1 Samuwel 12 - Ɗû na sɗik na wiini Alaw

Miɗi n'asakal na wiini Samuwel

¹ Samuwel a miɗiɗi wiiɗi aliɗi Izrayel: Seŋ na ki miɗiŋa paŋ mu yimaŋ, mu tika pai midiki ta.

² Tiyana ɗa, pai n'aga a ɵa wuzaki ɗa a na. Ta ɗa mu za wel gara ta, ayir na murɗek sa kir kai. Aliya ɗa e ɗa gaiki, ta ɗa, mu ɵa wuzaki gaini agwiŋa par, haa tiyana.

³ Mu kaya su, na ɓa ɗif seŋni a na gaya ɗa, a kasi seŋni wuzani EPIƊ-ƊAI, wuzani ɗif n'e mi emel midini ɗa lai. Mu yima ɗa a ɵai na wiini asiya ɗa? Zaw a ablehö na wiini asiya ɗa? Ɗif na mu siɗini gir arni ɗa asiya ɗa? Ɗif na mu bajaŋ ɗa asiya ɗa? Ɗif na mu yima katu tini par kapai mu dogo ara miɗini meefeŋ na wiini ɗa asiya ɗa? Miɗiŋa kapai wala na mu tikaŋ tiki par ɗa, mu siŋki edi.

⁴ E miɗi: Ku ziyi gir aryi kai, ku biziyi kai, ku yima wala tini ɗif ktai par kaalai.

⁵ A miɗiɗi pra: EPIƊ-ƊAI a zaida n'arbamu, ɗif n'emel a ma midini ɗa, a zaida girna lai, ɓa ki nivi wala ktai ta par kai kai ɗi? Ɗai e miɗi: A zaida lai.

⁶ Nɵa Samuwel a miɗiɗi wiiɗi ɗai: A vara Musus gaini Aaron ɗa a EPIƊ-ƊAI, a miliɗisi tamaiki edi war egipte par a ni lai.

⁷ Nɵa tiyana ɗa ɗiyi pɗem, mu dara mu za sariya gaiki wuzani EPIƊ-ƊAI, pin wala n'EPIƊ-ƊAI a zaŋ gaiki war jre, siki tiki gaiɗi tamaiki ɗa.

⁸ Won hlai na Yakob a cosi war Egipte ɗa, tamaiki e tûwi si EPIƊ-ƊAI, EPIƊ-ƊAI a ɵinasi Musus gaini Aaron, e miliɗisi tamaiki edi war Egipte par, e kiɗisi e simni won na.

⁹ Amma midiɗi a wula gaini EPIƊ-ƊAI, Alaw na wiiɗi, ni a siɗi edi war tini Sisera, abaiɗi askarai na wiini Hatsor, tiɗi Filistrekai, tini pai na Mowab lai, e hitimi gaiɗi.

¹⁰ E tûwi sini EPIƊ-ƊAI ɓa: Mi zi tuwur, mi hini EPIƊ-ƊAI edi mak, mi zi ɵeŋ na wiini alawai Baal gaini alawai na falakai Astarte, tiyana kûriyi edi tiɗi gawyi par, kapai mi zi ɵeŋ na wiiku.

¹¹ EPIƊ-ƊAI a ɵinasi Yerub-Baal, a ɵinasi Bedan, Yefte gaini Samuwel lai. A kurɗikisi edi tiɗi gawki n'e gûniki azumai ɗa par, asakal hanɗa ki simni ɵeɗ lai.

¹² Asakal par, won hlai na Nahas, pai na wiiɗi Amoritekai a cosi li miikiɗa, ki miɗiŋa ɓa tiyi mi firyi pai midiyi ta lai, paŋktai pai na wiiki ɗa a EPIƊ-ƊAI Alaw na wiiki.

¹³ Tiyana ɗa, pai na tiki ki viriŋ ɗa a na, na ki piyiŋ ɗa, EPIƊ-ƊAI a siki pai ktai midiki ta.

¹⁴ Na ɓa ki sini hormo li wiini EPIƊ-ƊAI, na ɓa ki ɗa zi ɵeŋ na wiini, na ɓa ki ɵini mini, na ɓa ki bili edi sini gadai n'EPIƊ-ƊAI a siŋki ɗa kai ɗa, aga ki tikiti futi na wiini Alaw na wiiki, tiki gaini pai n'a na midiki ɗa.

¹⁵ Amma na ɓa ki ɵini mini EPIƊ-ƊAI kai, ki yimi gadai na miɗiŋki ɗa kaalai ɗa, EPIƊ-ƊAI aga a siŋka spakni edi siki maini n'a siŋkaŋ edi siɗi tamaiki ɗa nɵa.

¹⁶ Tiyana ɗa, ɗiyi pɗem, tili wala n'abai n'EPIƊ-ƊAI a dara a zaŋ wuzani arki.

¹⁷ Girna mu ɗumu na ɗa war hiɗi kai ɗi? Aga mu siiwa EPIƊ-ƊAI aga a hinasi faŋ n'abai a ɓara a ɵa lai.

¹⁸ Samuwel a siiwa EPIƊ-ƊAI yivai ni he, EPIƊ-ƊAI a hinasi faŋ n'abai a ɓara, a ɵa lai, hunai n'abai a yimiɗi ɗai wuzani EPIƊ-ƊAI gaini Samuwel.

¹⁹ Ɗai e miɗini wiini Samuwel: Siiwa EPIƊ-ƊAI na wiiku buriyi, tiyi na ɗaiku ɗa, kapai mi mri kai, buri ɓa, sini tuwuryi n'a na ta ɗa, mi tikisi ka piyi na mi piyi pai ɗa mini ta pra.

²⁰ Samuwel a miɗiɗi wiiɗi ɗai: Ki hûni kai, tiki ki zi meefeŋ hanɗa paŋ, amma ki hini EPIƊ-ƊAI edi kai, ki zi ɵeŋni EPIƊ-ƊAI gaiɗi agulki paŋ.

²¹ Ki hiniŋ edi kapai ki diŋgi gaini wala n'a nafa kai ɗa kai, na der ktai warni kai, a kurɗa ɗif edi kaalai ɗa kai, buri ɓa a wala n'a nafa kai.

²² Burini Yikini n'abai ɗa, EPIƊ-ƊAI aga a hiniɗi ɗaini edi kai, EPIƊ-ƊAI a firya ɓa a ziki aŋ ɗai na wiini.

²³ Aga mu hina siiwi na buriki mak, kapai mu za tuwur arni EPIƊ-ƊAI ɗa kai zaŋ. Mu dara mu hitritiki futi na pɗemi, na ɗikat.

²⁴ Tiki ɗa, sini hormo wiini EPIƊ-ƊAI, ki zi ɵeŋni war jre, gaiɗi agulki paŋ: Mili arki sini wazagai n'abakai n'EPIƊ-ƊAI a zaŋ gaiki ɗa.

²⁵ Amma na ɓa ki zi meefeŋ li ɗa, tiki gaini paiki paŋ, gaw aga te miliki.