1 Peter 4 - Ɗû na sɗik na wiini Alaw

Payai na hehe na wiini ɗif zi yimi

¹ Buri nɵa, Kristu a sɗa gir war neŋ-si, tiki lai, ki wi hiini hanɗa siki, buri asiya ɗi paŋ n'a sɗa gir li war neŋ-si ɗa, arbani a ɓurwa li gaini tuwur.

² Kapai a za ɗa pin dirini ɗif kir kai, amma pin diri na wiini Alaw, won hlai n'a na karni war neŋ-si agwi hai.

³ Buri ɓa war mefeŋ n'a vuga ɗa, ki zi diriɗi ɗai n'e siɗi Alaw kai ɗa gara ki piyi war zini maɵara, war suuna, war ciini na gaini sul, war simi na viya n'a suwa pɗemni, war seŋ zi vilimi gaini hûrgû n'azumai wuzani alawai na kadai, war hihir.

⁴ Tiyana won hlai n'e tili ɓa ki ɗa tipi gaiɗi war sdaɗi na meefeŋ n'e ziŋ ɗa kai, e bindi hiyak, e tiki piɗi e miɗi seŋ na meefeŋ midiki lai.

⁵ Nɵa aga e miɗi edi gaini miɗi miɗini sdaɗi wuzani Alaw n'a dara aziti sariya wiiɗi na karɗi gaiɗi zi mri lai.

⁶ Labar na pɗem a ɓaka a ɓaka haa siɗi zi mri ɗa, burini hanɗa nagai e niviti sariya ɗa pin sdaɗi, miɗi ɗai na doogo ɗa nɵa, war neŋ-si, amma tiyana ɗa e kiɗi e simni karɗi maini n'Alaw a dara nɵa, war seze.

Zi giɗimi na pɗamai na wiini like n'Alaw a saŋ

⁷ Dibini wazagai paŋ a ŋasi gobi, buri nɵa, ki piyi gaini yel gaini hangal kapai ki kiɗi ki siiwi.

⁸ Amma abai paŋ, ki diri marki pɗem, buri diri a doogo tuwur viya.

⁹ Ki ymiɗi marki siki gani ŋûriyi kai.

¹⁰ Hina ɗif paŋ a zina piɗi marni na zamai gaini like zi yum n'a navaŋ ɗa, nɵa aga ki bindi aŋ ɗai zi giɗimi na pɗamai na wiini yum n'Alaw a saŋ kiini kiini.

¹¹ Na ɓa ɗif a ɓaka seŋ ɗa aga a ɓakaŋ maini na ɓa a seŋ na wiini Alaw nɵa, na ɓa a za sda zi zinai ɗa, aga a zaŋ gaini gdaŋ n'Alaw a siŋni ɗa, kapai war wazagai paŋ Alaw a nava kol war Yesu Kristu, ni n'abai gaini spak paŋ a wiini haa hlai n'a vada kai n'a vada kai. Amen.

Ɵeɗ miɗini ni n'a sɗa gir burini Kristu

¹² Tiki zi diri gara, ki bindi hiyak burini afu na gir n'a na ya arbaki buri a tetemiki kai, mai na ɓa a za siki a wala na woɗi futini kai nɵa kai.

¹³ Amma ki firiyi buri ki nivi bri na wiiki war gir na wiini Kristu, kapai ki firiyi, ki vi gaini firiyi n'abai won hlai n'aga a siŋkasi sini edi warɗi abaini.

¹⁴ Na ɓa ɗai e tirkiki buri yikini Kristu ɗa, ki firiyi faini firiyi, buri seze n'abai, seze na wiini Alaw aŋ midiki.

¹⁵ Amma hina ɗif ktai arbaki a sɗa gir buri ɓa a ɗif zi ɵiɓi belek zaw a ɗif zi mihill kai, buri ɓa a za meefeŋ zaw, a wa sini war seŋɗi marni nɵa kai.

¹⁶ Amma na ɓa a sɗa gir buri ɓa a ɗifni Kristu ɗa, aga a za siyer buri hanɗa kai, aga a kola Alaw gaini kûli burini yiki hanɗa.

¹⁷ Hlai na sariya te tika piɗi gaiɗi ɗai na wiini Alaw ɗa a cosi ya, na ɓa a tika pini gaimu ɗa, dibi na wiiɗi nagai n'e diri e yimi labar na pɗem na wiini Alaw kai ɗa, aga a za maɵa ɗa.

¹⁸ Na ɓa ɗif na jre ɗa a kora gaini gir ɗa, ɗif na meefeŋ gaini ɗif na tuwur aga e zi maɵa ɗa?

¹⁹ Nɵa ɗa, nagai n'e ɗa siɗi gir, pin diri na wiini Alaw, e si siɗi war tini ni n'a rgiɗi n'a na jre-ɗikat, e hili wuzaɗi gaini sɗa na pɗamai lai.