Lokwita n'avut na wiiɗi paakai 16 - Ɗû na sɗik na wiini Alaw

¹ Seŋ na wiini EPIƊ-ƊAI a muɗa sini Yehu n'ahini Hananiya buri a miɗini wiini Basa maini nɵa:

² Ku na ka ɗif a suɗuku kai, mu zuku aŋ ɗif ta, mu tukuku aŋ pai midiɗi ɗaiŋa na Izrayel, amma ku tikiti ɗa te futi na wiini Yerobowam ɗa pra, ku kiɗi ɗaiŋa na Izrayel aŋ zi tuwur haa tuwurɗi a kaŋa war hiy.

³ Nɵa ɗa aga mu vidiki edi, tuku, Basa gaini pinzibaku paŋ, aga mu za sini pinzibaku maini na mu zaŋ sini pinzibani Yerobowam n'ahini Nebat ɗa nɵa.

⁴ Ɗai na war pinzibani Basa n'aga e mri aha war fuŋ n'abai ɗa, a limiɗi ɗa a hirgakai, nagai n'aga e mri edi war basga ɗa, a simiɗi ɗa a wala zi ɗufli n'arbani hlai n'amai lai.

⁵ Labar zamai na midini sdani Basa ɗa, gaini wazagai n'a zaŋ paŋ ɗa, gaini hatam n'a hitimaŋ lai ɗa aŋ gaini ɗû war maktuɓ n'e yikiŋ ɓa sda na wiiɗi paakai na Izrayel ɗa kai ɗi;

⁶ Basa a mra a hala gaiɗi tamaini, e piŋ a Tirsa. Ela n'ahini a suma pai war balamni.

⁷ Seŋ na wiini EPIƊ-ƊAI a muɗa sini Basa gaini pinzibani war mini ɗif na mini Alaw Yehu n'ahini Ha nani par pra, buri seŋ sulu, n'avut ɗa, buri meefeŋ na Basa a zaŋ wuzani arni EPIƊ-ƊAI a ɓilkini hiinini gaini sda n'a zaŋ gaini tini lai, haa a bunda kal kal maini pinzibani Yerobowam ɗa nɵa, n'ag'aŋ sulu ɗa buri a vidiɗi pinzibani Yerobowam edi ɗa a ni lai.

Ela, pai na Izrayel

⁸ War buza n'ag'aŋ caaɓa pi ɵaara na Asa pai na Yuda aŋ warɗi pay, Ela n'ahini Basa a suma pai midiɗi Izrayel a Tirsa buri buza sulu.

⁹ Abaiɗi askaraini ktai Zimri, na abai midini galni saret zi gaw, a rga warni aŋ zini meefeŋ. Pai a na fu a Tirsa ahani Arsa abai na midini dalamni pai ɗa aŋ sa haa a sina su.

¹⁰ Zimri a niya aha a fuɗaŋ, hanɗa a za war buza na caaɓa pi muguzak na Asa pai na Yuda aŋ warɗi pay, a suma pai war balamni lai.

¹¹ hlai n'a suma pai ta, a sumna midiɗi Paramai ɗa tar ɗa, a fiɗiɗi pinzibani Basa ɗa edi kafa, wus ktai maa a hina kai, zigelni a hina kai, marmaini kaalai.

¹² Zimri a vidiɗi pinzibani Basa ɗa edi kafa, maini seŋ n'EPIƊ-ƊAI a muɗaŋ war mini ɗif na mini Alaw burini Basa,

¹³ burini tuwur na wiini Basa gaini na wiini Ela n'ahini, nagai n'e ziŋ gaini n'e kiɗi ɗai na Izrayel woni aŋ zi ɗa lai, haa e ɓilkini hiinini EPIƊ-ƊAI, Alaw na wiiɗi Izrayel gaini alawaiɗi zi rgi na nafani aŋ kai ɗa.

¹⁴ Labar zamai na midini sdani Ela, sda n'a zaŋ paŋ ɗa aŋ gaini ɗû warni maktuɓ n'e yikiŋ ɓa, seda na wiiɗi paakai na Izrayel ɗa kai ɗi?

Zimri, pai na Izrayel

¹⁵ War buza n'ag'aŋ caaɓa pi muguzak na Asa pai na Yuda aŋ warɗi pay, Zimri a suma pai mefeŋ muguzak a Tirsa. Ɗai e ɗi fu edi mini hatam, e pi wuzaɗi Gibeton, fuŋ n'abai na wiiɗi Filistrekai.

¹⁶ Won hlai n'askarai n'e ɗa edi mini hatam e ɵini labar ɓa: Zimri a rga warni buri a zini meefeŋ wiini pai maa a fuɗaŋ su ɗa, mefeŋ ni dama, edi war kaŋɗi ɗa e viri Omri na abaiɗi ɗa ɗaw aŋ simiti pai midiɗi Izrayel.

