Lokwita n'avut na wiiɗi paakai 13 - Ɗû na sɗik na wiini Alaw

Seŋ na wuze na midiɗi Bet-El

¹ Ɗif na wiini Alaw ktai a halasi a Yuda par war Betel pini miɗi na wiini EPIƊ-ƊAI, a navasi Yerobowam mini gûwiŋ zi yi ɓaka zaw aŋ ya wazagai zi ɗûgûdi zi lûgûzi ɗa.

² Pini miɗi na wiini EPIƊ-ƊAI ɗa a ɗuula sini gûwiŋ zi yi ɓaka maini nɵa: gûwiŋ zi yi ɓaka, gûwiŋ zi yi ɓaka, EPIƊ-ƊAI a na muɗa maini nɵa: tala ahi ktai aga a wa war pinzibani David, yikini ɓa Yoziyas, aga a fiɗiɗi paakai zi ɓaka na midini hlai zi ɓaka n'e ɗa yi wazagai zi ɗûgûdi zi lûgûzi muduku ɗa aŋ ɓaka, aga e yi keɵke na wiiɗi ɗai muduku lai.

³ Mefeŋni dama ɗif na wiini Alaw a miɗini ɓa wala zi siŋki ktai aga a za maini nɵa, gûwiŋ zi yi ɓaka ɗa aga a haɗa azumai, bononi wazagai z'emel n'e zi ɓaka gaini ɗa aga a daza azumai lai, kapai a yima midiki ɓa hanɗa a miɗi na wiini EPIƊ-ƊAI.

⁴ Hlai n'a ɵina seŋ na ɗif na wiini Alaw a na muɗaŋ sini gûwiŋ zi yi ɓaka na war Betel ɗa, pai Yerobowam a yimasi tini edi miɗini gûwiŋ zi yi ɓaka par a ɗuula a muɗa: yimi ɗif hanɗa. Amma tini n'a miɗiti edi sini ɗif na wiini Alaw te huula kaŋ, a kiɗa a wiyitisi amlai sini kir kai.

⁵ gûwiŋ zi ɓaka ɗa a haɗa, bononi wazagai z'emel n'e zi ɓaka gaini ɗa a daza azumai lai, maini na ɗif na wiini Alaw a muɗaŋ pini miɗi na wiini EPIƊ-ƊAI ɗa nɵa.

⁶ Nɵa, Pai a miɗini wiini ɗif na wiini Alaw ɓa: mu siiwuku, siiwa EPIƊ-ƊAI, Alaw na wiiku ɗa, siiwa buriya kapai ta te wayasi amlai sa. Ɗif na wiini Alaw a siiwa Alaw, tini pai te waya warni aziɗi n'avut.

⁷ Pai a miɗini wiini ɗif na wiini Alaw ɓa: hulumu ahaya sek, ku suma ta, mu suku katu ta lai.

⁸ Ɗif na wiini Alaw a miɗini wiini pai, koo ku saŋa ɗa a galni wazagaiku tekeɗeɗi aga mu niyaɗi ahaku kai, mu suma wala won na kai, mu ca yem won na kaalai.

⁹ Buri EPIƊ-ƊAI a muɗaŋa maini nɵa: ku hala na ɗa, ku suma wala kaalai, ku ca yem kaalai, futi na ku hala warɗi ɗa, ku wayasi warɗi ɗaw kaalai.

¹⁰ Ɗif na wiini Alaw a tikiti futi zamai a hala wiini, a niya warɗi futi n'a halasi a Betel sek warɗi ɗaw kai.

Ɗif na wiini Alaw a ha amai midini gadai

¹¹ Ɗif na mini Alaw na wel ktai a na fu aha war Betel, ktai arbaɗi alini a halasi a miɗini gaini wala na ɗif na wiini Alaw a zaŋ war mefeŋ ni ɗa, gaini seŋ paŋ n'a miɗiŋni wiini pai lai.

¹² Apiɗi a zilbiɗi: a vuga warɗi futi na wa ta ɗa, alini e zilbitinisi futi na ɗif na wiini Alaw n'a halasi a Yuda par a tikiti ɗa.

¹³ A miɗiɗi wiiɗi alini: zizinitiŋa ablehoiŋa ɗa, e zizinitini ablehoini ɗa, a niya duɓaɗi.

¹⁴ A tika futi pini ɗif na wiini Alaw, a navaŋ azumai pini luwuŋ ktai n'abai dam a zilbaŋ a muɗa: ku ɗif na wiini Alaw n'a halasi a Yuda par tiɓ ɗi? Ɗif a wiyini seŋ a muɗa: Mu ta tiɓ.

¹⁵ Ɗif na mini Alaw a miɗini: Halasi gaya kapai ku suma wala agwi.

¹⁶ Ɗif na wiini Alaw a wiyini seŋ: zaw kai, mu kiɗa mu wayaɗi duɓa kai, mu kiɗa mu halaɗi gaiku kaalai, aga mu suma wala gaiku kai, mu ca yem gaiku war Betel kaalai.

