Lokwita n'avut na wiiɗi paakai 15 - Ɗû na sɗik na wiini AlawAbiyyam, pai na Yuda 2 Ly. 13.1-3 , 22-23 1 War buza n'ag'aŋ doogo pi mitwis na Yerobowam n'ahini Nebat aŋ warɗi pai war Izrayel, Abiyam a bunda aŋ pai war Yuda. 2 A ŋa aŋ pai buza hu aha war Yeruzalem, emini yikiɗi ɓa, Maaka, t'ahini Absalom. 3 A za tuwur n'epini a zaŋ ka wuzani par paŋ, a dara EPIƊ-ƊAI, Alaw na wiini gaiɗi agulni ktai maini David na tiyni nɵa kai. 4 Burini David ɗa EPIƊ-ƊAI, Alaw na wiini a sini ahi ktai kapai a suma pai war balamni kapai pinzibaɗi pai ɗa a vada edi kai, Yeruzalem ɗe te hina aŋ fuŋ n'abai na wiini pai lai. 5 A za nɵa buri ɓa, David a paya payai na pɗem wuzani arni EPIƊ-ƊAI haa sini mrini ta, a za wala ktai na meefeŋ kai sai a seŋ na wiini Uriya na Hittite ɗa tar. 6 Robowam gaini Yerobowam e hini aŋ hitimi marɗi ɵa gamai. 7 Labar na zamai miɗini sda na Abiyam a zaŋ paŋ ɗa, aŋ gaini ɗû war maktuɓ n'e yikiŋ ɓa sda na wiiɗi paakai na Yuda kai ɗi, Abiyyam lai a za gaw gaini Yerobowam. 8 Abiyyam a hala gaiɗi tamaini, e piŋ war fuŋ n'abai na wiini David, Asa n'ahini a suma pai war balamni. Asa, pai na Yuda 2 Ly. 14.1-2 ; 15.16-19 ; 16.1-6 , 11-14 9 War buza n'ag'aŋ caaɓa na Yerobowam aŋ warɗi pay na wiiɗi Izrayel ɗa, Asa a bunda aŋ pai na Yuda 10 A ŋa buza doogo doogo puɗu pi ktai aha warɗi Yeruzalem, edini yikiɗi ɓa Maaka t'ahini Absalom. 11 Asa a paya pɗem arni EPIƊ-ƊAI maini David na tiyni nɵa. 12 A birgiɗi maɵagai gaiɗi falakai zi zawar burini alawai na zamai ɗa edi midini afti par, a tuura alawai zi rgi na tamaini e rgiŋ ɗa edi. 13 Hormoɗi edini na ɓa te muni n'amai ɗa a vadaŋ edi, buri te rga alaw zi rgi na hihir na wiiɗi alaw n'e yikiti ɓa Akera, pin hiiniɗi na meefeŋ ɗa. Asa a haɗaŋ azumai, a yaŋ edi war huduk na Sedron lai. 14 Haa sini mrini ta, Asa a dara EPIƊ-ƊAI gaiɗi agulni paŋ, amma paŋktai hlai zi ɓaka na wiiɗi alawai na zamai ɗa a vada edi paŋ kai. 15 Asa a kasi like na ni gaini epini e siŋni Alaw ɗa maini arzaŋ or gaini wazagai n'e zi sda gaini war tempel amlai war Dalam na wiini EPIƊ-ƊAI. 16 Asa pai na Yuda gaini Basa pai na Izrayel e hini aŋ gaw gaiɗi marɗi gamai. 17 Mefeŋ ktai, Basa pai na Izrayel a hala aŋ hitima gaiɗi Yuda, a rga ɵaga siɗi Rama kapai Asa pai na Yuda gaiɗi ɗaini e niyisi woni ɗaw kai. 18 Asa a mula arzaŋ gaini or n'a hina amlai war Dalam na wiini EPIƊ-ƊAI, gaini na wiini pai lai a siŋɗi tiɗi ɗaini n'abakai buri e kiŋni wiini Ben-Hadad n'ahini Tabrimon, n'ahini Hesiyon pai na Siriya n'a na war Damaskus, a siɗi miɗi miɗi maini nɵa: 19 Apuku gaini apa e zi ka bonu arbaɗi, tuku gaya ta ɗa hulumu wuzamu gaini bonu