Lokwita n'avut na wiiɗi paakai 18 - Ɗû na sɗik na wiini Alaw

Eliyas a muɗa edi miɗini dibini koɓro

¹ Mefeŋ a vuga viya war buza n'ag'aŋ hu na wiini koɓro, EPIƊ-ƊAI a miɗini wiini Eliyas war buza n'ag'aŋ hu maini nɵa: hala siŋka suku arni pai Akab, aga mu hina faŋ a ɵa midini afti.

² Eliyas a hala aŋ siŋka sini arni Akab. Wiyamai te riya amai war Samariya abai ta.

³ Akab a ɵina pini Obadiya na abai na midini dalamni. Kapai na ɗa Obadiya a ɗif n'a huna EPIƊ-ƊAI gara.

⁴ Nɵa, hlai na Yezabel te fiɗiɗi ɗai na mini Alaw na wiini EPIƊ-ƊAI edi ɗa, Obadiya a mula piɗi miya ɗaw a ŋûyiɗi war waŋ na sini huwuŋ sulu, waŋ paŋ ɗai warni doogo doogo ɵim ɵim, a siɗi wala zi simi gaini yem lai.

⁵ Akab a miɗini wiini Obadiya: hala midini afti paŋ, war hlai zi liwi yem paŋ, warni arakai paŋ lai, ablaŋtaŋkai ɗa mu nuvumusi kuzum mini plasaimu gaini plasaimu zi atoŋo agwi ɗi ɗa, kapai mu fuɗumu wazagaimu edi kir kai.

⁶ E ɓûrwi hlai tiɗi sa sa, Akab a tikiti futi kiini, Obadiya a tikiti na wiini lai.

⁷ Won hlai na Obadiya aŋ warɗi futi blaŋ, Eliyas a hala mini, Obadiya a sɗa Eliya ɗa a bla sini azumai, a pa arni azumai midini afti a muɗa: ku tuku Eliyas n'epin-geza tiɓ ɗi?

⁸ Eliyasa a wiyini seŋ: mu ta tiɓ, hala ku miɗini wiini Akab n'epin-gezaku ɓa, Eliyas ɗa aŋsi na.

⁹ Obadiya a miɗini: mu za zi meefeŋ ɗa a maɗa na kapai ku saŋa tini Akab aŋ fuɗaŋa edi ɗa?

¹⁰ Gaini EPIƊ-ƊAI, Alaw na wiiku zaŋ, pinziba ktai zaw, pai ktai n'a hina ta n'epin-gezaku Akab a ɵina ɗai aŋ piyuku warni kai aŋ kai. Won hlai n'e miɗini li ɓa k'aŋ woni kai ɗa, sai pai hanɗa, zaw pinziba hanɗa a ha wala mini haw ɓa, ku na ahaɗi kai.

¹¹ Tiyana ku muɗaŋa ɓa, mu hala mu miɗini wiini epin-geza ɓa Eliyas aŋsi na zaw ɗa.

¹² Won hlai n'aga mu fakaɗi suku par ɗa, seze na wiini EPIƊ-ƊAI aga a tukuku, a kuku war hlai zamai na ɗif a sɗaŋ kai, ta aga mu zini labar wiini Akab, amma aga a halasi a nuvuku kai, nɵa aga a fuɗaŋa ta ɗa edi, paŋktai haa war agwiyeŋeŋa par mu ha amai midini gadai na wiini EPIƊ-ƊAI kai.

¹³ E miɗiku wala na mu zaŋ Won hlai na Yezabel te fiɗiɗi ɗai na mini Alaw na wiini EPIƊ-ƊAI kai ɗi? Mu ŋoya zamai piɗi miya ɗaw, mu ɓûrwiɗi warni waŋ kiini kiini sulu sini huwuŋ, waŋ paŋ ɗa ɗai warni doogo doogo ɵim ɵim, mu siɗi simi, mu siɗi yem lai.

¹⁴ Tiyana ɗa ku muɗaŋa ɓa, mu hala, mu miɗini wiini epin-geza ɓa, Eliyas ɗa aŋsi na zaw ɗa, aga a fuɗaŋa edi koo.

¹⁵ Eliyas a wiyini seŋ, gaini EPIƊ-ƊAI, Alaw zi spak paŋ na mu na za ɵeŋni zaŋ, girna haa aga mu siŋka sa arni Akab.

