1 Samuwel 16 - Ɗû na sɗik na wiini Alaw

Samuwel a tika David aŋ pai midiɗi Izrayel

¹ Mefeŋ ktai, EPIƊ-ƊAI a miɗini wiini Samuwel: Kapai suku aŋ tuwa miɗini Sawul ɗa ɵa haa kaswa ta ɗa? Ta mu blaŋ edi su, aga a suma pai midiɗi Izrayel kir kai. Viti amiyoki na wiiku gaini emel ta, hala. Mu ɵinuku ahani Isai na Betlehem par, buri ɓa mu nava pai na mu firyaŋ ɗa a na arbaɗi alini.

² Samuwel a muɗa: Mu siɗa aŋ hala woni maɵa maɵa ɗa? Na ɓa Sawul a ɵina li ɗa aga a fuɗaŋa. EPIƊ-ƊAI a muɗa: Ku yimiti ahi ɵai n'agunai puku kaai, ku muɗa ɗa ɓa: mu hala na ɗa aŋ za ɓaka wiini EPIƊ-ƊAI.

³ War zini ɓaka hanɗa, ku yikasi Isai ɗa ta, ta dama aga mu suŋkuku wala n'aga ku zaŋ ɗa, ɗif na mu suŋkuŋku li ɗa, aga ku mini emel midini.

⁴ Samuwel a za wala n'EPIƊ-ƊAI a miɗiŋni ɗa, a hala war Betlehem. N'abakai n'arbaɗi ɗai e hilisi sini, gaini ziriyi n'abai e zilbiŋ e miɗi: Hili na ku halasi na ɗa jam tiɓ ɗi?

⁵ A waya seŋ a muɗa: Jam kadai, mu halasi ɗa aŋ zini ɓaka wiini EPIƊ-ƊAI. Zi siki edi sɗik kapai ki hiliɗi gaya war zini ɓaka lai.

⁶ Won hlai n'e cû, a tala Eliyab tar ɗa a hiina ɓa: Hanɗa a ni n'EPIƊ-ƊAI a varaŋ aŋ pai ɗa mal mal.

⁷ Amma EPIƊ-ƊAI a miɗini wiini Samuwel, ku tala sini juf na wiini amur-si kadai kai, sin wûlini n'amai mogo zaw ɗa kaalai. Mu vara ɗa a ni kai. Mu tala ɗa a wala na ɗif a talaŋ ɗa ta kai, ɗif a tala ɗa a wala n'a na arni juf ɗa, amma ta EPIƊ-ƊAI mu tala ɗa a wala n'amlai warɗi agul.

⁸ Isai a yikasi Abinadab, a kaŋsi wuzani Samuwel, amma Samuwel a muɗa: EPIƊ-ƊAI a vara ɗa a ni kai ɗaai.

⁹ Isai a yikasi Samma, Samuwel a muɗa: EPIƊ-ƊAI a vara ɗa a ni kai ɗaai.

¹⁰ Isai a yikiɗisi alini muguzak wuzani Samuwel paŋ, Samuwel a miɗini wiini Isai: EPIƊ-ƊAI a vara ktai arbaɗi nagai hanɗa kai.

¹¹ Asakal par Samuwel a miɗini wiini Isai, aliku zamai n'agogoi e ɗi kai ɗi? Isai a miɗini: Na ktai n'agwi a na, a hala aŋ giɗima haakai. Nɵa Samuwel a miɗini wiini Isai: Ɵina ɗif pini tiyana tar aŋ yikaŋsi, a cosi kai ɗa, mu kuɗumu aŋ sumnumu azumai aŋ simi simi zi ɓaka hanɗa kai.

¹² Isai a ɵina pini David. David ɗa a wa mekele kriŋ, arni a tala juf, wa juf gara lai. EPIƊ-ƊAI a miɗini wiini Samuwel, faka amai! Mini emel midini kiɗi! Hanɗa a ni.

¹³ Samuwel a tikiti amiyoki z'amel na wiini ɗa, a mini emel midini, wuzani arɗi tawalakaini paŋ. Sin mefeŋ ni par, Seze na wiini EPIƊ-ƊAI a sumna miɗini David. Asakal par, Samuwel a waya war Rama.

David a za sda wuzani Sawul

¹⁴ Seze na wiini EPIƊ-ƊAI a yima sini edi sini Sawul par, EPIƊ-ƊAI a ɵinasi seze ktai na meefeŋ a huwyaŋ gara.

¹⁵ Ɗai zi sda na wiini Sawul e miɗini: Seze na meefeŋ n'a na huwyuku na ɗa a na sini EPIƊ-ƊAI par,

¹⁶ Epin-gezayi, miɗiyi seŋ ktai, tiyi ɗaiku zi sda mi biyi na ɗa tuku. Aga mi piyisi ɗif ktai n'a sɗa ɵiɓini gaŋgraŋ ya, mi kiŋsi ta, nɵa won hlai na seze na meefeŋ a faka li aŋ huwyuku, ni aga a ɵiɓa gaŋgraŋ ɗa, kapai hangalku a tika azumai.

¹⁷ Sawul a miɗiɗi: Piyiŋasi ɗif n'a sɗa ɵiɓini gai futini, ki kiŋasi.

¹⁸ Ktai arbaɗi ɗaini zi sda a miɗini: Mu tala ahini Isai na Betlehem par ktai, a sɗa ɵiɓini gai futini gara. A ɗif zi hatam n'agulni a huna kaalai, a muɗa seŋ yel gara lai. A ɗif n'a juva gara, EPIƊ-ƊAI a na gaini lai.

¹⁹ Sawul a ɵina ɗai sini Isai aŋ miɗini: Ɵinaŋasi David n'ahiku, n'a na giɗima haakaiku ɗa.

²⁰ Isai a yima ablehö, a mula peŋ duɓani, kene kene zi vin ktai gaini ahi hek ktai lai, a ɵina David n'ahini gaini aŋ siŋni wiini Sawul.

²¹ Won hlai na David a co ɗa, a siŋka sini arni Sawul. Sawul a daraŋ gara, a bundaŋ aŋ ɗif n'a luba wazagai zi hatam na wiini lai.

²² Sawul a ɵina ɗai sini Isai aŋ miɗini maini nɵa: Za barka, hinaŋa David gaya, buri mu firyaŋ gara.

²³ Won hlai na seze na meefeŋ a halasi miɗini Sawul ɗa, David a tika gaŋgraŋni ɗaw, a ɵiɓaŋ. Sawul hangalni a waya a tika azumai agwi, a tala sini marya, seze na meefeŋ ɗa a niya edi sini par lai.