¹⁷ Buri EPIƊ-ƊAI a muɗaŋa edi gaglai ɓa: aga mu suma wala woni kai, mu ca yem woni kaalai. Futi na mu hala sek warɗi ɗa, mu wayasi warɗi ɗaw kaalai.

¹⁸ Ɗif na mini Alaw na wel ɗa a miɗini: ta mu ɗif na mini Alaw maiku ɵa lai. EPIƊ-ƊAI a ɵinasi ɗif zi ɵeŋ sa a muɗaŋasi ɓa: mu halasi mu yukukuɗi, mu kuku ahaya ta kapai ku suma wala agwi lai, ku ca yem do lai. Kapai a za na eles

¹⁹ Ɗif na wiini Alaw a waya gaini a Betel, aha war dalamni, a sini simi a suma, a sini yem a ca lai.

Ɗif na wiini Alaw ɗa gurnai a fuɗaŋ edi

²⁰ Amma war hlai n'e ɗa simi ɗa, miɗi na wiini EPIƊ-ƊAI a muɗa sini ɗif na mini Alaw na wel n'a wayasi ɗif na wiini Alaw ahani war Betel;

²¹ ɗif na mini Alaw na wel ɗa a miɗini wiini ɗif na wiini Alaw n'a halasi a Yuda par ɓa: EPIƊ-ƊAI a na muɗa maini nɵa: buri ku ɵina pini miɗi na EPIƊ-ƊAI a muɗuŋku kai, ku za pini gadai n'EPIƊ-ƊAI, Alaw na wiiku a guduku midini kai,

²² buri ku wayasi a Betel ku suma, ku ca yem lai, paŋktai a hlai n'EPIƊ-ƊAI a muɗuku gaini ya ɓa: aga ku suma wala woni kai, ku ca yem woni kaalai ɗa, tiyana burini hanɗa, aga ku mra, koponku aga a pa war waŋ zi pi na wiiɗi tiyakaiku kai.

²³ Asakal n'e simi ya, n'e ci ya lai ɗa, ɗif na mini Alaw na wel a zizinini ablehö wiini ɗif na wiini Alaw n'a wayaŋsi a Betel ɗa,

²⁴ ɗif na wiini Alaw a faka a hala, warɗi futi a nava gaini gurnai, gurnai a fuɗaŋ. Kopoŋni a hina warɗi futi su, ablehö ɗa war galni na hanɗa par zaw, gurnai na par zaw lai.

²⁵ Ɗai n'e vigisi warɗi futi hanɗa, e tili kopoŋ azumai waŋ, gurnai ɵimani zaw, e kisi labar hanɗa aha war Betel, fuŋ n'abai na ɗif na mini Alaw na wel ɗa a na aha warni.

²⁶ Won hlai na ɗif na mini Alaw na wel ɗa a ɵina labar hanɗa a muɗa: hanɗa a ɗif na wiini Alaw n'a ɵina pini miɗi n'EPIƊ-ƊAI a miɗiŋni kai ɗa, EPIƊ-ƊAI a saŋ mini gurnai, gurnai a haɗaŋ a fuɗaŋ lai na ɗa pini miɗi n'EPIƊ-ƊAI a miɗiŋni ɗa.

²⁷ A miɗiɗi wiiɗi alini buri e zizinini ablehöni ɗa, alini e ziziniŋni lai.

²⁸ a hala a nava kopon azumai warɗi futi waŋ, ablehö gaini gurnai ɗa ɵimani ca. Gurnai ɗa a luma kopoŋni ɗif kai, a luma ablehö ɗa kaalai.

²⁹ Ɗif na mini Alaw a tika kopoŋni ɗif na wiini Alaw ɗa, a tikaŋ duɓani ablehöni ta, a wayaŋsi a Betel, a zizina tuwini gaini pini lai.

³⁰ A paŋ war waŋ na wiini dama, ɗai e tûwiŋ maini nɵa: aiya tawala ɗa! aiya tawala ɗa!

³¹ Asakalni pini par, ɗif na mini Alaw na wel ɗa a miɗiɗi wiiɗi alini ɓa: hlai na mu mra li ɗa, ki piŋa war waŋ n'e pi ɗif na wiini Alaw warni ɗa. ki tiki kopoŋŋa ɵimani kopoŋni ta.

³² Buri ɓa seŋ n'a muɗaŋ burini gûwiŋ zi yi ɓaka na Betel, gaini dalam na war hlai zi ɓaka n'a na war fuŋ n'abakai na Samariya lai ɗa, aga a va amai fakat fakat, a miɗi na sini EPIƊ-ƊAI par.

³³ Gaini hanɗa paŋ ɗa, Yerobowam a hina payaini na meefeŋ ɗa edi kai. A miliɗi aŋ paakai zi ɓaka ɗa e ɗi ɗai na war pini zibani Levi kai ɗa ɵa, ɗif n'a firiya a za aŋ pai zi ɓaka war hlai zi ɓaka ɗa a tikaŋ a mini emel midini tar.

³⁴ Tuwur na wiini pinzibani Yerobowam ɗa a ni ɗa, pinziba hanɗa a tuura edi, a vada edi midini afti par gamai ɗa buri hanɗa.