1 Peter 1 - Ɗû na sɗik na wiini Alaw

Ɵiɓini wuti

¹ Peter, apostel na wiini Yesu Kristu, siɗi zi viri n'edi n'e ɗa aŋ jak, -war Pontus, war Galatiya, war Kapadokia, war Asiya, war Bitiniya lai.

² N'Alaw Api a yikiɗisi li, wuzani hlai par, war zi-n'edi aŋ sɗik na wiini Seze, burini ɵinini-gat, gaini yimini fel na wiini Yesu Kristu. A juva ɓa yum gaini ɵeɗ a sa siki abai a suwa.

Kol sin Alaw n'a kûrɗiɗi ɗai zi yimi

³ Kol sini Alaw, Epini Epiɗ-ɗaimu Yesu Kristu, na pin yumni n'abai, a wuumu hehe pra, war ɵiyi-n'amai na wiini Yesu Kristu arbaɗi zi mri par, kapai mu nuvumu biyi na pin ɵeɗ,

⁴ sin bulum n'a ɓilka edi kai, na gaini didiɓi kai, na juvni a ba kai, n'aŋ war gɗam amai war fuŋ-n'Alaw buriki, aŋ wiiki tiki

⁵ n'Alaw a na giŋmiki warni spakni, pin yumni, sin kûri n'a ŋa gobi aŋ siŋkasi edi war mefeŋ n'asakal.

⁶ Nɵa, aga ki vi gaini firiyi, koo ɓa tiyana ki ɗa war kwimi buri titimi zamai zamai n'a na za siki buri hlai n'agwi ka ɗi ɗa, a juva ɓa a za ɗa ɵa.

⁷ Kapai ɗa yimiki na gai titimi tam, na pɗemni a suwa or n'afu a tetemaŋ ya, n'a ɓulka edi ɗa, aga a za aŋ wala zi kol, z'abai, gaini hormo lai, won hlai na Yesu Kristu aga a siŋkasi sini edi ɗa.

⁸ Tiki ki tiliŋ ka duk kai, paŋ ktai ki diriŋ, tiyana kaw, ki ɗa tiliŋ kai, amma ki tiki yimiki miɗini, nɵa lai ki vi gaini firiyi na min ɗif a sɗa aŋ muɗaŋ kai. Gaini firiyi n'abai gara,

⁹ Aga ki nivi wala na ki yimi burini ɗa, a dara muɗa Kuri na wiini suŋfaɗi agulki.

Ɗai na min Alaw gaini kûri

¹⁰ Kuri hanɗa ɗai na min Alaw, n'e miɗi edi miɗini yum n'Alaw a saŋ siki ɗa, e piyi aŋ tiili ezini edi, aŋ fifiki pini edi lai.

¹¹ E piyi aŋ sɗi sarti gaini wazagai n'a aga a za, na seze na wini Kritu n'a na warɗi a muɗa miɗini ɗa, seze n'a muɗa wuzani hlai par miini gir na wiini Kristu gaiɗi abai n'a t'aŋsi asakal hanɗa par lai.

¹² Alaw a yimiŋɗi midiɗi ɓa: Seŋ n'e miɗiŋ edi na ɗa, a na buriɗi nagai dama kai, amma a wiiki, tiyana nagai n'e ɓiki labar na pɗem ɗa, e midiki seŋ hanɗa edi, gaini spak na wiini seze sɗik, n'Alaw a ɵinaŋsi amai war fuŋ n'Alaw par. Ɗai zi ɵeŋ na war fuŋ n'Alaw maa e diri e sɗi ezini seŋ hanɗa edi lai.

Payai gaini wili n'amai na wiiɗi alini Alaw

¹³ Buri nɵa, ki simni karki war hiiniki, ki simni gaini hangal, ki tiki hiiniki midini yum na Yesu Kristu aga a saŋ siki won hlai n'a siŋkasi sini li edi.

¹⁴ Maiɗi ali n'e zi pin gadai nɵa, aga ki tiɓi pini diriki n'avut, maini na ki ɗi ka warni, war siɗi kai ɗa nɵa kai.

¹⁵ Amma maini ni n'a yikikisi ɗa a na sɗik nɵa, nɵa tiki lai aga ki simni sɗik war payaiki paŋ.

¹⁶ Buri ɗû a muɗa: Aga ki simni sɗik, buri ta, mu na sɗik.

¹⁷ Na ɓa ki yiki aŋ epiki ni n'a za sariya wiini asiya asiya ɗi paŋ pin sdani sdani, gaini ɓraw kai ɗa, nɵa aga ki piyi war hunai, won hlai na ki ɗa war jak.

¹⁸ Buri tiki ki sɗi ɓa, e wirikisi edi warni payaiki n'a nafa kai, na ki niviŋ sɗi tamaiki par ɗa, gaini wazagai n'a kiɗa a ɓulka edi maini or gaini arzaŋ nɵa kai,

¹⁹ amma gaini fel na caŋ gara, na wiini Kristu, na maini na wiini ahiɗi adumi na tirki sini kai, na gaini bili ɓulok kai lai nɵa.

²⁰ A varasi avut par, wuzani piɗi yai zi tiki par, amma a siŋkasi sini edi war dibini hlai buriki,

²¹ tiki na burini ni, ki yimi war Alaw, Ni n'a ɵiyaŋ amai arbaɗi zi mri par, a sitini abai ɗa lai, -kapai yimi na wiiki gaini biyi-na-pin-ɵeɗ na wiiki a na ɗa war Alaw.

²² Maini na tki ki zi siki edi hilu gaini ɵeŋki na pin jre, kapai ki zi diri arbaɗi tawalakai, gaini rhai kai, ki diri marki arbaɗi marki abai gara, gaiɗi agul na muɗukwi.

²³ Buri ɓa tiki ki wii li pra, war seyem n'a purkuɗuma kai, amma war seyem n'a sɗa aŋ purkuɗuma kai, war seŋ na wiini Alaw, n'a na karni, n'a sumna haa kureɗ.

²⁴ Buri ɓa, neŋ-si paŋ a na maini evek ɵa, kol na wiini paŋ a na maini cifiyini evek ɵa. Evek a huula, cifiyini a kɵa edi lai.

²⁵ Amma seŋ na wiini Epiɗ-ɗai a na ɵa haa hlai n'a vada kai. Seŋ hanɗa a labar na pɗem na a ɓaka siki.