1Yohana 2 - Ɗû na sɗik na wiini Alaw

¹ Aliya, wazagai hanɗa, mu ɗoŋ siki na ɗa ɓa kapai ki zi tuwur kai; amma na ɓa ɗf a za tuwur li ɗa, ni n'a zizina seŋmu wuzani Alaw a na, Yesu Kristu na jre.

² Buri ni gaini midini dama a s sini edi aŋ wala zi ɓaka, na burini tuwurmu, buri na wiimu ktai kai, amma buri na wiiɗi ɗai na midiɗi yai gaiɗi abaiɗi lai.

Seŋ zi gadai na wel gaini na hehe

³ Aga mu suɗumu ɓa tumu mu suɗuŋmu ya ɗa war hanɗa: na ɓa mu yimumu seŋ zi gadai na wiini.

⁴ Ni n'a muɗa ɓa “mu sɗaŋ ya”, amma a yima pin gadaini kai ɗa, ni a ɗif z'eles, jre aŋ warni kaalai.

⁵ Amma ni n'a yima seŋni, diri na wiini Alaw aŋ gaini vi amai warni gai futini. Pin hanɗa, aga mu suɗumu ɓa tumu mu ɗumu warni.

⁶ Ni n'a sɗa sini ba a na war ni ɗa, aga a paya maini na ni a paya ɗa nɵa.

⁷ Tiki marmakaiya zi diri gara, na mu ɗo siki na ɗa a seŋ zi gadai na hehe kai, amma a gadai n'a na a ɗipar, na ki niviŋsi war pi zi tiki par, seŋ zi gadai ni ɗa a seŋ na ki ɵiniŋ ɗa.

⁸ Mu kuɗumu aŋ muɗumu lai ɓa a wala na hehe fakat war Yesu, warki tiki lai, buri ɓa gegeŋ a na vuga, gaglai na jre a na ŋala tiyana lai.

⁹ Ni n'a yika sini ba aŋ war gaglai, amma a bula gaw sini tawalni ɗa aŋ war gegeŋ hai.

¹⁰ Ni n'a dara tawalni aŋ war gaglai, wala zi dibi azi burini tawalni aŋ sini kai.

¹¹ Amma ni n'a bula gaw sin tawalni ɗa, aŋ war gegeŋ, a paya na ɗa war gegeŋ lai, a sɗa hlai n'a na hala woni sek ɗa kai, buri gegeŋ a ŋulva arni tik.

Ki zi ɗa a wala n'Alaw a daraŋ

¹² Tiki aliya, mu ɗo siki na ɗa buri ɓa Alaw a hiniki tuwurki mak, burini yikini Yesu.

¹³ Tiki tamai, mu ɗo siki na ɗa, buri ɓa ki siɗi ni n'a na, haa war pi zi tiki par; tiki gawlakai, mu ɗo siki na ɗa buri ɓa ki rɗi amai midini na meefeŋ.

¹⁴ Aliya mu ɗo siki na ɗa, buri ɓa tiki ki siɗi Api ya. Tiki tamai, mu ɗo siki na ɗa, buri tiki ki siɗi ni n'a na war pi zi tiki par. Tiki gawlakai mu ɗo siki na ɗa, buri ɓa ki ɗa gdaŋai, buri ɓa seŋni Alaw a sumna warki, buri ɓa ki rɗi amai midini na meefeŋ ya lai.

¹⁵ Ki diriti yai ɗa kai, wazagai na warɗi yai ɗa kaalai. Na ɓa ɗif a diriti yai ɗa, a dara Alaw n'Api ɗa kai.

¹⁶ Buri wazagai na warɗi yai ɗa paŋ: dirini neŋ-si gaini suuna na wiini arai, gaini kûlûni-si na pin wazagai zi der, wazagai hanɗa paŋ a na sin Api par kai, amma siɗi yai par.

¹⁷ Yai aga te vada edi gaini diriɗi lai, amma ni n'a na za diri na wiini Alaw ɗa aga a sumna haa hlai n'a vada kai.

¹⁸ Aliya, hanɗa a hlai n'asakal. Tiki ki ɵini lai ɓa antikristu a na halasi, amma antikristu tiyana ɗa e ɗa viya. Pin hanɗa aga mu suɗumu ɓa mu ɗumu na ɗa war mefeŋ n'asakal.

¹⁹ Nagai e niyiɗi arbamu par, na ɓa e ɗi fu na wiimu ɗa aga e simni gaimu. Amma tiyana ɗa, siŋka edi armu gaglai ɓa arbaɗi ɗa, ktai na wiimu aŋ kai.

²⁰ Amma tiki ɗa ki nivi mini-emel n'e tiki ɗai war sɗa gani sini na sɗik par, tiki ki siɗi hanɗa lai.

²¹ Mu ɗo siki ɗa, buri na ɓa tiki ki siɗi jre ɗa kai ɗa kai, amma buri ɓa ki siɗiŋ ya, buri ɓa seŋ z'eles ktai aŋ war jre kai zaŋ.

²² Ɗif z'eles ɗa asiya ɗa? A ni n'a muɗa ɓa Yesu a Kristu kai ɗa kai ɗi! Hanɗa a antikristu ɗa, ni n'a dara a sɗa Api kaalai, Ahi kaalai ɗa.

²³ Asiya ɗi paŋ n'a muɗa ɓa a sɗa Ahi kai ɗa, Api aŋ gaini kaalai, amma ni n'a sɗa Ahi ɗa, Api aŋ gaini.

²⁴ Amma tiki ɗa a juva ɓa seŋ na ki ɵiniŋ war pi zi tiki par ɗa a sumna warki na ɓa wala na ki ɵiniŋ war pi zi tiki par a na warki ɗa, tiki lai aga ki simni warni Ahi gaini Api.

²⁵ Wala na ni a zumu ha miɗini ɗa a suŋfa n'a vada kai.

²⁶ Mu ɗoɗi wala hanɗa siki buriɗi nagai n'e ɗa wiliki edi ɗa.

²⁷ Amma tiki, mini-emel n'e tiki ɗai war sɗa gaini, na ki niviŋ sini par ɗa, aga a za gaiki, jaaki buri ɗif a hitriki kir kai, maini mini emel n'e tiki ɗai war sɗa gaini na wiini ni n'aga a hitriki midini wazagai paŋ nɵa, ni ɗa a jre, eles warni kai, ki simni warni ni, maini na mini emel n'e tiki ɗai war sɗa gaini a hitriŋki nɵa.

Alini Alaw

²⁸ Tiyana ɗa aliya, ki simni warni, kapai koo ɓa gizini a za kaswata ɗi mu sumnumu gaini yimi, kapai mu tukumu siyer, mu sumnumu edi gaigai sini par war gizini kai.

²⁹ Na ɓa tiki ki siɗi ɓa Kristu a na jre-ɗikat, aga ki siɗi lai ɓa asiya ɗi paŋ n'a za jre ɗikat a waŋsi ɗa a Alaw.