Lokwita n'avut na wiiɗi paakai 22 - Ɗû na sɗik na wiini Alaw

Akab a firiya a tika fuŋ n'abai na Ramot na war Galaad

¹ Siriya gaiɗi Izrayel e zi buza sulu hatam arbayi kai.

² Amma war buza n'ag'aŋ hu ɗa, Yosafat pai na Yuda a hala sini Akab pai na Izrayel.

³ Pai na Izrayel a miɗiɗi wiiɗi ɗaini n'abakai: tiki ki siɗi ɓa Ramot na war Galaad ɗa te wiimu, amma mu fukumu amai aŋ tukutumusi tini pai na Siriya par kai buri maɗa?

⁴ A miɗini wiini Yosafat: aga ku halaɗi aŋ hitima piyi par kapai mi tikitisi Ramot na war Galaad ɗa ɗi? Yosafat a wiyini seŋ wiini pai na Izrayel: tuku gaya ta mu ɗumu ɗai ktai, ɗaiŋa e ɗi ɗaiku, plasaiŋa ɗe a plasaiku lai.

Ɗai na mini Alaw e miɗi ɓa Akab aga a rɗa amai

⁵ Asakal par Yosafat a miɗini wiini pai na Izrayel: ku zilba dirini EPIƊ-ƊAI avut ta haw.

⁶ Pai na Izrayel a tipiɗi ɗai na mini Alaw gobi miya puɗu a zilbiɗi: mu hala mu hitimiti Ramot na war Galaad ɗa zaw, mu hala kai ɗi? E wiyini seŋ: hala, EPIƊ-ƊAI aga a suku fuŋ n'abai hanɗa war tuku.

⁷ Yosafat a muɗa: ɗif zamai na mini Alaw n'a kiɗa a zilbumu dirini war hlai hanɗa aŋ kir kai ɗi?

⁸ Pai na Izrayel a miɗini wiini Yosafat: ɗif na mini Alaw ktai a na n'a kiɗa a zilbumu dirini EPIƊ-ƊAI ɗa, amma ta mu daraŋ kai buri a muɗa seŋ na wuze na pɗem buriya duk kai, sai a na meefeŋ bas, ɗif hanɗa a Mika n'ahini Yimla ɗa. Yosafat a miɗini: pai, ku muɗa ɵa kai.

⁹ Pai na Izrayel a yikasi ɗif zi sda ktai a miɗini: hala witaw yikasi Mika n'ahini Yimla ɗa.

¹⁰ Pai na Izrayel gaini Yosafat pai na Yuda e simni midini paramaiɗi zi pai gaini sapaɗi zi pai siɗi ca ca. E simni anene mini magala na Samariya midini hlai na gaini libi amai ɗa ca. Ɗai na mini Alaw e zizimisi miɗi zum zum aŋ miɗiɗi seŋ na wuze ɗa.

¹¹ Siɗikiya n'ahini Kenaa na n'a zizina amiyok zi kawai a paŋ miɗini ɗa a muɗa: EPIƊ-ƊAI, a na muɗa: gaini amiyok hanɗa aga ku dibiɗi ɗai na Siriya haa ku vidiɗi edi kafa.

¹² Ɗai na mini Alaw gaini hlaiɗi paŋ e miɗi seŋ na wuze maini na wiini nɵa lai, e miɗi: pai, hala hitimiti Ramot na war Galaad ɗa, aga ku rɗa amai, EPIƊ-ƊAI aga a sutuku war tuku.

Ɗif na mini Alaw Mika a muɗa seŋ na wuze ɓa pai aga a rɗa amai kai

¹³ Ɗif na e ɵiniŋ aŋ yikasi Mika a miɗini: tala, ɗai na mini Alaw gaini hlaiɗi kafa e miɗi na ɗa a seŋ na pɗem burini pai. A pɗem ɓa seŋ na wiiku tuku ɗa a kata gaini na wiiɗi nagai lai, muɗa seŋ na wuze na pɗem burini pai lai.

¹⁴ Mika a muɗa: gaini EPIƊ-ƊAI na karni zaŋ, wala na EPIƊ-ƊAI aga a muɗaŋa ɗa, aga mu muɗa ɗa a ni lai.

¹⁵ Won hlai na Mika a cosi sini Pai, pai a zilbaŋ: mi kiɗi mi hili aŋ hitimiti Ramot na war Galaad ɗa ɗi, zaw mi hini hili ɗi? A wiyini seŋ: hala, aga ku rɗa amai, EPIƊ-ƊAI aga a siti war tuku.

¹⁶ Pai a miɗini: mu yiva aŋ muɗuku ɵa kureɗ ɓa ku haŋa wala muku ɓa seŋ na ku muɗaŋa ɗa a n'a halasi sini EPIƊ-ƊAI par jre jre ɗa, ku ɵina kai ɗi?

