1 Samuwel 7 - Ɗû na sɗik na wiini Alaw

¹ Ɗai na Kiryat-Yearim e hilisi e tiki zunduk zi bonu na wiini EPIƊ-ƊAI, e kiŋ ahani Abinadab, amai midini boŋor ta, e tiki Eleazar n'ahini aŋ ɗif zi giɗimi zunduk na wiini EPIƊ-ƊAI.

Diŋgi na war Mitspa, ɗai na Izrayel e rɗi amai midiɗi Filistrekai

² Mefeŋ a za yaw, a ka buza caaɓa sek, haa sin mefeŋ na zunduk zi bonu na wiini EPIƊ-ƊAI a wayasi war Kiryat Yearim. Nɵa pinzibaɗi Izrayel paŋ e tiki piɗi e tuwi wuzani EPIƊ-ƊAI.

³ Samuwel a miɗiɗi wiiɗi aliɗi Izrayel gai hlaiɗi paŋ maini nɵa: Na ɓa ki wiyisi li sini EPIƊ-ƊAI gaiɗi agulki paŋ, na ɓa ki alawai n'edi par n'a na arbaki na ɗa, ki tikini pini li edi arbaki par, gaini alawai na falakai astarte lai, ki si siki wiini EPIƊ-ƊAI, ki zi ɵeŋni, ni kiini ktai lai ɗa, nɵa aga a pliki edi war tiɗi Filistrekai par.

⁴ Aliɗi Izrayel e vidi alawai Baal gaini alawai na falakai astarte ɗa edi arbaɗi par, e zi ɗa a ɵeŋni EPIƊ-ƊAI kiini ktai.

⁵ Samuwel a sa miɗi maini nɵa: Diŋgiɗisi aliɗi Izrayel paŋ war Mitspa; aga mu siiwa tin EPIƊ-ƊAI buriki.

⁶ E diŋgisi war Mitspa, e misi yem, e miŋ azumai wuzani EPIƊ-ƊAI. E tiki sai war mefeŋ ni ɗa, woni e miɗi lai ɓa: Mi zi meefeŋ sini EPIƊ-ƊAI! Samuwel a na fu aŋ gaŋgalaŋ zi spak arbaɗi aliɗi Izrayel war Mitspa.

⁷ Won hlai na Filistrekai e ɵini ɓa aliɗi Izrayel e diŋgi e ɗa a Mitspa ɗa, paakai na wiiɗi Filistrekai e hili aŋ hitimi gaiɗi Izrayel. Aliɗi Izrayel e ɵini labar hanɗa, hunai a na fu piɗi wuzaɗi Filistrekai ta.

⁸ Aliɗi Izrayel e miɗini wiini Samuwel, Ku doogo muku kai, ɗuula EPIƊ-ƊAI Alaw na wiimu, kapai a kurɗumu edi tiɗi Filistrekai par.

⁹ Samuwel a yima ahini adime na min fiyaw a za ɓaka zi yi gaini wiini EPIƊ-ƊAI. A ɗuula sini EPIƊ-ƊAI buriɗi Izrayel, EPIƊ-ƊAI a wiyini seŋ lai.

¹⁰ Won hlai na Samuwel a na za ɓaka zi yi wiini EPIƊ-ƊAI ɗa, Filistrekai e hilisi gobi gaiɗi aŋ hitimi gaiɗi ɗai na Izrayel. War mefeŋ ni ɗa, EPIƊ-ƊAI a hina faŋ a ɓiriɗi Filistrekai gdaŋ gara, hunai n'abai te yimiɗi. Aliɗi Izrayel e rɗi amai midiɗi.

¹¹ Ɗai na Izrayel e niyisi edi war Mitspa par e tiki futi piɗi Filistrekai, e fiɗiɗedi, haa azumai par piɗi Bet-Kar par agwi.

¹² Samuwel a tika ahi-fuŋ ktai a ɗiyaŋ arbaɗi Mitspa gaini fuŋ n'abai n'e yikiŋ ɓa “la Dent”, a sini yiki ɓa Eben Ezer, a waya edi ɓa Ahi fuŋ zi Zinai, gaini hiini na ɓa EPIƊ-ƊAI a zinasi pumu haa won na ta.

¹³ Woni par, Filistrekai e tiki siyer gamai, e wiyisi katawai midini afti na wiiɗi aliɗi Izrayel kir kai. EPIƊ-ƊAI a siŋka spakni edi siɗi Filistrekai ɵa haa sin mrini Samuwel ta.

¹⁴ Fuŋ n'abakai na Filistrekai e miliŋ piɗi Izrayel par ɗa e wiyi e miliŋsi kafa, a Ekron par haa a Gat, gaini afti na pini paŋ lai. Ɗai na Izrayel e tikisi aftiɗi edi tiɗi Filistrekai par. Ɗai na Izrayel gaiɗi Amoritekai e simni ɵeɗ gaiɗi marɗi.

¹⁵ Samuwel a na fu aŋ gaŋgalaŋ zi spak war Izrayel haa sin mrini ta.

¹⁶ Buza buza paŋ a hala a gunasi war Betel, war Gilgal gaiɗi Mitspa blaŋŋa blaŋŋa. Buri a za sariya war hlai na hu hanɗa paŋ a ni.

¹⁷ Asakal par a wayasi aha war Rama, buri ɓa dalamni ɗa aŋ woni, woni kaw a na ka a za sariya wiiɗi aliɗi Izrayel. A rga gûwiŋ zi ɓaka wiini EPIƊ-ƊAI woni tiɓ lai.