Lokwita n'avut na wiiɗi paakai 8 - Ɗû na sɗik na wiini Alaw

Jûgûni zunduk zi bonu amlai warni tempel

¹ Asakal par pai Salmun a tipiɗi n'abakai n'arbaɗi ɗai na Izrayel paŋ sini, abakaiɗi pinziba paŋ gaiɗi abakaini pakatai na Izrayel ɗa paŋ lai aha war Yeruzalem, buri e tikisi zunduk zi bonu na wiini EPIƊ-ƊAI edi war fuŋ n'abai na wiini David ɗa par, a dara a muɗa a Siyon par, amai war tempel sek.

² Ɗai na Izrayel paŋ e tipisi sini Salmun war tile n'ag'aŋ muguzak, n'e yikiŋ ɓa: Etanim, war mefeŋ na wiiɗi fet na wiini gumu,

³ Won hlai n'abakai n'arbaɗi aliɗi Izrayel e diŋgisi paŋ li, paakai zi ɓaka e tiki zunduk zi bonu ɗa.

⁴ Paakai zi ɓaka gaiɗi Levitekai e tiki zunduk na wiini EPIƊ-ƊAI gaini gumu n'e nivi gaini EPIƊ-ƊAI warni, gaini wazagai na wiini Alaw n'a na amlai warni paŋ.

⁵ Pai Salmun gaiɗi aliɗi Izrayel n'e tipisi sini paŋ, n'e ɗa wuzani zunduk zi bonu e fiɗi haakai gaini adumai gaini ɵaakai lai aŋ ɓaka viya a kiɗa a pɵa tini ɗif kai.

⁶ Paakai zi ɓaka e ki zunduk zi bonu na wiini EPIƊ-ƊAI, war hlai n'e ziziniŋ burini, amlai war hlai na sɗik gara, azumai pini graŋɗi kerubimkai.

⁷ Buri ɓa graŋɗi kerubimkai na gaini miɗi edi amai midini hlai n'e ziziniŋ burini zunduk meɗ meɗ ɗa, a giɗima zunduk gaini wazagai n'e libiŋ gaini lai.

⁸ Wazagai n'e libiŋ gaini hanɗa mogo kai gara, war hlai na sɗik par ɗa ɗif arni sini mini sa, amma anene par ɗa ɗif a kiɗa a talaŋ kai, aŋ woni ɵa haa girna.

⁹ Wala zamai amlai war zunduk ɗa kai, a na ɗa a ali-fuŋ na babɗamai na sulu na Musus a mulaŋ warni a Horeb par, won hlai n'EPIƊ-ƊAI a za bonu gaiɗi aliɗi Izrayel hlai n'e niyiɗi edi war Egipte par ɗa.

¹⁰ Amma hlai na paakai zi ɓaka e niyisi edi war hlai na sɗik par, ɗugul a va tempel na wiini EPIƊ-ƊAI ta,

¹¹ paakai zi ɓaka e kiɗi e hili wuzaɗi gaini sdaɗi kir kai burini ɗugul hanɗa, buri abai na wiini EPIƊ-ƊAI a va tempel na wiini EPIƊ-ƊAI ta.

¹² Nɵa Salmun a muɗa: EPIƊ-ƊAI a muɗa ya ɓa a firya a sumna ɗa war ɗugul na murɗek.

¹³ Amma ta mu rguku tempel na juf, a hlai n'aga ku sumna warni haa kureɗ.

Miɗi na wiini Salmun miɗini sini tempel n'edi wiini Alaw

¹⁴ Aliɗi Izrayel n'e diŋgisi paŋ e ɗiyi amai sa sa, Salmun a bunda arni siɗi a ɵiɓiɗi wuti.

¹⁵ A muɗa: kol sini EPIƊ-ƊAI, Alaw na wiiɗi Izrayel, n'a muɗa gaini mini wiini David n'apa, n'a va miɗi n'a muɗaŋ ɗa amai gaini tini dama lai, miɗi n'a miɗini ɓa:

¹⁶ Daga na mu miliɗisi ɗaiŋa na Izrayel edi war Egipte par ɗa, mu vara fuŋ n'abai ktai war pinzibaɗi Izrayel na kapai mu rga Dalam na mu sumna warni woni kai, amma mu vara David buri a za aŋ pai midiɗi ɗaiŋa Izrayel.

¹⁷ David n'apa a rga warni buri a rga Dalam burini EPIƊ-ƊAI, Alaw na wiiɗi Izrayel.

¹⁸ Amma EPIƊ-ƊAI a miɗini wiini David n'apa ɓa: hiini na ku hiina ɓa ku rgaŋa Dalam ɗa a hiini na pɗem,

¹⁹ amma aga ku rgaŋa Dalam hanɗa ku tuku kai, a rgaŋŋa ɗa ahiku, aga a rga Dalam hanɗa buriya ɗa a ni.

²⁰ Tiyana ɗa EPIƊ-ƊAI a va seŋni n'a muɗaŋ ɗa li amai, mu suma pai war balamni David n'apa, mu sumna warɗi Paramai zi pai na wiiɗi Izrayel maini n'EPIƊ-ƊAI a muɗaŋ ɗa nɵa, mu rga Dalam hanɗa li burini EPIƊ-ƊAI, Alaw na wiiɗi Izrayel,

²¹ woni mu zizina hlai n'e tiki zunduk na seŋ na wiini bonu n'EPIƊ-ƊAI a zaŋ gaiɗi tiyakaiyi hlai n'a miliɗisi edi war Egipte par ɗa aŋ warni;

Siiwa na wiini Salmun

²² Asakal par Salmun a ɗiya amai wuzani gûwiŋ zi yi ɓaka na wiini EPIƊ-ƊAI, wuzani vok na wiiɗi aliɗi Izrayel n'e diŋgisi, a yima tini amai pini Alaw

²³ a muɗa: EPIƊ-ƊAI, Alaw na wiiɗi Izrayel, Alaw na maiku tuku nɵa aŋ kai, amai war hlai n'amai kaalai, azumai midiɗi yai kaalai, tuku ku ɗiya midini bonuku gaini pɗemku na siɗi ɗaiku n'e piyi wuzani arni arku war jre gaini agulɗi paŋ.

²⁴ ɵinini-ha na ku ziŋni wiini David n'apa ɗa, muduku a wula gaini kai, na muku a muɗaŋ ɗa, tuku te vaŋ li amai maini na mi ɗa tiliŋ girna na ɗa ɵa.

²⁵ Tiyana ɗa EPIƊ-ƊAI, Alaw na wiiɗi Izrayel, seŋ na ku miɗiŋni wiini ɵeŋku David n'apa ɗa ku hina muduku a wula gaini kai, seŋ na ku miɗiŋni ɓa: na ɓa pinzibaku ɗa e piyi pɗem wuzani ara maini na ku paya nɵa ɗa, duɓaku sek ɗa aga a sumna midiɗi Paramai zi pai na wiiɗi aliɗi Izrayel ɗa a ktai arbaɗi par ɵa.

²⁶ Tiyana ɗa, Alaw na wiiɗi Izrayel, mu siiwuku ɓa, ɵinini-ha na ku ziŋni wiini ɵeŋku na David n'apa ɗa ku vaŋ amai ta kai ɗi!

²⁷ War jre kai tiɓ ɗa Alaw a kiɗa a sumna azumai midiɗi yai ɗi? Na ɓa hlai n'amai na gaini abaini tekeɗeɗi a kiɗa a tikaŋ kai, azi gama ɗa, Dalam n'agwi na mu rgaŋ hanɗa!

²⁸ Gaini hanɗa paŋ kaw ɗi ɗa, EPIƊ-ƊAI, Alaw na wiya, zaga ɵimaku mini siiwa gaini tuwi na wiini ɵeŋku jak, ku ɵina ɗuwal gaini siiwa na ta ɵeŋku mu na kaŋɗi wuzaku girna na ɗa.

²⁹ A juva ɓa girvudi gaini duvuk paŋ arku aŋ miɗini Tempel hanɗa, hlai na ku muɗa miɗini ɓa: aga ku sumna woni ɗa, ɵina siiwa na ɵeŋku a siiwukuɗi war hlai hanɗa par,

³⁰ ɵina tuwiŋa gaini na wiiɗi ɗaiku na Izrayel na mi ɗa tûwiŋɗi suku war hlai hanɗa par, tuku, war hlai na k'aŋ warni ɗa, amai war hlai n'amai par ɵina tuwiyi, siyi ni lai.

³¹ Na ɓa ɗif a za meefeŋ li sini maini, na ɓa ɗai e firiyi ɓa a ha wala zi tusa mini, na ɓa a halasi li aŋ ha wala hanɗa mini wuzani gûwiŋ zi yi ɓaka na wiiku, amlai war Dalam hanɗa,

³² tuku EPIƊ-ƊAI, amai war hlai n'amai par, ɵina, za wala ktai ta, zitiɗi sariya wiiɗi ɗaiku hanɗa. Ni n'a za meefeŋ, tikini gir midini pini sdani na meefeŋ ɗa, ni n'a za wala na meefeŋ kai ɗa, siŋka jreni edi, za sini pini jre na wiini lai.

³³ Na ɓa gawɗi Izrayel na ɗaiku e rɗi li amai midiɗi buri ɓa e zi tuwur suku, na ɓa e wiyisi e hi-miy, e kuluku gaini yama, e siwu tuku, e tûwi suku amlai war Dalam hanɗa,

³⁴ tuku amai war hlai n'amai par ku siɗi ni wiiɗi Izrayel na ɗaiku buri tuwurɗi, ku wiyiɗisi aha midini afti na ku siŋɗi wiiɗi tiyakaiɗi.

³⁵ Na ɓa mini hlai n'amai a dogo duk faŋ a ɵa kir kai buri ɓa aliɗi Izrayel e zi tuwur suku, na ɓa e hilisi e siiwi war hlai hanɗa, na ɓa e hilisi e kuluku, e wiyisi edi siɗi futi na mafuni par buri gir na ku tikaŋ midiɗi.

³⁶ Tuku amai war hlai n'amai par ku siɗi ni wiiɗi ɗaiku na Izrayel, aga ku hitritiɗi futi na pɗemi n'aga e piyi warɗi. Ku hina faŋ a ɵa miɗini aftiku, afti na tiɓ ɗa a wiiku, ku siŋɗi wiiɗi ɗaiku aŋ bulum.

³⁷ Won hlai na wiyamai te za midini afti, won hlai na vlak a za, won hlai na seyem na war vowai a fara, won hlai na neme neme a yima, won hlai na ɓokɓoko gaini ayuwi a luɓasi viya, won hlai na gawyí e ciki fuŋ n'abai na midini aftiɗi, koo ɓa a gir na wata, veglek na maɵa maɵa,

³⁸ E siiwi tuku ɗa a ma, e tûwi suku ɗa miɗini ama, na ɓa a siiwa a ɗif ktai, zaw e ɗi ɗaiku na Izrayel gaini hlaiɗi paŋ ɗi ɗa, na ɓa ɗif a sɗa wala n'a kinisi gir midini li ɗa, na ɓa a bundasi li arni sini tempel hanɗa sek, a yima tini li amai puku aŋ siiwuku lai ɗa,

³⁹ tuku amai war hlai n'amai par, war hlaiku zi simni na ku sumna woni, sini ni, za sini asiya ɗi paŋ pini payaini, buri tuku ku sɗa wala n'aŋ warɗi agul, buri ɓa ku siɗiti agulni ɗif ku tuku kiiku.

⁴⁰ Kapai nagai e suku hormo haa sini dibini mefeŋ na ku siŋɗi aŋ simni karɗi ta midini afti na ku siŋɗi wiiɗi tiyakaiɗi ɗa.

⁴¹ Koo ɓa a ɗif na war pinzibaɗi Izrayel na ɗaiku kai kaw, na ɓa a halasi midini afti na gaigai par buriku tuku,

⁴² buri ɓa pinziba na zamai aga e ɵini labarɗi abaiku, gdaŋku gaini spakku, na ɓa a halasi li war Dalam hanɗa aŋ siiwa ɗa,

⁴³ tuku, amai war hlai n'amai par, hlai zi simni na ku sumna woni, za maini na ɗif n'edi par a zilbaŋ tuku ɗa ɵa, kapai ɗai na midiɗi yai paŋ e suɗuku, e suku hormo maiɗi ɗaiku na Izrayel ɗa nɵa, e siɗi lai ɓa Dalam na mu rgaŋ hanɗa a wiiku tuku.

⁴⁴ Na ɓa ɗaiku e hili li aŋ hitimiɗi gawɗi, war hlai na ku siŋkiŋɗi sek, na ɓa e bindi arɗi li suku sek aŋ siiwi tuku, aha war fuŋ n'abai na ku varaŋ, aha war Dalam na mu rgaŋ buriku sek lai ɗa,

⁴⁵ amai war hlai n'amai par ɵina siiwaɗi gaini tuwiɗi, zina piɗi ta lai.

⁴⁶ Na ɓa aliɗi Izrayel e zi tuwur li suku buri ɓa ɗif n'a za tuwur kai aŋ kai, na ɓa ku za hiy li siɗi, ku siɗi li edi war tiɗi gawɗi, gawɗi e kiɗi li edi aŋ bagakai edi midini afti zamai na gobi zaw na gaigai ɗi ɗa,

⁴⁷ na ɓa edi midini afti n'e ɗa woni aŋ bege ɗa, e tiki piɗi e hiini, e hi-miy, e tûwi suku edi woni par, e miɗi ɓa: tiyi miɗi ɗai na tuwarai, mi ɗi ɗai na mi zi meefeŋ, sariya te yimiyi yaw,

⁴⁸ na ɓa e wiyisi li suku gaiɗi agulɗi paŋ, gaini suŋfaɗi paŋ, edi midini afti n'e kiɗi woni aŋ bege par, na ɓa e bindi arɗi li aha sini aftiɗi sek aŋ siiwi, afti na ku sinɗi wiiɗi tiyakaiɗi, aha sek sini fuŋ n'abai na ku varaŋ gaini Dalam na mu rgaŋ buriku lai ɗa,

⁴⁹ amai war hlai n'amai par, war hlai na ku sumna woni, zaga ɵimaku miɗi jak, ɵina siiwaɗi gaini tuwiɗi lai, zina piɗi ta,

⁵⁰ siɗi ni wiiɗi ɗaiku n'e zi tuwur suku ɗa, siɗi ni burini hiɗi-n'amai midini gadai, hiniɗi e tili haw arɗi nagai n'e ɗa e ŋi midiɗi.

⁵¹ Buri ɓa e ɗi ɗaiku, e ɗi walaku na ku miliɗisi edi warɗi Egipte par, war hlai zi gir n'abai hanɗa.

⁵² EPIƊ-ƊAI, ɵina siiwa na wiini ɵeŋku gaini na wiiɗi ɗaiku na Izrayel ɗa, hlai paŋ n'aga e ɗûûliɗi suku.

⁵³ EPIƊ-ƊAI, Alaw, ku tikiɗisi arɗi edi kiiɗi siɗi ɗai zamai na midiɗi yai par ku tuku, kapai e zi aŋ walaku maini na ku miɗiŋni wiini Musus ɵeŋ na wiiku nɵa, won hlai na ku miliɗisi tiyakaiyi edi war Egipte par.

Salmun a siiwa Alaw buri a za gaiɗi ɗaini

⁵⁴ Won hlai na Salmun a vada gaini siiwa gaini tuwi na sini EPIƊ-ƊAI paŋ li, a faka amai wuzani gûwiŋ zi yi ɓaka na wiini EPIƊ-ƊAI, n'a na fu gaini hûrgû azumai wuzani gaini tini gaini yimi amai yaw par,

⁵⁵ Won hlai n'a ɗiya amai li a ɓikiɗi aliɗi Izrayel gaini hlaiɗi a muɗa:

⁵⁶ kol sini EPIƊ-ƊAI n'a siɗi ɵeɗ wiiɗi Izrayel na ɗaini maini n'a muɗaŋ ɗa nɵa: seŋ na pɗamai n'a miɗiŋni wiini Musus ɵeŋ na wiini paŋ ɗa n'a va amai kai aŋ kai.

⁵⁷ A juva ɓa EPIƊ-ƊAI, Alaw na wiimu a za gaimu maini n'a na ka gaiɗi tamaimu nɵa, a juva ɓa a hunumu kai, a bunda arni edi sumu par kai,

⁵⁸ a bunda hiinumu sini kapai mu piyumu maini n'a dara nɵa, kapai mu zumu pini gadaini, pini gadai zi ɗû gaini zi ɗiyi lai n'a saŋsi siɗi tiyakaimu par.

⁵⁹ A juva ɓa EPIƊ-ƊAI ɗa miɗini a kɵa duvuk gaini girvudi paŋ gaini tuwi na mu tuwa sini hanɗa, mefeŋ paŋ won hlai na suwai te suwaŋa, zaw te sûwiɗi aliɗi Izrayel na ɗaini li ɗa, a liwiyi ɗuwal,

⁶⁰ kapai ɗai na midiɗi yai paŋ ɗa e siɗi ɓa Alaw ɗa a EPIƊ-ƊAI ktai, na zamai aŋ kir kai.

⁶¹ Nɵa ki sitini agulki paŋ wiini EPIƊ-ƊAI na wiimu, kapai ki piyi pini gadai zi ɗû na wiini, ki zi pini gadai na wiini maini na ki ɗa ziŋ na ɗa nɵa.

Salmun gaiɗi aliɗi Izrayel e zi ɓaka wiini EPIƊ-ƊAI

⁶² Pai Salmun lai aliɗi Izrayel lai, paŋ e zi ɓaka wuzani EPIƊ-ƊAI.

⁶³ Salmun a za ɓaka zi ɵeɗ, a fuɗa garakai dubu caaɓa pi sulu, adumai gaini haakai dubu miya gaini caaɓa. Salmun gaiɗi aliɗi Izrayel n'e ɗa gaini e ziti fet na wiini milini mini Dalam na wiini EPIƊ-ƊAI ɗa maini nɵa.

⁶⁴ War mefeŋ ni ɗa, pai a bunda hlai edi arbani pakatai na mini Dalam na wiini EPIƊ-ƊAI ɗa aŋ hlai zi ɓaka, a za ɓaka zi yi, gaini ɓaka zi seyem gaini wazagai z'emel na sini wazagai zi ɓaka zi ɵeɗ ɗa warni hlai hanɗa, buri ɓa gûwiŋ zi kiya zi yi ɓaka a na fu agwi, a kiɗa a mula wazagai zi ɓaka hanɗa paŋ kai.

⁶⁵ War mefeŋ ni lai, Salmun gaiɗi aliɗi Izrayel n'e ɗa gaini e ziti fet na wiini Dugo. War tile n'ag'aŋ muguzak ɗai e diŋgisi viya war gal n'azumai par a Lebo-hamat par haa war gal n'amai sek siɗi arai n'Egipte ta, e zi mefeŋ muguzak wuzani EPIƊ-ƊAI, asakal par e zi muguzak pra, e zi paŋ doogo pi puɗu.

⁶⁶ War mefeŋ n'ag'aŋ mitwis Salmun a miɗiɗi wiiɗi ɗai buri e wiyi aha, e hilisi e ɵiɓini wuti wiini pai tiɓ tiɓ, e hili ahaɗi war firiyi. Agulɗi a va gaini firiyi lai buri pɗem n'EPIƊ-ƊAI a zaŋ sini David na ɵeŋni gaiɗi Izrayel na ɗaini lai.