1 Korintekai 3 - Ɗû na sɗik na wiini AlawƊai na wiini Kristu na gai wili amai kai hai 1 Tawalakaya, ta ɗa mu kiɗa aŋ muɗa siki maini na siɗi ɗai na war seze nɵa kai, amma maini siɗi ɗai na war neŋ-si nɵa, maini siɗi akoɗokokai na war Kristu nɵa. 2 Mu siki ɗa a fiyaw, mu siki simi na gdaŋ kai, buri ɓa gdaŋki a kiɗa aŋ yimaŋ kai, kaw tiyana kaw, gdaŋki a kiɗa a yimaŋ kai ɵa, 3 buri ɓa ki ɗa war neŋ-si hai. Buri won hlai na ɓa sile gaini sispai a na arbaki ɗa, ki ɗa na ɗa war neŋ-si kai ɗi? Ki piyi na ɗa maiɗi ɗai doogo waŋ kadai ɵa lai kai ɗi? 4 Na ɓa ktai a muɗa ɓa: Ta mu wiini Pawlus, na zamai ɓa: Ta mu wiini Apolos ɗa, ki zi ɵa na ɗa a seŋ na wiiɗi ɗai murɗakai kai ɗi? Ɗai zi sɗa na wiini Alaw 5 Apolos ɗa asiya ɗa? Zaw, Pawlus ɗa asiya ɗa? E ɗi ɗai zi sda, n'e kikisi tiki war yimi. Asiya asiya paŋ n'arbaɗi a za pin like n'EPIƊ-ƊAI a saŋ sini ɗa lai. 6 Ta mu pa luwuŋ azumai, Apolos a ma yem pini, amma n'a wulaŋ amai ɗa a Alaw. 7 Buri nɵa, n'abai a suwa ɗa, a ni n'a pa luwuŋ azumai ɗa kai, a ni n'a ma yem pini kaalai, amma a Alaw n'a wulaŋ amai ɗa. 8 Ni n'a pa luwuŋ gaini ni n'a ma yem pini ɗa, e ɗi nagai ktai, amma asiya ɗi paŋ aga a nava vrak na wiini pin sdani n'a zaŋ ɗa. 9 Buri ɓa tiyi mi ɗi ɗai na mi zi sɗa gaini Alaw, tiki ɗa, ki ɗi vowai na wiini Alaw, ki ɗi dalam zi rgi na wiini Alaw lai. 10 Pin yim n'Alaw a zaŋ sa, mu tora ezini dalam azumai ɗa maini ɗif zi rgi dalam na yel nɵa, ɗif zamai aga a rga amai midini. Amma asiya asiya paŋ aga a tika hangalni sini wala n'a dara a rgaŋ amai midini ɗa. 11 Ɗif zamai aga a tora ezini dalam azumai pra kir kai, sai a na ktai n'aŋ gai tûrû hanɗa, a dara muɗa Yesu Kristu. 12 Nɵa ɗif a kiɗa a rga amai midini tûrini dalam hanɗa gaini or, zaw gaini arzaŋ, zaw gaini ali-fuŋ na wûrini caŋ gara, zaw gaini luwuŋ, zaw gaini evek, zaw gaini brogo. 13 Sdani ɗif paŋ aga a siŋka edi, buri mefeŋ zi sarya ɗa aga a siŋkaŋ edi, aga a siŋkasi edi ɗa arni afu par, pɗemni sdani ɗif paŋ aga a siŋkasi edi sai won hlai n'afu a tetemaŋ tam haw. 14 Ɗf na sdani afu a yaŋ edi kai ɗa aga a nava vrak. 15 Ɗif n'afu a ya sdani li ɗa, aga a nava wala kai. Ni gaini midini dama aga a kora sme, amma maini arni afu par nɵa. 16 Tiki ki siɗi ɓa ki ɗi tempel na wiini Alaw kai ɗi? Seze na wiini Alaw a sumna warki lai, ki siɗi ɵa kai ɗi? 17 Na ɓa ɗif a ɓilka tempel na wiini Alaw edi, Alaw aga a ɓilkaŋ edi lai, buri ɓa tempel na wiini Alaw a na sɗik, tempel hanɗa ki ɗi tiki. Wazagai paŋ a wiiki, amma tiki ki ɗi wiini Epiɗ-ɗai 18 Hina ɗif a rha sini gaini midini dama kai, na ɓa ktai arbaki a tala sini ba a na yel gara, pin yel na wiiɗi yai hanɗa, a pɗem ɓa a za sini aŋ ɗif zi dûûli, kapai a za aŋ ɗif zi yel. 19 Buri ɓa yel na wiiɗi yai hanɗa, a dûûli wuzani arni Alaw. Buri aŋ gai ɗû maini nɵa: A yimiɗi na yalakai war yel na wiiɗi dama. 20 Zamai pra: Epiɗ-ɗai a sɗa hiini n'aŋ warɗi ɗai na yalakai ya, a sɗa ɓa a na digai kadai. 21 A pɗem ɓa ɗif a kola, sini burini ɗif na maini kai, buri ɓa wazagai paŋ a wiiki, 22 Koo ɓa Pawlus, kaw Apolos, kaw Kefas, zaw duniya, kaw ɓa suŋfa zaw ɓa a mri, kaw ɓa wazagai n'a na za girna, zaw na dawai wuzamu sek, hanɗa paŋ a wiiki; 23 amma tiki ɗa ki ɗi wiini Kristu, Kristu a wiini Alaw lai. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon