1 Tesalonikekai 3 - Ɗû na sɗik na wiini Alaw

¹ Won hlai na mi tili haa dabarai na mi zi aŋ kir kai ɗa, a tala aryi pɗem ɓa mi simni kiiyi war Aten.

² Nɵa mi ɵiniɗi Timotewus na tawalyi, ɗif n'a za sda gaini Alaw war ɓikini labar na pɗem na wiini Kristu siki, kapai a siki gdaŋ, a iki arai zi pi lai war yimiki,

³ kapai ɗif a sɗa aŋ gigiɗa amai war gir n'a na za tiyana ɗa kai, buri ɓa tiki dama ki siɗi hanɗa ya, ɓa mi viri edi na ɗa buri hanɗa.

⁴ Won hlai na mi ɗisi ka ahaki, mi midiki wuzani hlai par ɓa aga mi siɗi gir, a cosi na ɗa a gir hanɗa, ki siɗiŋ ɵa lai.

⁵ Buri nɵa, won hlai na hlai a hala kir kai ɗa, mu ɵinaɗi Timotewus, buri a yimasi labarni yimi na wiiki, kapai Epin-tanai ɗa a tiniki kai, kapai sdaki ɗa a ba edi kadai kaalai.

⁶ Amma Timotewus a cosi ahaki par na ɗa tiyana, a kiyisi labar na pɗem miɗini yimi na wiiki, gaini diri na wiiki, gaini hiini na pɗem na midiki kûreɗ-kûreɗ, a miɗiyi ɓa ki firiyi ɓa sai ki tiliyi gaini arki, maini na tiyi mi ɗa piyi futi aŋ tilki gaini aryi na ɗa ɵa lai.

⁷ Nɵa tawalakai, arbani huwyi gaini gir n'aŋ siyi paŋ ɗa, tiyi mi nivi gdaŋ siki par, burini yimi na wiiki.

⁸ Nɵa ɗa, tiyana mi ɗa karyi, buri ɓa ki ɗa gdaŋai war yimiki na war Epiɗ-ɗai.

⁹ Tese na mi ɗa siŋ Alaw buriki buri firiyi na mi ɗa firiyi buriki wuzani Alaw na wiimu, miyi a sɗa aŋ muɗaŋ kai.

¹⁰ Duvuk gaini girvudi paŋ mi ɗa tuwi sini gara, buri a hiniyi futi aŋ tilki pra, aŋ vi wala n'a hina min yimiki ɗa amai lai.

¹¹ A juva ɓa Alaw Apumu gaini midini dama, gaini Epiɗ-ɗaimu Yesu e zizinitiɗi fui na wuzayi siki sek ɗa ta.

¹² A juva ɓa Epiɗ-ɗai a riya diri na ki diri arbaɗi marki gaini, gaini na ki diriɗi na zamai na zamai ɗa lai ɗa amai, a bundaŋ abai, maini na tiyi mi ziŋ siki ɗa nɵa.

¹³ A juva ɓa a sa gdaŋ warɗi agulki, kapai seŋ a za miɗini kai, sɗik wuzani Alaw Apumu war gizini Epiɗ-ɗaimu Yesu, gaiɗi na sɗik na wiini paŋ. Amen.