1 Samuwel 1 - Ɗû na sɗik na wiini Alaw

Anna te siiwa tini EPIƊ-ƊAI war tempel na Silo

¹ Ɗif ktai a na ka war Ramatayim-Sofim midini hlai zi huwuŋ na wiini Efrayim, yikini Elkana a ahini Yeroham n'ahini Elihu, n'ahini Tohu, n'ahini Sup na war Öfrata par,

² falakaini sulu, na ktai yikiɗi ɓa Anna, na te gaŋ sulu yikiɗi ɓa Penina. Penina te wa ali, amma Anna te wa kai.

³ Buza buza paŋ, Elkana a halaɗi war fuŋ n'abai ɗa amai a Silo aŋ hurga azumai wuzani EPIƊ-ƊAI zi spak ɗa paŋ, aŋ zini ɓaka lai. Alini Eli na sulu Hofni gaini Pinas e ɗi fu woni aŋ paakai zi ɓaka na wiini EPIƊ-ƊAI.

⁴ Mefeŋ na Elkana a za ɓaka li ɗa, a sa neŋ wiiɗi Penina gaiɗi aliɗi na maɵagai gaiɗi na falakai lai,

⁵ amma wiiɗi Anna ɗa, a siɗi neŋ na pɗem a suwa buri ɓa a diriti gara, koo gaini n'EPIƊ-ƊAI a siɗi ali kai na ɗa paŋ.

⁶ Penina, muni na ktai ɗa te yiva aŋ ɓilkiɗi hiiniɗi ɵa, buri ɓa EPIƊ-ƊAI a ziti muɗaŋ ta.

⁷ Buza buza paŋ won hlai n'a na zaŋ maini hanɗa ɵa. Hlai paŋ na Anna te hala amai war dalam na wiini EPIƊ-ƊAI ɗa, Penina te ɓilkiɗi agulɗi maini hanɗa ɵaaŋa ɵaaŋa. Nɵa te tuwa, te dara te suma kai.

⁸ Elkana na mofaɗi a miɗiɗi: Anna ku tuuwa buri maɗa? Ku suma kai ɗa buri maɗa? Agulku a kwima ɵa buri maɗa? Buriku ɗa, mu suwa ali na viya kai ɗi?

⁹ Asakal n'e simi ya, e ci ya lai ɗa war Silo ɗa, Anna te faka amai. Pai zi ɓaka Eli a na fu gaini simni azumai midiɗi kurzini ɵimani luwuŋ n'e pi porte na mini tempel na wiini EPIƊ-ƊAI azumai gaini ɗa.

¹⁰ Anna te na fu warni kwimi n'abai gara, te siiwa tini EPIƊ-ƊAI, te tuuwa abai gara lai.

¹¹ Te za ɵinini-ha wiini EPIƊ-ƊAI te muɗa: EPIƊ-ƊAI zi spak paŋ, na ɓa ku tala hawŋa li, ku saŋa seyem li wiya ta na bagaiku ɗa, aga mu sini ahi hanɗa wiini EPIƊ-ƊAI haa sini mrini ta, ɗif aga a faɗa ayir na midini ɗa edi kai.

¹² Won hlai na te na siiwa tini EPIƊ-ƊAI wuzaɗi sek ɗa, Eli a mula arni sini miɗi ca.

¹³ Anna te muɗa seŋ gaiɗi agulɗi, miɗi a muguza amma seŋ na te muɗaŋ ɗa a wasi edi kai. Eli a hiina ɓa t'aŋ gaini ciini su.

¹⁴ A miɗiɗi: Aga ku sumna warni ciini hanɗa haa kaswata ɗa? Hala vada sul n'arku edi warni hlai zamai.

¹⁵ Anna te wiyini seŋ: Epin-geza, ta ɗa mu muni na haw, amma m'aŋ gaini ciini kai, mu ca vin kaalai, sul zamai kaalai, mu tuwa na ɗa wuzani EPIƊ-ƊAI.

¹⁶ Ku yimaŋa ta na bagaiku maiɗi muni na hangalɗi meefeŋ ɵa kai, mu muɗa seŋ viya na ɗa burini gir na t'aŋ sa gaini hiiniŋa n'a tuura ɗa.

¹⁷ Eli a wiyiɗi seŋ: Hala gaini ɵeɗ, a juva ɓa Alaw na wiiɗi Izrayel a suku wala na ku zilbaŋ tini paŋ.

¹⁸ Te miɗini: Ta mu bagai na wiiku, a juva ɓa mu nava yum wuzani arku haa kureɗ. Asakal par te waya aha, te suma, arɗi a bunda a tala kiini gaini n'avut ɗa.

¹⁹ E fiki amai gorof, asakal n'e hûrgû azumai wuzani EPIƊ-ƊAI ya, e wiyi ahaɗi war Rama. Elkana a fana gaiɗi Anna na munini, EPIƊ-ƊAI miɗini a kɵa gaiɗi.

Wi na wiini Samuwel gaini hlai n'a na agwi hai

²⁰ Haa sini vidini buza ɗa, te tika fel, te wa ahi na wus, te sini yiki ɓa Samuwel, buri te muɗa: Mu zilbaŋ ɗa tini EPIƊ-ƊAI par.

²¹ Asakal par Elkana na mofaɗi a hala amai a Silo gaiɗi pakataini paŋ aŋ za ɓaka na war buza ɗa wiini EPIƊ-ƊAI, aŋ za wala n'a za ha midini lai.

²² Amma Anna te hala gaini kai, buri te miɗini wiini mofaɗi ya ɓa: Won hlai na mu ɗala ahiyagwi li edi mini fiyaw par ɗa aga mu kaŋ amai a ɗiya wuzani EPIƊ-ƊAI, a hinasi woni ɵa gamai.

²³ Ekana na mofaɗi a miɗiɗi: Za maini na ku dara nɵa, hina ka wiiku haa won hlai na ku cakaŋ li edi. Hina EPIƊ-ƊAI a va seŋni ɗa amai. Nɵa muni te hina ka dam, te sini fiyaw mini ahiɗi haa sini mefeŋ na te cakaŋ edi ta.

²⁴ Won hlai na te cakaŋ edi li, Te hala gaini amai warni tempel, te mula garakai piɗi hu, avudi sak ɗaw, vin koloŋ ɗaw lai. Te kaŋ amai warni tempel na wiini EPIƊ-ƊAI war Silo, arwagwi a na fu agwi gara.

²⁵ E fiɗi gari ɗa su, e ki ahiyagwi sini Eli.

²⁶ Anna te muɗa: Lapiya, Epin-geza, gaiku tuku zaŋ, ta mu muni na mu na ka gaiku won na aŋ siiwa tini EPIƊ-ƊAI.

²⁷ Mu siiwa ɗa ahi na wus hanɗa, EPIƊ-ƊAI a saŋa wala na mu siiwaŋ tini ɗa.

²⁸ Tiyana ta ɗa mu siŋni wiini EPIƊ-ƊAI n'a na zilbaŋ ta lai. Aga a sa edi aŋ wiini EPIƊ-ƊAI haa sini dibini suŋfani. Asakal par e hûrgû azumai won hlai hanɗa wuzani EPIƊ-ƊAI.