¹⁷ Mika a wiyini seŋ: Mu tiliɗi aliɗi Izrayel ɗa gaini ɵiri amai midini huwuŋ ɵar, maini adumai na ɗifni zi giɗimi aŋ kai nɵa. EPIƊ-ƊAI a muɗa: ɗai hanɗa ɗai n'e ɵi wuzaɗi e ɗi kir kai, a pɗem ɓa ɗif paŋ a waya ahani sek jam.

¹⁸ Pai na Izrayel a miɗini wiini Yosafat: mu muɗuku ya ka, a muɗa seŋ na wuze na pɗem buriya duk kai, sai a na meefeŋ bas.

¹⁹ Mika a muɗa pra: Pɗem tiyana ɵini seŋ na wiini EPIƊ-ƊAI ɗa: mu tala EPIƊ-ƊAI midiɗi paramaini zi pai dam, ɗaini zi ɵeŋ n'arbani hlai n'amai gaini eziɗi amai ɵimani ca ca, na par lai, na par lai.

²⁰ EPIƊ-ƊAI a zilbiɗi: n'aga a hala a zini midini Akab kapai a hala aŋ hitimiti Ramot na war Galaad a mrasi woni lai ɗa asiya ɗa? E si hiiniɗi kiini kiini kiini.

²¹ Nɵa seze ktai a halasi a ɗiya wuzani EPIƊ-ƊAI a muɗa: ta aga mu zini midini. EPIƊ-ƊAI a zilbaŋ gaini yel na maɵa maɵa ɗa?

²² A waya seŋ a muɗa: aga mu hala mu za sa aŋ seze zi eles war miɗi ɗai na mini Alaw na wiini paŋ. EPIƊ-ƊAI a miɗini: seŋku gaini futini, aga ku nava. hala za maini na ku hiinaŋ ɗa ɵa.

²³ Na ɓa EPIƊ-ƊAI a sa seze zi eles war miɗi ɗai na mini Alaw na wiiku ta ta ɗa, a zaŋ nɵa buri a firiya a kasi gir n'a hiinaŋ buriku muduku.

²⁴ Sedekiya n'ahini Kenaa n'a torosi sini Mika gobi a ɵeɓaŋ galaini a muɗa: seze na wiini EPIƊ-ƊAI a niyaɗi edi sa par aŋ muɗa gaiku gaiɗi futi na maɵa ɗa?

²⁵ Mika a wiyini seŋ: mefeŋ na ku faka li aŋ ŋoya amlai warɗi dilimi n'amlai piɗi marɗi par ɗa aga a yima muduku.

²⁶ Pai na Izrayel a miɗini wiini ɵeŋni ktai: yima Mika ɗa, kiŋni wiini Ammon n'abaini fuŋ n'abai ɗa gaini Yowas n'ahini pai ɗa.

²⁷ Ki miɗiɗi ɓa: pai ɓa, ɗif hanɗa ki ɵiŋ war daŋgai, ki sini simi mini viya kai, ki sini ɓuk agwi, yem agwi lai haa mu cosi aha jam.

²⁸ Mika a muɗa: na ɓa ku wayasi li aha jam ɗa a na EPIƊ-ƊAI a muɗaŋa kai zaŋ. Asakal par a muɗa: tiki ɗai paŋ ɵini hanɗa.

Pai Akab a mra war Ramot

²⁹ Pai na Izrayel gaini Yosafat pai na Yuda e hili aŋ hitimiti Ramot na war Galaad.

³⁰ Pai na Izrayel a miɗini wiini Yosafat: mu bunda sapa na sa pla kapai mu niya war hatam lai, amma tuku ɗa wa sapaku zi pai ɗa suku. Pai na Izrayel ɗa a wa sapa zamai sini a niya war hatam.

³¹ Pai na Siriya a sa miɗi wiiɗi n'abakai na midiɗi ɗai zi saret zi gaw ɗa ɓa: e tiki tiɗi sini ɗif zamai kai, sai e piyi ɗa a pai na Izrayel.

³² Won hlai na n'abakaiɗi ɗai zi saret zi gaw e tili Yosafat ɗa, e miɗi: hanɗa a paiɗi Izrayel ɗa mal, e fiki aŋ hitimiŋ, Yosafat a tika pini a ɗuula.

³³ Won hlai na n'abakaiɗi ɗai zi saret zi gaw e siɗi ɓa a pai na Izrayel kai ɗa, e yimi siɗi edi sini par, e hiniŋ.

³⁴ Amma ɗif ktai a ɵiɓitiɗi ɓûrwi ɗar kadai nɵa, te hala te niya arni safaya ɗaw, te yima pai na Izrayel ɗa. Pai a miɗini wiini ni n'a duɓura saretni zi gaw ɗa, bunda arku, kaŋa edi war baŋa, mu ɓulka ɓlak.

