1 Samuwel 4 - Ɗû na sɗik na wiini Alaw

¹ Nɵa seŋ na wiini Samuwel a na fu buriɗi ɗai na Izrayel gai hlaiɗi paŋ. Aliɗi Izrayel e niyi edi aŋ hatam gaiɗi Filistrekai. E pi kaŋ na wiiɗi gobi gaiɗi Eben -Ezer, Filistrekai e pi na wiiɗi war Afek lai.

Filistrekai e rɗi amai midiɗi ɗai na Izrayel

² Filistrekai e giri siɗi min hatam wuzaɗi ɗai na Izrayel. Hatam a faka. Filistrekai e rɗi amai midiɗi ɗai na Izrayel, e fiɗi ɗai piɗi par gobi dubu puɗu, edi min hatam ɗa.

³ Ɗai e wiyisi aha war kaŋ, n'abakai n'arbaɗi ɗai na Izrayel e miɗi: EPIƊ-ƊAI a hiniɗi Filistrekai aŋ rɗi amai mudumu girna ɗa buri ma ɗa? Hulumu tukumusi zunduk zi bonu na wiini EPIƊ-ƊAI war Silo par, kapai a halasi arbamu a kurɗumu edi war tiɗi gawmu par.

⁴ Ɗai e ɵini ɗai war Silo, e tikisi zunduk zi bonu na wiini EPIƊ-ƊAI, EPIƊ-ƊAI zi spak paŋ n'a na amai midiɗi Kerubimmai paŋ. Hofni gaini Pinas alini Eli na sulu e ɗi fu gaini zunduk zi bonu na wiini Alaw lai.

⁵ Won hlai na zunduk zi bonu na wiini EPIƊ-ƊAI a cosi war kaŋ ɗa, ɗai na Izrayel ɗa paŋ e sûûri, afti a ziriya.

⁶ Won hlai na Filistrekai e ɵini suura hanɗa, e miɗi: Wala n'a za aha war kaŋ na wiiɗi Hebrekai ɗa a maɗa? Na kapai e suri viya maini hanɗa ɵa ɗa? E siɗi ɓa a cosi war kaŋ ɗa a zunduk zi bonu na wiini EPIƊ-ƊAI.

⁷ Filistrekai hunai a yimiɗi, e miɗi: Alaw a cosi aha war kaŋ ɗa ya, gir gara burimu, hlai ɗa aga a hala maini na ɗipar ɵa kir kai, haw gara burimu.

⁸ Gir gara burimu, n'aga a pulumu edi war tini Alaw zi spak gara hanɗa par ɗa asiya ɗa? A Alaw n'a hinasi gir viya midiɗi ɗai n'Egipte edi war basga na kaɗataŋ.

⁹ Ɗiyi gdaŋ, ɗiyi maɵagai tiki Filistrekai, ɵa kai ɗa, aga ki bindi aŋ bagakai na wiiɗi Hebrekai maini na nagai e ɗi ka aŋ bagakai mu ɵa. Ɗiyi maɵagai, hitimi.

¹⁰ Nɵa Filistrekai e fiki hatam gaiɗi ɗai na Izrayel, e rɗi amai midiɗi lai, ɗai na Izrayel ɗa e pri edi, e liwi aha war kaŋɗi, gaw te simiɗi gdaŋ gara haa askarai na wiiɗi Izrayel e mri dubu doogo doogo hu.

¹¹ Filistrekai e tiki zunduk zi bonu na wiini Alaw ɗaw, Hofni gaini Pinas n'alini Eli na sulu e nivi mri lai.

Mri na wiini pai zi ɓaka Eli

¹² Ɗif ktai na war pinzibani Benyamin par, a lawasi edi mini hatam par a cosi a Silo war yuvai ni dama, sapa na sini gaini ŋiriwi, miɗini paŋ a afti lai.

¹³ Won hlai n'a cosi, a navasi Eli midiɗi kursini dam ɵimaɗi futi aŋ baiya labar n'edi par buri a na fu war hunai burini zunduk zi bonu na wiini Alaw ɗa. Nɵa ɗif a halasi a sa labar hanɗa aha war fuŋ n'abai, ɗai n'aha war fuŋ n'abai ɗa paŋ e tiki piɗi e ɗûûli.

¹⁴ Won hlai na Eli a ɵina ɗuwal hanɗa, a zilba a muɗa: Suura hanɗa a suura na maɵa ɗa? Ɗif ɗa a gozasi aŋ sa labar hanɗa wiini Eli.

¹⁵ Eli ɗa, buzani a na fu doogo doogo ɵeeŋe pi mitwis, arni a hina kadai ca a tala wala kir kai.

¹⁶ Ɗif a miɗini wiini Eli: Mu halasi na ɗa edi mini hatam par, ta mu prasi edi mini hatam par na ɗa girna. Eli a zilbaŋ: Ahiya, hlai maɵa maɵa ɗa?

¹⁷ Ɗif n'a kasi labar ɗa a wiyini seŋ a muɗa: Ɗai na Izrayel ɗa e pri edi wuzaɗi Filistrekai yaw, gaw te simiɗi ɗaimu ɗa abai ta, Hofni gaini Pinas n'aliku na sulu ɗa maa e mri ca, zunduk zi bonu na wiini Alaw ɗe ɗai e tikiŋ ɗaw lai.

¹⁸ Yiki n'a yika zunduk zi bonu na wiini Alaw mini nɵa tar ɗa, Eli a kɵa gaini daŋdaŋaini midiɗi kurzini par gobi mini magalani fuŋ n'abai ɗa, pini jakni a luɓa, a mra lai. Buri ɓa a na fu a ɗif n'a za abai ta, gaini spak pini ta lai. A na ka aŋ gaŋgalaŋ zi spak aha warɗi Izrayel, a za sda hanɗa haa buza doogo doogo puɗu.

¹⁹ Suwulni na munini Pinas ɗa te na fu aŋ ziya, te ŋata aŋ puku lai. Won hlai na te ɵina ɓa ɗai e tiki zunduk na wiini Alaw ɗaw, ɓa suwulɗi gaini mofaɗi e mri ca lai ɗa, te goɓa azumai, te poko. Buri ɓa ŋiba hanɗa a niya siɗi gdaŋ gara.

²⁰ Won hlai na te ŋa ta aŋ mra ɗa, falakai n'e ɗi fu gaiɗi ɗa e miɗiɗi: Ku huna kai, ku wa ɗa a ahi na wus, amma te waya seŋ kai, te tika hiiniɗi sini seŋ hanɗa kaalai.

²¹ Asakal par te muɗa: Abai na wiini Alaw te zogo edi warɗi Izrayel par zok, nɵa te sini yiki wiini arwagwi hanɗa ɓa: Ikabod, a dara a muɗa: Abai t'aŋ kir kai. Te sa yiki hanɗa buri ɓa zunduk zi bonu na wiini Alaw e tikiŋ ɗaw, suwulɗi gaini mofaɗi e mri ca lai.

²² Te muɗa: Abai ɗa te zogo edi warɗi Izrayel par zok buri ɓa gawɗi e tiki zunduk zi bonu na wiini Alaw ɗaw.