1 Samuwel 26 - Ɗû na sɗik na wiini Alaw

Edi war basga na Zif: David dara a fuɗa Sawul kai pra

¹ Ɗai na Zif e hilisi sini Sawul war Gibeya. E miɗini: David aŋsi gai ŋûyi amai midini hlai na boŋor na Hakila, wuzani hlai zi kooloŋ ɗa.

² Sawul a tikiti futi pini, edi war basga na kaɗataŋ na Zif, gaiɗi askarai na Izrayel na tiɗi a pa azumai kai ɗa pini dubu hu, aŋ piyiŋ edi woni.

³ Sawul a pa kaŋ na wiini amai midini boŋor na Hakila, mini hlai na kooloŋ ɗa par tiɓ, gobi ɵimaɗi futi. David a sumna edi war basga na kaɗataŋ, won hlai n'a sɗa ɓa, Sawul a tikaɗi futi edi war basga na kaɗataŋ sek ɗa,

⁴ a ɵina ɗai aŋ tilisi hlai ɗa, a sɗa fakat ɓa Sawul a halasi ɗaw.

⁵ David a cosi war hlai na Sawul a pa woni ɗa. A tala hlai na Sawul gaini Abner n'ahini Ner, n'abaiɗi askarai na wiini e fini woni ɗa ŋa. Sawul a fana ɗa amlai arba, ɗai na gaini abaiɗi gai gûniŋ amlai gun.

⁶ David a zilba Ahimelek na Hitit, gaini Abisag n'ahini Seruya, na tawalni Yowab ɗa maini nɵa: Ɗif n'a dara a hala gaya war kaŋ haa aha sini Sawul ta ɗa siya ɗa? Abisag a muɗa: Ta aga mu hala gaiku.

⁷ Duvuk ɗa, David gaini abisai e hili arbaɗi askarai na wiini Sawul. Sawul a na fu azumai waŋ, weseŋ, amlai arba. Kawai na wiini gai ɓili azumai ɓal, ɵimani hlai na humokni woni sek ɗa gobi. Abner gaiɗi askarai ɗa edi par ɵimaɗi gunna lai

⁸ Abisag a miɗini wiini David: Girna Alaw a suku gawku li war tuku, mu siiwuku, hinaŋa mu ɓalaŋ azumai arni afti gaiɗi kawaiŋa nɵa ɓal ktai, mu waya pini aŋ haŋ azi n'ag'aŋ sulu kir kai.

⁹ Amma David a miɗini wiini Abisag: Ku fuɗaŋ kai. Ɗif n'aga a tika tini amai sini ni n'EPIƊ-ƊAI a ma emel n'e tiki ɗai war sda gaini, n'aga a nava seŋ kai ɗa asiya ɗa?

¹⁰ David a waya seŋ: Gaini EPIƊ-ƊAI jaŋ, hinaŋ a fuɗaŋ ɗa a EPIƊ-ƊAI gai miɗini, ɵa kai ɗa, mefeŋ ni a cosi li ɗa, a mra wiini, ɵa kai ɗe, a hala li edi min hatam ɗa, mri a navaŋsi woni lai.

¹¹ Duk kai zaŋ! EPIƊ-ƊAI a hinaŋa aŋ tika ta amai sini ɗif n'a varaŋ ɗaw ɗa. Tiyana ɗa, hala tikitisi kawai na te na azumai ɵimaɗi jak ɗa, gaiɗi agulai zi yem ɗa lai, hulumu wiimu!

¹² David a tikitisi kawai gaiɗi agulai n'a na azumai ca ɗa, e hili wiiɗi. Ɗif a siɗiɗi kaalai, ɗif a tiliɗi kaalai. Ɗif a ɵiya amai kaalai, buri gai hlaiɗi paŋ e ɗi fu weseŋ. Buri ɓa weseŋ n'abai n'a halasi sini EPIƊ-ƊAI par.

¹³ David a bundasi war gal hanɗa par, a ɗiyasi amai merfeŋɗi huwuŋ na ɵimaɗi par edi gaigai, arbaɗi gaini Sawul ɗa mogo agwi.