³⁵ Hatam na war yuvai hanɗa a za gdaŋ gara. Pai na Izrayel ɗaa hina amai gaini ezini war saretni zi gaw wuzaɗi ɗai na Siriya ɵa zaw, haa koskoi ta ɗa a bunda a mra su, felni a ka viya, war Saretni na azumai ɗa a fel kiini.

³⁶ Won hlai na futi te nawa li, ɗuwal a wa war kaŋ ɓa ɗif paŋ a waya aha war fuŋni n'abai, aha midini aftini lai.

³⁷ Asakal na pai a mra li ɗa, e kisi pai aha war Samariya, e piŋ woni lai.

³⁸ Won hlai n'e ɗa e mi saret zi gaw na wiini pai warɗi avai na Samariya ɗa, won hlai na hirgakai a hana felni Akab ɗa lai ɗa, zawarai e mi siɗi won hlai hanɗa lai maini seŋ n'EPIƊ-ƊAI a muɗaŋ ɗa nɵa.

³⁹ Labar na midini Akab gaini sdani n'a zaŋ paŋ ɗa, dilimi zi sesiyeŋ n'a rgiti, fuŋ n'abai n'a rgaŋ lai, hanɗa paŋ aŋ gaini ɗû war maktuɓ na wiiɗi paakai na Izrayel ɗa kai ɗi?

⁴⁰ Akab a mra, a hala gaiɗi tamaini. Akaziyas n'ahini a suma pai war balamni.

Yosafat pai na Yuda

⁴¹ Yosafat n'ahini Asa a suma pai midiɗi Yuda war buza n'ag'aŋ puɗu na Akab pai na Izrayel aŋ warɗi pai.

⁴² Yosafat a suma pai sek ɗa buzani doogo doogo hu pi ɵim. A za buza warɗi pai buza caaɓa pi ɵim aha war Yeruzalem. Emini yikiɗi ɓa Azuba, t'ahini Sili.

⁴³ A tikiti futi na wiini Asa epini war wazagai paŋ, a hiniti edi duk kai, a za sda na gaini futini arni EPIƊ-ƊAI.

⁴⁴ Gaini hanɗa paŋ hlai zi ɓaka na wiini alawai na zamai ɗa a vada edi kai: ɗai e hili wuzaɗi gaini wazagai n'e fiɗiŋ aŋ ɓaka gaini wazagai zi ɗûgûdi zi lûgûzi n'e yiŋ aŋ ɓaka war hlai hanɗa.

⁴⁵ Yosafat a sumna ɵeɗ arbani gaini pai na Izrayel.

⁴⁶ Labar na midini Yosafat, sdani n'a zaŋ, kurfukni na war hatam, hatam n'a hitimaŋ lai, hanɗa paŋ aŋ gaini ɗû war maktuɓ na wiiɗi paakai na Yuda kai ɗi?

⁴⁷ A vidiɗi zawarai na maɵagai gaiɗi na wiini alawai zamai n'e hinisi war mefeŋ na wiini Asa n'epini edi midini afti par.

⁴⁸ War mefeŋ ni ɗa, pai aŋ war Edom kai, aŋ woni ɗa a Lawan na pai na Yuda a tikaŋ ɗa.

⁴⁹ Yosafat a zizina hulamai n'abakai na Tarsis kapai a hala a mulasi or haa Ofir par, amma a za nɵa kir kai, buri smer a haɗa hulamai a Esiyon Geber.

⁵⁰ Nɵa Akaziyas n'ahini Akab a miɗini wiini Yosafat: a pɗem ɓa ɗaiŋa e hili gaiɗi ɗaiku, amma Yosafat a ɗiya kai.

⁵¹ Yosafat a mra, a hala gaiɗi tamaini e piŋ war fuŋ n'abai na wiini David. Yoram n'ahini a suma pai war balamni.

Akaziyas pai na Izrayel

⁵² Akaziyas n'ahini Akab a suma pai midiɗi Izrayel war Samariya war buza n'ag'aŋ doogo pi muguzak na Yosafat pai na Yuda aŋ warɗi pay. A suma pai midiɗi Izrayel buza sulu.

⁵³ A za wala na meefeŋ arni EPIƊ-ƊAI, a tikiti futi na wiini epini, na wiiɗi emini gaiɗi na wiini Yerobowam n'ahini Nebat n'a kiɗi ɗai na Izrayel war zini tuwur ɗa.

⁵⁴ A hurga azumai wuzani alaw Baal aŋ siiwaŋ, a za meefeŋ sini EPIƊ-ƊAI, Alaw na wiiɗi Izrayel kal kal maini n'epini a zaŋ ɗa nɵa.