Eliyas a siŋka sini arni pai Akab

¹⁶ Obadiya a hala a miɗini wiini Akab, a sini labar, nɵa Akab a hala a nava gaini Eliyas,

¹⁷ Won hlai na Akab a tala Eliyas, a miɗini: hanɗa ku tuku na ku glasi gir midiɗi aliɗi Izrayel ɗa ka.

¹⁸ Eliyas a miɗini, mu glasi gir midiɗi Izrayel ɗa mu ta kai, ku glaŋsi na ku tuku gaini pinzibani apuku, buri ki ɵini pini gadai na wiini EPIƊ-ƊAI kai, ki hûrgû azumai wuzani alawai Baal.

¹⁹ Tiyana ɗa, tipiɗisi ɗai na Izrayel paŋ edi sa, midiɗi huwuŋ Karmel gaiɗi ɗai na mini alaw Baal na miya puɗu gaini doogo doogo ɵim gaiɗi ɗai na mini Alaw Akera na miya puɗu n'e simi siɗi Yezabel par.

Eliyas gaiɗi ɗai na mini alaw Baal amai midiɗi huwuŋ Karmel

²⁰ Pai Akab a ɵina piɗi ɗai na Izrayel paŋ, a tipiɗisi ɗai na miɗi alawai paŋ amai midiɗi huwuŋ Karmel paŋ lai.

²¹ Eliyas a halasi a ɗiya wuzaɗi ɗai zaw, a muɗa: kapai siki yaw ɵa, ki ɗiyi miɗini aziki ktai kai haa kaswata ɗa.

²² Eliyas a miɗiɗi wiiɗi ɗai ɓa, mu hina aŋ ɗif na mini Alaw na wiini EPIƊ-ƊAI ɗa mu ta ktai, amma ɗai na mini alaw Baal ɗa e ɗa miya puɗu gaini doogo doogo ɵim.

²³ Eliyas a miɗiɗi wiiɗi ɗai ɓa, piyisi garakai sulu mu ziki ɓaka gaini, nagai e yimi ktai e fiɗiŋ, e ɗûklûŋ daf daf, e miliŋ miɗini luwuŋ ca ca, amma e tiki afu pini kai, ta ɗe mu za gaini na ktai nɵa lai, aga mu mula neŋ ɗa miɗini luwuŋ ca ca, amma mu pa afu pini kaalai.

²⁴ Asakal par aga ki siiwi Alaw na wiiki, ta ɗe aga mu siiwa EPIƊ-ƊAI lai, ni n'aga a ɵinasi afu miɗini ɓakani ɗa, Alaw a ni ɗa. Ɗai paŋ e wiyi seŋ ɓa, seŋ hanɗa pɗem.

²⁵ Eliyas a miɗiɗi wiiɗi ɗai na mini alaw Baal: yimi gari ktai, tiki piki avut buri tiki ki ɗa viya, ki siiwi Alaw na wiiki ɗa lai, amma ki tiki afu pini kai

²⁶ Ɗai na mini alaw Baal ɗa e yimi gari ktai arbani n'e kiŋsi ɗa par, e tiki piɗi gaini sdaɗi, e siiwi alaw Baal gorof par haa girvudi ta e miɗi: Baal wiyiyi seŋ wai kai ɗi, e didimi ɵimani gûwiŋ zi yi ɓaka, amma wule ktai a wa siɗi kaalai.

²⁷ Nɵa girvudi ta ɗa, Eliyas a tika pini aŋ ziɗi yewere a miɗiɗi: ki ɗûûli gaini gdaŋki, ni ɗa a Alaw aŋ tiki na ɗa ablaŋtaŋkai sda a suwa tini viya ɗi ɗa, zaw a na aha kai a hala a morkoi ɗi ɗa, zaw a na weseŋ ɗi ɗa, kapai a ɵiyasi amai.

²⁸ E ɗûûli gaini gdaŋɗi, e ɓisi siɗi gaini kaɵkar lai haa siɗi paŋ a fel kiini maini pini de na wiiɗi nɵa.

²⁹ Won hlai na girvudi te vuga vug, e tiki piɗi e miɗi seŋ na wuze haa sini ler na wiini ɓaka ta, amma wule ktai a wa siɗi kaalai, seŋ a waya siɗi kaalai. Wala ktai maa a za kai.

³⁰ Eliyas a miɗiɗi wiiɗi ɗai ɓa: tûrûsi sa gobi, ɗai paŋ e tûrûsi sini lai, a zizina gûwiŋ zi yi ɓaka na wiini EPIƊ-ƊAI n'a haɗa ɗa azumai.

³¹ A mula ali-fuŋ doogo pi sulu miɗini pɵaɗi alini Yakob, na miɗi a muɗa sini ba aga e yikiŋ ɓa Izrayel ɗa.

³² Gaini ali-fuŋ hanɗa, Eliyas a rga gûwiŋ zi yi ɓaka wiini EPIƊ-ƊAI. A ɓula waŋ sini ɗawwa, na warni a kiɗa a ma yem litir gobi doogo doogo hu.

³³ Eliyas a zizina luwuŋ miɗini ta ta, a ɗukla gari ɗa edi daf daf, a mula neŋ miɗini luwuŋ ca ca.

³⁴ Asakal par a miɗiɗi: vi argin puɗu gaini yem, ki miŋ miɗini wala zi ɓaka gaini luwuŋ ɗa. E zi maini n'a miɗiŋɗi nɵa. A miɗiɗi: wiyi pini ktai pra, e zi hanɗa, a muɗa pra: katawai ktai pra, e ziŋ azi n'ag'aŋ hu pra.

³⁵ Yem a bunda a ka ɵimani gûwiŋ zi yi ɓaka ɗa haa a va waŋ na ɵimani paŋ.

³⁶ War ler na wiini zini ɓaka ɗa, ɗif na mini Alaw Eliyas a torasi gobi sini gûwiŋ zi yi ɓaka a muɗa: EPIƊ-ƊAI, Alaw na wiini Abraham, na wiini Isaak, na wiini Yakob, siŋkiɗi wiiɗi ɗai girna ɓa, Alaw na warɗi Izrayel ɗa ku tuku, siŋkiɗi ɓa ta mu ɵeŋku, ɓa na mu zaŋ paŋ na ɗa, mu zaŋ na pini miɗi na wiiku.

³⁷ Wayaŋa seŋ EPIƊ-ƊAI, wayaŋa seŋ, kapai ɗai hanɗa e siɗi ɓa Alaw ɗa ku tuku EPIƊ-ƊAI, nɵa aga ku wayasi hiiniɗi ɗaiku suku lai.

³⁸ EPIƊ-ƊAI a hinasi afu amai par a ya wala zi ɓaka gaini luwuŋ gaini kriyit, gaini afti ɗa paŋ, a ca yem na war waŋ ɗa amai hat lai.

³⁹ Won hlai na ɗai e tili hanɗa, e hûrgû azumai, e pi arɗi azumai e miɗi: Alaw ɗa a EPIƊ-ƊAI, Alaw ɗa a EPIƊ-ƊAI.

⁴⁰ Eliyas a miɗiɗi: yimiɗi ɗai na mini alaw Baal ɗa, ki hini ɗif ktai ma a pra edi piɗi kai; ɗai e yimiɗi kafa. Eliyas a kiɗi azumai war huduk na Kison, a ɵa wulaɗi daf daf.

⁴¹ Eliyas a miɗini wiini Akab: faka amai, hala suma, ca lai, buri faŋ n'abai a na tuwasi.

⁴² Akab a faka a hala aŋ suma aŋ ca, amma Eliyas a niya amai merfeŋɗi huwuŋ Karmel, a hurga azumai a wa miɗini arbani kurnaini ɗik.

⁴³ A miɗini wiini ahiyagwini zi ɵeŋ: hala tala arku war gal na yem-ra n'abai ɗa aŋ woni sek ɗa haw ɗa, ni a hala a talasi arni a muɗa: wala ktai maa aŋ kai. Eliyas a miɗini ɓa a waya pra, a waya pra haa azi muguzak.

⁴⁴ Azi n'ag'aŋ muguzak ɗa, ahiyagwi zi ɵeŋ a miɗini: ɗugul aŋsi pini hlai par agwi nɵa ɗef. Eliyas a wiyini seŋ: hala miɗini wiini Akab ɓa a zizina plasaini a hala kapai faŋ n'abai ɗa a ɗalaŋ kai.

⁴⁵ hlai n'amai ɗa a tika pini a bunda gegeŋ wuzani sek sek tini ɗugul na gaini berber, faŋ n'abai a tika pini a ɵa. Akab a niya war saretni a hala a Yizreyel.

⁴⁶ EPIƊ-ƊAI a sini spak wiini Eliyas, a rga wuzani amai, a lawa wuzani saretni Akab ɗa ɵa haa aha miɗi Yizreyel ta.