1 Peter 5 - Ɗû na sɗik na wiini Alaw

Gadai siɗi n'abakai n'e giɗimi tipi

¹ Buri nɵa, n'abakai n'arbaki, ta maiɗi n'abai, na mu tala gir na wiini Kristu gaini ara, na bri na wiya aŋ warɗi abai n'aga te siŋkasi edi lai, mu siiwiki ɓa:

² Ki giɗimi fara na wiini Alaw n'a sa war tiki, ki tiki hangalki sini, maini na war dewele nɵa kai, amma war diri maini n'Alaw a firiya nɵa, burini vrak kai, amma maini n'agul te dara nɵa.

³ Aŋ ŋa midiɗi nagai n'e si war tiki, maiɗi epin-gezakaiɗi nɵa kai, amma maiɗi ɗi na fara a tala siɗi par nɵa.

⁴ Nɵa won hlai n'epin-gezani adumai n'abai ɗa a siŋkasi sini edi li, aga ki niviti bogorai, na wiiɗi abai, na te ɓilka edi kai.

⁵ Tiki gawlakai nɵa lai, ki ɵini piɗi n'abakai, tiki paŋ aga ki simni war hûsini-si arbaɗi marki, buri Alaw a bula edi siɗi n'e kûli siɗi, a za yum siɗi nagai n'e hûsi siɗi.

⁶ Ki wiyi siki azumai piɗi ti zi spak na wiini Alaw, kapai a yiimiki amai war sartini na cosi li ɗa.

⁷ Ki tiki hiiniki paŋ miɗini, buri a na tika hangalni siki.

⁸ Ki simni gaini hangal, ki simni karki, mat na gawki a na guna blaŋ maini gurnai nɵa a na nuuma, a paya asiya asiya ɗi paŋ n'a sɗa aŋ lumaŋ.

⁹ Ki bili edi sini, ki ɗiyi gdaŋ war yimi, buri ki sɗi ɓa gir na maini hanɗa ɵa, a na za sɗi tawalakaiki n'e ɗa warɗi yai lai.

¹⁰ Won hlai na ki siɗi gir li agwiya ɗa, Alaw na wiini yum, n'a yikikisi siɗi abai na wiini na te vada kai, war Yesu Kristu, ni dama aga a viki amai war pɗem, aga a siki gdaŋ, wala a sɗa aŋ migiziki kaalai.

¹¹ spak paŋ a wiini haa hlai n'a vada kai, n'a vada kai. Amen.

Ɵiɓini wuti n'asakal

¹² Seŋ na mu ɗoŋɗi siki aŋ siki arai zi pi, aŋ siŋkiki lai ɓa ki ɗi na war yimi na jre, na wiini Alaw lai ɗa a ɗoŋaɗi na ɗa a Silvanus, na mu talaŋ ara aŋ tawal na jre.

¹³ Tipi na war Babilon na zi viri edi, maiki tiki nɵa nɵa, e ɗa ɵiɓiki wuti, gaini Markus n'ahiya lai.

¹⁴ Ki ɵiɓi wuti wiiɗi marki arbaɗi marki, gaini sisiɓini-mi zi diri. Tiki paŋ, na ki ɗa war Kristu ɗa, ɵeɗ a sumna midiki.