¹⁴ David a ɗûûliɗisi ɗai gaini Abner n'ahini Ner ɗa maini nɵa: Abner, wayaŋa seŋ haw! Abner a waya seŋ tuku k'asiya ɗa, na ku ɗuula ɵimani pai mai hanɗa ɵa ɗa?

¹⁵ David a miɗini wiini Abner: Tuku ku wus, a na ɵa kai ɗi? Aha war Izrayel ɗa, ɗif na maiku ɵa ɗa asiya ɗa? Ku giɗima pai n'epin-gezaku kai ɗa buri ma ɗa? Ɗif ktai a halaɗi aŋ fuɗaŋ edi koo!

¹⁶ Sdaku na ku zaŋ na ɗa, a futini kai. Gaini EPIƊ-ƊAI jaŋ, kadai tiɓ, buriki a fiɗi n'edi, buri ki giɗimi epin-gezaki kai, ni n'EPIƊ-ƊAI a varaŋ edi ɗa. Tiyana tala haw, kawai na wiini pai gaiɗi agulai na wiini zi yem n'a na ka amai midini ca ɗa aŋ wata ki ɗi?

¹⁷ Sawul a siɗa ɓa a wulani David a muɗa: David, ahiya, a wulaku tiɓ ɗi? David a waya seŋ: A wula tiɓ: Jaamus, epin-geza.

¹⁸ A muɗa pra: Ku tika futi pa ɗa buri ma ɗa? Na mu za ɗa a ma ɗa? Na mu zaŋ aŋ meefeŋ ɗa a ma ɗa?

¹⁹ Tiyana ɗa, Jaamus, epin-geza, za barka, ɵina seŋŋa ɗa: Na ɓa a fukukusi amai sa na ɗa a EPIƊ-ƊAI ɗa, hinaŋa mu zini ɓaka n'a ɵiɗitini agulni azumai. Na ɓa e zukusi puku na e ɗi ɗai ɗa, tusa a sumna midiɗi wuzani arni EPIƊ-ƊAI, buri ɓa girna e ɗa birgiŋa, e hinaŋa aŋ za fuŋ midini afti na EPIƊ-ƊAI a saŋ aŋ bulum wiiɗi ɗaini ɗa kai. E firyi na ɗa ɓa mu hala wiya, mu za ɵeŋni alawai na zamai.

²⁰ Amma ta ɗa, mu firya ɓa mu mra edi gaigai wuzani arni EPIƊ-ƊAI par kai. Buri ɓa pai na Izrayel a niyasi edi pa ta, na mu nafa wala ktai kai ɗa, na maini tenɗe ɵa, maini ɗif n'a birgiti mahaw amai midini huwuŋ nɵa. A za ɵa buri ma ɗa?

²¹ Sawul a muɗa: Mu za tuwur, wayasi sa David ahiya! Aa mu za wala na meefeŋ suku kir kai, buri ɓa duvuk na ɗa, suŋfaŋa a na fu wuzani arku aŋ wala na wûrini caŋ gara. Sda na mu zaŋ paŋ na ɗa, mu zaŋ na ɗa maini ɗif zi dûûli nɵa. Mu wula edi a suwa pɗemni.

²² David a waya seŋ a muɗa: Kawai na wiini pai ɗa te na, ktai arbaɗi ɗaiku a halasi a tikitiɗi.

²³ EPIƊ-ƊAI aga a sa sini asiya ɗi paŋ, pin jreni, pin ɗikatni. Buri ɓa girna ɗa EPIƊ-ƊAI a suku war ta ta. Amma mu firya mu tika ta amai sini ɗif n'EPIƊ-ƊAI a varaŋ ɗa kai.

²⁴ Na ɓa girna suŋfaku tuku a tala ara ta aŋ wala na caŋ gara ɗa, na wiya ta aga tala arni EPIƊ-ƊAI nɵa lai, aga a kurɗaŋa edi min gir paŋ par.

²⁵ Sawul a miɗini wiini David: Alaw a ɓukuku, David ahiya! N'aga ku zaŋ paŋ ɗa, a ɵa edi war pɗem paŋ. David a hala wiini, Sawul a waya aha sek lai.