki wiyi meefeŋ miɗini meefeŋ kai, amma ki piyi aŋ zi pɗem kureɗ arbaɗi marki siɗi ɗai paŋ lai.

¹⁶ Ki firiyi kûreɗ-kûreɗ.

¹⁷ Ki siiwi kûreɗ-kûreɗ:

¹⁸ Ki zi tese kûreɗ-kûreɗ, hanɗa a wala n'Alaw a daraŋ siki par war Yesu Kristu;

¹⁹ Ki fiɗi afuni Seze kai,

²⁰ ki miisi seŋ na miɗi ɗai na min-Alaw par kai.

²¹ Ki fifiki wazagai paŋ, n'a na pɗamai ɗa, ki zi gaini.

²² Ki ɗili siki burini meefeŋ na maɗi maɗi paŋ.

²³ A juva ɓa Alaw zi ɵeɗ a ziki edi aŋ sɗik gaini midini dama, siki paŋ, sezeki paŋ, suŋfaɗi-agulki gaini amur-siki paŋ a sumna hilu, gaini seŋ midini kai, buri gizini Epiɗ-ɗaimu Yesu Kristu,

²⁴ Ni n'a yikikisi ɗa a jre, aga a za hanɗa a ni.

²⁵ Tawalakai, ki siiwi buriyi lai.

²⁶ Ki ɵiɓi wuti wiiɗi tawalakai paŋ gaini sisiɓini-mi na sɗik.

²⁷ Mu siiwiki war yikini Epiɗ-ɗai ɓa letre hanɗa te ŋa edi wiiɗi tawalakai paŋ

²⁸ Yum na wiini Epiɗ-ɗaimu Yesu Kristu a sumna gaiki.