1Yohana 4 - Ɗû na sɗik na wiini Alaw

Seze na wiini Alaw gaini na wiiɗi antikristu

¹ Tiki marmakaiya zi diri gara, aga ki yimi ɓa seze ɗa a seze paŋ nɵa kai. Amma ki fifikiŋ haw, kapai ki siɗiŋ ɓa a na sin Alaw par ɗa. Buri ɗai n'a jre kai kai viya e birisi e ɗa edi warɗi yai.

² Aga kisiɗi seze n'a halasi sini Alaw par war hanɗa, Seze paŋ n'a muɗa ɓa Yesu Kristu a halasi war neŋ-si a na sini Alaw par.

³ Seze paŋ n'a sɗa Yesu kai ɗa, a na sini Alaw par kai, a seze na wiini antikristu, na tiki ki ɵini ɓa a na halasi na tiyana a na warɗi yai ya lai.

⁴ Tiki aliya, tiki ki ɗi na wiini Alaw, tiki ki rɗi amai midiɗi yai ya, buri ni n'aŋ warki ɗa abai a suwa ni n'aŋ warɗi ɗai na yai ɗa.

⁵ Nagai ɗa e ɗi na wiiɗi yai, buri nɵa seŋɗi n'e miɗiŋ ɗa a na wiiɗi yai, ɗai na yai ɗa e ɵini miɗi lai.

⁶ Tumu ɗa mu ɗumu na wiini Alaw, ni n'a sɗa Alaw ya ɗa a ɵina mumu, ni n'a wiini Alaw kai ɗa a ɵina mumu kai, mu suɗumu seze na jre gaini zi wili ɗai edi ɗa gaini hanɗa.

Alaw a diri

⁷ Tiki marmakaiya zi diri gara, durumu marmu arbaɗi marmu, buri diri a na sin Alaw par, asiya ɗi paŋ n'a dara maini ɗa a waŋsi a Alaw, a sɗa Alaw lai.

⁸ Ni n'a dara maini kai ɗa a sɗa Alaw duk kai zaŋ, buri ɓa Alaw a diri.

⁹ Diri na wiini Alaw a siŋka edi arbamu gaglai war hanɗa, Alaw a ɵinasi Ahini na ketekeɗik warɗi yai, kapai mu sumnumu karmu gaini ni.

¹⁰ Diri hanɗa a na buri na ɓa tumu mu durumu Alaw avut ɗa kai, amma ni a durumu avut, a ɵinasi Ahini aŋ wala zi ɓaka burini tuwurmu.

¹¹ Tiki marmakaiya zi diri gara, na ɓa Alaw a durumu gara maini hanɗa ɵa ɗa, tumu lai aga mu durumu marmu arbaɗi marmu.

¹² Ɗif a tala ka Alaw duk kai zaŋ, na ɓa mu durumu marmu arbaɗi marmu ɗa, Alaw aŋ warmu, dirini aŋ gaini vi amai warmu lai.

¹³ Aga mu suɗumu ɓa ni aŋ warmu, tumu war ni lai ɗa war hanɗa, buri ɓa a sumu seze na wiini.

¹⁴ Tumu mu tuluŋmu ya, mu zumu zaida lai ɓa Api a ɵinasi Ahi aŋ ɗif-zi-kûri na wiiɗi ɗai na yai.

¹⁵ Asiya ɗi paŋ n'a muɗa edi gaini mini ɓa Yesu a Ahini Alaw ɗa, Alaw aŋ warni, ni aŋ warni Alaw lai.

¹⁶ Tumu ɗa mu suɗumu diri n'Alaw a zaŋ sumu ya, mu yumumu pini lai. Alaw a diri, ɗif n'aŋ war diri ɗa aŋ warni Alaw, Alaw a sumna warni lai.

¹⁷ War hanɗa, diri n'arbamu aga a va amai, war hanɗa, kapai mu sumnumu gaini yimi war mefeŋ zi sariya, maini na ni a na ɗa ɵa, tumu aga mu bundumu maiɗi ɵa lai, warɗi yai hanɗa.

¹⁸ Hunai t'aŋ war diri kai, amma diri na gaini vi amai ta ɗa a vada hunai edi, buri ɓa hunai te siŋka ɓa wala zi gir a na gizi, ni n'a huna ɗa aŋ gai vi amai war diri kai.

¹⁹ Amma tumo mu durumu, buri ɓa ni a durumu avut.

²⁰ Ɓa ɗif a muɗa ɓa: mu dara Alaw, amma a bula gaw sini tawalni, ni a ɗif z'eles; buri ɓa ni n'a dara tawalni n'a na talaŋ kai ɗa, a sɗa aŋ dara Alaw n'a talaŋ kai maɵa maɵa ɗa?

²¹ Tumu mu nivumu gadai hanɗa sini par, ni n'a dara Alaw ɗa, a dara tawalni lai.