1 Samuwel 5 - Ɗû na sɗik na wiini Alaw

Zunduk zi bonu na wiini Alaw ahaɗi Filistrekai

¹ Filistrekai e tiki zunduk zi bonu na wiini Alaw, e tikiŋsi a Ebenezer par e kiŋ a Asdod.

² Filistrekai e tiki zunduk zi bonu na wiini Alaw, e kiŋ amlai warni tempel na wiini Alaw Dagon. E tikiŋ ɵimani Alaw dagon ta.

³ Dawaini ɗa, ɗai na Asdod e fikisi amai gorof par cup, e nivisi Alaw dagon gaini kɵi azumai su, arni gaini pi azumai midini afti tiɓ wuzani zunduk zi bonu na wiini EPIƊ-ƊAI, e tikiŋ e ɗiyiŋ amai war balamni zaw.

⁴ Dawaini pra e fiki amai gorof par cup, e nivisi Alaw Dagon gaini kɵi azumai su, arni gaini pi azumai midini afti wuzani zunduk zi bonu na wiini EPIƊ-ƊAI. Humokni Alaw dagon gaini tini na sulu paŋ gaini rɗi edi bak bak, azumai mini hlai ca, a hina ɗa a paɵani su.

⁵ Buri nɵa, paakai zi ɓaka na wiini dagon, gaiɗi nagai n'e ɗa e hili amlai warni tempel na wiini Dagon war Asdod ɗa, e vigi warni hlai na Dagon a kɵa warni, mini hlai ɗa kai.

⁶ EPIƊ-ƊAI a siŋka spakni edi siɗi ɗai a Asdod, a ɵiriɗi ɗai edi, a hinasi si zi hiliwi arbaɗi siɗi ɗai na war Asdod gaiɗi ɗai na midini aftini ɗawwa ɗa.

⁷ Won hlai na ɗai na Asdod e tili wala hanɗa e miɗi: zunduk zi bonu na wiini Alaw na wiiɗi Izrayel aga a sumna ahamu na kir kai, buri ɓa a na zumu gir gara. Tumu gaini Dagon na alawmu paŋ.

⁸ E yikiɗisi n'abakai na wiiɗi Filistrekai paŋ e zi diŋgi gaiɗi, e miɗi: zunduk zi bonu na wiini Alaw na wiiɗi Izrayel ɗa aga mu zuŋmu maɵa ɗa? E wiyi seŋ e miɗi: zunduk zi bonu na wiini Alaw na wiiɗi Izrayel ɗa a zogo a Gat. Nɵa e jûgûŋ woni lai.

⁹ Amma won hlai na e jûgûŋ a Gat ya, EPIƊ-ƊAI a siŋka spak edi siɗi ɗai na woni ɗa, hunai n'abai a yimiɗi. EPIƊ-ƊAI a hinasi veglek na wiini si zi hiliwi a ymiɗi, n'agogoi gaiɗi n'abakai paŋ.

¹⁰ Asakal par e ɵini zunduk zi bonu na wiini Alaw Ekron. Won hlai na zunduk zi bonu na wiini Alaw hanɗa a niyasi aha war Ekron, ɗai na Ekron e ɗûûli e miɗi: E kisi zunduk zi bonu na wiini Alaw na wiiɗi Izrayel ahamu na ɗa aŋ fuɗumu edi, tumu gaiɗi ɗaimu paŋ.

¹¹ E yikiɗisi abakai na wiiɗi Filistrekai paŋ, e zi diŋgi. E miɗi: zunduk zi bonu na wiini Alaw na wiiɗi Izrayel hanɗa, wiyiŋ warni balamni wai, kapai a fuɗumu edi gaiɗi ɗaimu kai. Buri war fuŋ n'abai ɗa paŋ hunai n'abai te yima ɗai; buri Alaw a siŋka spakni edi siɗi gara.

¹² Nagai n'e nivi mri kai, veglek na wiini si zi hiliwi a yimiɗi. Tuwi na wuzani gir ɗa a hala haa amai sini Alaw ta.