Lokwita n'avut na wiiɗi paakai 3 - Ɗû na sɗik na wiini Alaw

Salmun a tikiti ahini pai n'Egipte aŋ munini

¹ Salmun a za bonu zi tiki gaini Faraw pai n'Egipte, a tikiti ahini ɗa ɗaw, a tikiti ka aha war fuŋ na wiini David ɗa ta haa a vada gaini rgini dalamni, gaini Dalam na wiini EPIƊ-ƊAI gaini ɵaga na siɗi Yeruzalem ɗa lai.

² War mefeŋ ni ɗa, ɗai e zi ɓaka ɗa war hlai zi ɓaka ɗaai, buri ɓa e rgi Dalam na burini EPIƊ-ƊAI a rga kai hai.

³ Salmun a dara EPIƊ-ƊAI gara, a paya maini na David n'epini a gdaŋ ɗa nɵa, amma a za ɓaka lai, a ya wala zi lûgûzi lai ɗa war hlai zi ɓaka.

Salmun a zilba Alaw buri a sini yel aŋ ŋa gaini

⁴ Mefeŋ ktai, pai a hala a Gabawon aŋ za ɓaka, buri ɓa a hlai zi ɓaka n'abai arbani marni ɗa. Salmun a za ɓaka zi yi gaini wazagai na ezini puɗu puɗu dubu ɗaw war hlai ni ɗa.

⁵ War Gabawon, EPIƊ-ƊAI a siŋka sini arni Salmun war duvuk, war weseŋ zi pɵi, Alaw a miɗini: zilba wala na ku firiya ɓa mu suŋku ɗa, kapai mu suŋku.

⁶ Salmun a waya seŋ: tuku ku za pɗem sini ɵeŋku David n'apa abai gara, buri a paya wuzani arku aŋ ɗifku z'amana, war jre, war ɗikat, ku ɗiya pɗem n'arbaki ta kai, haa ku sini ahi aŋ sumna midiɗi paramaini zi pai li girna.

⁷ Tiyana ɗa EPIƊ-ƊAI, Alaw na wiya, ku tikaŋa aŋ pai war balamni David n'apa ɗa ku tuku, ta mu ahiyagwi n'agwi kadai, yelŋa na mu kiɗa aŋ ɵa wuzaɗi ɗai gaini aŋ kai.

⁸ Ku tikaŋa midiɗi ɗaiku ta, ɗaiku na ku viriɗi edi, na vokɗi abai gara, a kiɗa a pɵa kai.

⁹ Sataŋa agul zi yel kapai mu sɗa aŋ ɵa wuzaɗi ɗaiku, aŋ za ɓraw arbani pɗem gaini meefeŋ lai. Na ɓa nɵa kai ɗa, n'a kiɗa aŋ ɵa wuzaɗi ɗaiku ɗa asiya ɗa, ɗaiku na viya hanɗa?

¹⁰ Zilbi na Salmun a zilbaŋ ɵa ɗa, a sini firiyi wiini EPIƊ-ƊAI.

¹¹ Alaw a miɗini: tuku ku zilba wala ktai buriku tuku dama kai, ku paya suŋfa na mogo kaalai, farai kaalai, ku paya fiɗi n'edi na wiiɗi gawku kaalai, amma ku paya ɗa a yel na kapai ku ɵa wuzaɗi ɗaiŋa gaini war jre,

¹² tala, aga mu za suku pini miɗi na ku muɗaŋ, aga mu sutuku agul zi yel, zi siɗi lai na ɗif ktai wuzaku par a niviti kaa duk kai, asakalku par aga a niviti maiku nɵa kaalai.

¹³ Wala na ku zilbaŋ kai ɗa maa aga mu suŋku. Aga mu suku farai gaiɗi abai. Haa sini mriku ta, pai zamai n'aga a kata gaiku tuku aŋ kai.

¹⁴ Na ɓa ku paya payai na pɗem maini na mu daraŋ nɵa, ku za pini gadai zi ɗû gaini gadai na wiya maini David n'apuku nɵa ɗa, aga mu suku suŋfa na moogo.

¹⁵ Won hlai na Salmun a ɵiyasi amai war weseŋ par, a tala ɓa a pɵaŋ ɗa a weseŋ, a wayasi aha war Yeruzalem, a hala wuzani zunduk zi bonu na wiini EPIƊ-ƊAI, a za ɓaka zi yi gaini ɓaka zi ɵeɗ lai, a ziti fet n'amai buriɗi ɗaini zi sda ɗa paŋ.

Sariya zi yel na wiini Salmun

¹⁶ Mefeŋ ktai ɗa, zawarai sulu e hilisi wuzani pai Salmun,

¹⁷ na ktai te miɗini: jaamus, seŋŋa ɗa a na maini nɵa: ta gaiɗi muni hanɗa mi simni amlai warɗi dilimi ktai, mu poko ɗa na te na,

¹⁸ mefeŋ hu asakal par, na te poko lai, mi ɗi amlai miɗi tiyi sulu, ɗif zamai arbayi kai.

¹⁹ Duvuk ktai ɗa ahiɗi muni hanɗa a mra su buri ɓa te fana midini waŋ.

²⁰ Te faka amai duvuk, te tika ahiya n'a na wuza waŋ ɗa, ta mu na fu a weseŋ. Te hala te fanaŋ wuzaɗi waŋ, ahiɗi na gaini mri su ɗa te kaŋsi te fanaŋŋa wuza waŋ.

²¹ Gorof par ɗa, hlai na mu faka amai aŋ sini fiyaw wiini ahiya ɗa, mu talaŋ gaini mri su, Won hlai na hlai a sɗasi li edi ɗa mu guliyaŋ, mu guliyaŋ ɗa, a ahiya na mu waŋ ɗa kai.

²² Maiɗi te muɗa: zaw kai ahiya ɗa a na karni ɗa, ahiku tuku ɗa a na gaini mri ɗa. Na ktai te muɗa pra: a na ɵa kai, ahiku tuku ɗa a na gaini mri ɗa, ahiya ta ɗa a na karni ɗa. E sisipi miɗi marɗi wuzani Pai maini nɵa.

²³ Pai a muɗa: asiya ɗi paŋ a muɗa na ɗa ɓa ahi na karni ɗa a wiini, na gaini mri ɗa a wiini maini ɗa koo.

²⁴ Nɵa a muɗa: hili piyiŋasi kaɵkar ta, e piyinisi kaɵkar ɗa lai.

²⁵ Pai a sa futi a muɗa: ahiyagwi na karni ɗa ɗûklûŋ arba sa, ki siɗi gal tiɗi ɗaw ɗaw.

²⁶ Emini ahiyagwi na karni, hiinini haw na burini ahiɗi a yimiti, te miɗini wiini pai: jaamus, ku za barka epin-geza, siɗi ahi na karni ta, ki fiɗiŋ kai. Amma maiɗi te muɗa: a za aŋ wiiku kaalai, wiya kaalai, ɗûklûŋ edi.

²⁷ Nɵa pai a tika seŋ a muɗa: siɗi ahi na karni ɗa wiiɗi muni na te muɗa ɓa ahi a fuɗa kai ɗa, emini te na.

²⁸ Ɗai na Izrayel paŋ, e ɵiniti sariya na pai Salmun a ziti ɗa, e tiki piɗi e sini hormo abai gara, buri e siɗi ɓa Alaw a sini yel na kapai a ziti sariya gaini ta.