¹⁷ Omri gaiɗi askarai na pini ɗa, e fikisi a Gibeton par e hilisi e cikiti Tirsa.

¹⁸ Won hlai na Zimri a tala ɓa Tirsa t'aŋ gaini tiki ɗaw ɗa, a niya amlai warɗi dilimi ktai dak, a ɵa afu piɗi su, te ya amlai miɗini, a mra.

¹⁹ A za nɵa buri tuwur n'a zaŋ, a paya payai na meefeŋ wuzani arni EPIƊ-ƊAI, a tikiti te futi na wiini Yerobowam ɗa, a za tuwur na Yerobowam a zaŋ ɗa, a kiɗi ɗai na Izrayel war tuwur maini ni nɵa lai.

²⁰ Labar zamai na midini sdani Zimri gaini meefeŋ n'a rgaŋ warni sini Ela ɗa lai aŋ gaini ɗû war maktuɓ n'e yikiŋ ɓa sda na wiiɗi paakai na Izrayel ɗa kaiɗi?

²¹ Nɵa ɗai na Izrayel e ɓûrwi azumai azi sulu, galɗi ktai ɗa a firiya ɓa a suma pai ɗa a Tibni, n'ahini Ginat, gal zamai ɗa a firiya ɗa a Omri lai.

²² Ɗai na pini Omri ɗa gdaŋɗi a sûwiɗi nagai na pini Tibni n'ahini Ginat ɗa suwai. Tibni a mra su, Omri a suma pai midiɗi Izrayel.

Omri, pai na Izrayel

²³ War buza n'ag'aŋ doogo doogo hu pi ktai na Asa pai na Yuda aŋ warɗi pay, Omri a suma pai midiɗi Izrayel haa buza doogo pi sulu, a za buza a Tirsa ɵaara,

²⁴ asakal par a wûriti huwuŋ a Samariya tini Semer par gaini sulai zi arzaŋ dubu ɵaara, a rga fuŋ n'abai ktai amai midiɗi huwuŋ hanɗa, a sini yiki ɓa: Samariya, yiki hanɗa a halasi sini yikini semer na epini gezaɗi huwuŋ ɗa par.

²⁵ Omri a za wazagai na maafanai wuzani arni EPIƊ-ƊAI, ni ɗa a pai na meefeŋ n'a sûwiɗi marni na wuzani par paŋ.

²⁶ A tikiti te futi na wiini Yerobowam n'ahini Nebat, haa a kiɗi ɗai na Izrayel aŋ zi meefeŋ kal kal maini Yerobowam nɵa lai, haa a ɓilkini hiinini EPIƊ-ƊAI, Alaw na wiiɗi Izrayel gaiɗi alawaiɗi zi rgi na nafani aŋ kai ɗa.

²⁷ Labar zamai na midini sdani Omri n'a zaŋ, gaini hitimi n'a hitimaŋ lai ɗa, aŋ gaini ɗû warni maktuɓ n'e yikiŋ ɓa sda na wiiɗi paakai na Izrayel ɗa kai ɗi?

²⁸ Omri a mra, a hala gaiɗi tamaini, e piŋ a Samariya, Akab n'ahini a suma pai war balamni.

Akab, pai na Izrayel

²⁹ War buza n'ag'aŋ doogo doogo hu pi mitwis, na Asa pai na Yuda aŋ warɗi pay, Akab n'ahini Omri a suma pai midiɗi Izrayel haa buza caaɓa pi sulu war Samariya.

³⁰ Akab n'ahini Omri a za wazagai na maafanai wuzani arni EPIƊ-ƊAI, a sûwiɗi marni na wuzani par paŋ.

³¹ A ɗiya sini tuwur na Yerobowam n'ahini Nebat a zaŋ ɗa ta kai, a hala haa a tikitisi Yezabel n'ahini Etbaal pai na Sidoniyakai ɗa ɗaw aŋ munini, a hurga azumai wuzani alaw Baal aŋ siiwa tini lai.

³² A rga gûwiŋ zi yi ɓaka burini Baal amlai warɗi dilimi n'a rgiti burini war Samariya.

³³ Akab a pa luwuŋ z'alaw amai tiɓ, a hala wuzani gaini sda na maafanai n'a ɓilkini hiinini EPIƊ-ƊAI, Alaw na wiiɗi Izrayel ɗa a sûwiɗi paakai na wiiɗi Izrayel na wuzani par ɗa paŋ.

³⁴ War sarti na wiini ɗa, Hiyel na Betel par a rgiti Yeriko amai, war tûrini eziɗi n'azumai ɗa, Abiram ahini n'abai ɗa a mra su, war pini porte na miɗi ɗa, Segud ahini n'asakal ɗa a mra su lai, maini miɗi n'EPIƊ-ƊAI a muɗaŋ war mini Yusuva n'ahini Nun ɗa nɵa.