hanɗa, arzaŋ gaini or a na agwi aŋ katu. Hala ɗuklasi bonu n'a na arbaku gaini Basa pai na Izrayel ɗa ɗaf, kapai a yimaɗi warni edi sa par kaai. 20 Ben-Hadad a yima seŋni pai Asa ɗa, a ɵiniɗi abakaiɗi askaraini aŋ hitimi fuŋ n'abakai na war Izrayel, e milisi fuŋ n'abakai hanɗa: Iyyon, Dan, Abel-Bet-Maaka, afti na Kinerot gaini afti na Neftali ɗa paŋ lai. 21 Won hlai na Basa a ɵina labar hanɗa tar ɗa, a ɗiya ɵaga zi rgi na sini Rama zaw, a wayasi a sumna a Tirsa. 22 Nɵa, pai Asa a diŋgiɗisi ɗai na Yuda paŋ kafa, ɓraw arbayi kai, kapai e hili e milisi ali-fuŋ gaini luwuŋ na Basa a firiya a rga ɵaga na siɗi Rama gaini ɗa. Pai Asa a rga ɵaga gaini siɗi Geba na war Benyamin gaiɗi Mispa. 23 Labar zamai na midini sdani Asa, kurfukni na war hatam, sdani n'a zaŋ ɗa paŋ, fuŋ n'abakai n'a rgaŋ ɗa paŋ, aŋ gaini ɗû war maktuɓ n'e yikiŋ ɓa sda na wiiɗi paakai na Yuda kai ɗi, meefeŋ n'agwi ɓa, hlai n'a za wel ta ɗa, veglek a yimaŋ sini azini. 24 Asa a tapa gaiɗi tamaini, e piŋ gaiɗi tamaini war fuŋ n'abai na wiini David na tiyni. Yosafat n'ahini a suma pai war balamni. Nadab, pai na Izrayel 25 Nadab n'ahini Yerobowam a bunda aŋ pai na Izrayel war buza n'ag'aŋ sulu na Asa aŋ warɗi pay, a suma pai midiɗi Izrayel buza sulu. 26 A paya payai na meefeŋ wuzani arni EPIƊ-ƊAI, a tikiti te futi na wiini epini ɗa, a kiɗi ɗai na Izrayel aŋ zi meefeŋ kal kal maini n'epini a kiɗi ɗai aŋ ziŋ ɗa nɵa. 27 Basa n'ahini Ahiyya na war pinzibani Isakar a rga warni aŋ zini meefeŋ wiini Nadab a fuɗaŋ a Gibeton fuŋ n'abai na wiiɗi Filistrekai, war hlai na Nadab gaiɗi ɗai na Izrayel paŋ e cikiti Gibeton, 28 Basa a fuɗa Nadab war buza n'ag'aŋ hu na Asa pai na Yuda aŋ warɗi pai, a suma pai war balamni. 29 Won hlai na Basa a suma pai ta tar ɗa, a fiɗiɗi pinzibani Yerobowam edi kafa, a hina ɗif ktai maa piɗi kai, maini n'EPIƊ-ƊAI a muɗaŋ war mini ɵeŋni Ahiyya na Silo par ɗa nɵa. 30 A za nɵa buri tuwur na Yerobowam a zaŋ, gaini n'a kiɗi ɗai aŋ ziŋ ɗa lai, wala hanɗa a glasi hiy na wiini EPIƊ-ƊAI, Alaw na wiiɗi Izrayel. 31 Labar zamai na midini sdani Nadab ɗa, gaini wazagai n'a zaŋ paŋ ɗa aŋ gaini ɗû war maktuɓ n'e yikiŋ ɓa sdaɗi paakai na wiiɗi Izrayel ɗa kai ɗi? 32 Asa gaini Basa e hini aŋ hitimi marɗi ɵa gamai. Basa, pai na Izrayel 33 War buza n'ag'aŋ hu na Asa pai na Yuda aŋ warɗi pai, Basa n'ahini Ahiyya, a suma pai midiɗi Izrayel paŋ, a sumna war Tirsa haa buza caaɓa pi puɗu. 34 A paya payai na meefeŋ wuzani arni EPIƊ-ƊAI, a tikiti te futi na wiini Yerobowam, a za ɗa a tuwur na Yerobowam a kiɗi ɗai na Izrayel aŋ ziŋ ɵa kal kal. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon