1 Peter 3 - Ɗû na sɗik na wiini AlawSimni na wiini wus gaiɗi muni 1 Falakai, tiki nɵa lai, ki ɵini piɗi maɵagaiki, kapai na ɓa zamai e ɗa n'e diri e ɵini pini seŋ kai kaw ɗa, aga e yimi pin payaiki, koo ɓa ki miɗi seŋ siɗi kai ɗi, 2 won hlai n'e tili li sdaki na hilu, na zi hormo lai ɗa. 3 A juva ɓa gan na wiiki a juva anene war amur-si kadai kai, maini ayir zi tirɗi zaw wazagai zi gan zi or zaw sapa na juvai nɵa kai. 4 Amma aga a za ɗa a gan n'amlai warɗi agul, na wiini ɗif n'amlai, a wala zi gan na ɓilka edi kai, na wiini seze zi hangal, zi ɵeɗ, hanɗa a wala n'a tala pɗem gara wuzani arni Alaw. 5 Falakai na sɗik na ɗipar n'e biyi tini Alaw ɗa, e zizini siɗi maini hanɗa nɵa, e gidi piɗi maɵagaiɗi. 6 Maiɗi Sara te gada pini Abraham, te yikaŋ lai ɓa epingezaɗi, won hlai na ki zi pɗem, ki bindi aŋ aliɗi na falakai, ki hini hunai ktai maa a tûrliki amai kai. 7 Maɵagai, tiki nɵa lai, ki simni gaini hangal, gaiɗi falakaiki war ɵeŋ n'arbaɗi marki, ki yimiɗi falakaiki maini wala na gdaŋni abai gara kai nɵa, ki kuliɗi midiɗi amai, buri ɓa nagai lai, e mili bulum zi suŋfa gaiki; kapai wala ktai a ɗala siiwaki kai. Gadai miɗini diri 8 Na mu vada gaini ɓa: A juva ɓa hiiniki a tapa ktai, ki tili hawɗi marki, ki diri diri zi tawal arbaɗi marki, ki zi pɗem siɗi marki, ki simni warni hûsini-si. 9 Ki wiyi meefeŋ miɗini meefeŋ kai, tirki miɗini tirki kaalai, amma ki ɓiki, buri Alaw a yikikisi ɗa sini hanɗa, kapai ki nivi ɓiki aŋ bulum. 10 Na ɓa ɗif a dara suŋfa a dara a tala mefeŋ na pɗem lai a giɗimiti alsini burini meefeŋ a giɗima mini burini rhai lai. 11 Hina meefeŋ edi, za pɗem ɗa, paya ɵeɗ ɗa, tika futi pini lai. 12 Buri Epiɗ-ɗai arni aŋ midiɗi ɗai na jre, ɵimani aŋ gai jigi jak aŋ ɵina siiwaɗi lai; amma arni Epiɗ-ɗai aŋ gaini bindi edi pla siɗi nagai n'e zi meefeŋ ɗa. 13 Na ɓa ki piyi aŋ zi pɗem siɗi ɗai gaiɗi agulki paŋ ɗa, n'aga a ziki meefeŋ ɗa asiya ɗa? 14 Amma ɓa ki nivi gir burini jre-ɗikat ɗa, ki firiyi gaini firiyi, ki hûni wala n'e ɗa huniŋ ɗa kai. Ki tûrli amai kaalai. 15 Amma warɗi agulki ɗa, ki zi Kristu n'EPIƊ-ƊAI ɗa edi aŋ sɗik, ki simni gaini zizini kureɗ aŋ muɗa edi wuzani asiya asiya paŋ n'a zilbiki miki miɗini biyi-na-pin-ɵeɗ n'aŋ warki. 16 Amma aga ki zi hangal gaini hormo gaini hiini na pɗem lai kapai nagai n'e pi seŋ midiki war jre kai, pin wala ktai kai gaiɗi nagai n'e tirki payaiki na pɗem war Kristu ɗa, siyer a yimiɗi. 17 Ku sɗa gir buri ɓa ku na za pɗem ɗa, pɗem a suwa na ku za meefeŋ ɗa, na ɓa Alaw a dara ɓa a za suku mai hanɗa ɵa ɗa. Sini mrini Kristu par haa sini rɗini n'amai 18 Buri ɓa Kristu gaini midini dama a sɗa gir azi ktai burini tuwur Ni na meefeŋni aŋ kai, buriɗi na maafanai, kapai a kiki sini Alaw. A nava fiɗi n'edi war neŋ-si, amma war seze a bunda karni. 19 Gaini seze hanɗa, a hala a ɓaka seŋ, sini seze n'aŋsi warɗi daŋgai. 20 Siɗi nagai na ɗipar e diri e ɵini kai, won hlai n'Alaw a na ziya seŋ gaini hangal hai ɗa, war mefeŋ na Nowa, a na zizina arken, na ɗai viya kai, mitwis kadai e kûrɗi edi arni yem par ɗa. 21 Hanɗa a wala n'a na siŋka miɗini baptisme n'a na kurumu tiyana, baptisme hanɗa a tika selte na wiini neŋ-si edi kai, amma a ɗiyi na ɗif a ɗiya midini yiki n'Alaw a yikaŋsi gaini hiini na hilu, war ɵiyi n'amai na wiini Yesu Kristu, 22 n'a hala amai war hlai n'amai, n'a sumna war hlai zi hormo na wiini Alaw, na ɗai zi ɵeŋ na war fuŋ n'Alaw, n'abakai na zi spak paŋ e ɗa azumai pini. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon