Lokwita n'avut na wiiɗi paakai 12 - Ɗû na sɗik na wiini Alaw

Sispai n'arbaɗi pinzibaɗi Izrayel na doogo gaini pai Robowam

¹ Robowam a hala a Sikem buri ɓa pinzibaɗi Izrayel na doogo paŋ e hilisi e ɗi a Sikem buri e tikiŋ aŋ pai.

² Amma hlai na Yerobowam n'ahini Nebat a ɵinasi labar hanɗa aŋsi edi war Egipte hai, buri a pra edi woni wuzani pai Salmun, a sumnasi edi woni.

³ Ɗai e ɵini pini Yerobowam aŋ yikiŋsi, a halasi gaiɗi ɗai na Izrayel ɗa paŋ, e miɗini wiini Robowam maini nɵa:

⁴ apuku a yimiyi maiɗi bagakai ɵa, a tika sda zi gir midiyi lai, tiyana ɗa, na ɓa tuku ku ɵiyi smer li siyi agwi ɗa, aga mi hini aŋ ɗaiku ɵa.

⁵ Robowam a wiyiɗi seŋ a muɗa: hili, ki zisi mefeŋ hu kapai ki wiyisi. Ɗai e hili wiiɗi.

⁶ Pai Robowam a paya yel siɗi n'abakai n'e zika sda gaini Salmun n'epini par, a zilbiɗi: tiki ki firiyi ɓa mu wiyiɗi seŋ wiiɗi ɗai hanɗa ɓa maɵa ɗa?

⁷ E wiyini seŋ ɓa: na ɓa girna ku ɵa suku li azumai siɗi su, na ɓa ku na zina piɗi, ku na miɗiɗi seŋ na pɗem lai ɗa, aga e hini aŋ ɗaiku ɵa haa kureɗ.

⁸ Amma Robowam a yima gadai na n'abakai e siŋni ɗa kai, a zilbiɗi marni n'e wili gaini n'e ɗa gaini war sda,

⁹ a miɗiɗi: Tiki ɗa ki miɗi maɵa lai ɗa, ki firiyi ɓa mu wuyuɗumu seŋ wiiɗi ɗai n'e hilisi e zilbiŋa ɓa mu ɵiɗi smer siɗi agwi, mu tika sda zi gir na apa a tikaŋ midiɗi edi agwi lai maɵa ɗa?

¹⁰ Marni na gawlakai n'e wili gaini e wiyi seŋ ɓa: aga ku miɗiɗi wiiɗi ɗai n'e hilisi e muɗuku ɓa: apuku a tikiyi sda zi gir midiyi, amma tuku ku ɵiyi smer siyi agwi lai ɗa ɓa: ahi ta n'agwi ɗa, spakɗi a suwa graŋni apa ɗa.

¹¹ Apa a tikiki gir midiki, tiyana par ɗa ta aga mu riya gir hanɗa amai, ni a ɵiɓiki gaini daɓala z'amur, ta mu ɵiɓiki gaini daɓala n'aŋ mini ɗa a kawai.

¹² Yerobowam gaiɗi ɗai na gaini paŋ e hilisi sini Robowam war mefeŋ n'ag'aŋ hu maini n'a miɗiɗi ɓa: e wiyisi sini war mefeŋ n'ag'aŋ hu ɗa nɵa.

¹³ Pai Robowam a wiyiɗi seŋ wiiɗi ɗai gaini wule na gdaŋ, a hina gadai na n'abakai e siŋni ɗa edi ta,

¹⁴ A wiyiɗi seŋ gaini hiini na wiiɗi marni na gawlakai maini nɵa: apa a tikiki gir midiki, ta aga mu riya gir hanɗa amai, apa a ɵiɓiki gaini daɓala z'amur, ta aga mu ɵiɓiki gaini daɓala n'aŋ mini ɗa a kawai.

¹⁵ Na ɓa pai ɗa a ɵina miɗi ɗai kai ɗa, a wala n'Alaw a zaŋ ɓa kapai seŋ n'EPIƊ-ƊAI a miɗiŋni wiini Yerobowam n'ahini Nebat war mini ɗif na mini Alaw Ahiyya na Silo par a va amai.

Ɓrawɗi pai

¹⁶ Won hlai n'aliɗi Izrayel paŋ e tili ɓa pai a dara a ɵina seŋɗi kai ɗa, e wiyini seŋ e miɗi: arbayi na gaini David ɗa a maɗa? Wala ktai maa arbayi gaini ahini Isai hanɗa kai koo! Tumu Izrayel na war pinziba na doogo ɗa, wuyumu aha! tuku na war pinzibani David ɗa, za gaiɗi ɗai na war pinzibaku ɗa! wuyumu wiimu aha. Asakal par pinzibaɗi Izrayel na doogo ɗa e wiyi ahaɗi.

¹⁷ E hini e siɗi Robowam aŋ pai ɗa e ɗi nagai n'e ɗa aŋ fuŋ midini afti na Yuda ɗa.

¹⁸ Pai a ɵina Adoram abai na midini sda zi dewele siɗi pinziba na doogo ɗa, nagai e biliŋ gaini kriyit, e fiɗiŋ edi. Pai Robowam a niya amai midiɗi saretni aŋ lawa aha war Yeruzalem ciɗek ciɗek.

¹⁹ Pinziba na doogo ɗa e ɓûrwi edi siɗi nagai na war gal n'amai sek ɗa arbaɗi a hina haa girna.

²⁰ Won hlai n'aliɗi Izrayel na war pinziba na doogo e ɵini ɓa Yerobowam a wayasi aha ya, e ɵini pini e yikiŋsi war diŋgi na wiiɗi, e tikiŋ aŋ pai midiɗi; a hina pini pinziba na wiini David ɗa a pinziba na wiini Yuda tar.

²¹ Won hlai na Robowam a cosi aha a Yeruzalem tar a tipiɗi pinzibani Yuda gaini Benyamin lai, a nava askarai zi hatam dubu miya gaini doogo doogo mitwis, kapai e hili e hitimi gaiɗi pinziba na doogo, e wiyiɗisi amlai pini pai Robowam n'ahini Salmun.

²² Amma EPIƊ-ƊAI a miɗini wiini Semaya ɗif na mini Alaw maini nɵa:

²³ hala ku miɗini wini Robowam n'ahini Salmun pai na Yuda, ɗai na Yuda paŋ, na Benyamin paŋ gaiɗi ɗai zamai n'e hini lai ɓa:

²⁴ EPIƊ-ƊAI a na muɗa maini nɵa: ki hili ki hitimiɗi tawalakaiki kai, asiya ɗi paŋ a waya aha, buri seŋ hanɗa mu zaŋ mu ta. E yimi seŋ na wiini EPIƊ-ƊAI, e hini hatam na gaini Yerobowam ɗa mak.

²⁵ Yerobowam a rgiti Sikem amai, amai midini hlai zi huwuŋ na wiini Efrayim, a sumna warɗi lai. Asakal par a zogo woni par a hala a rgiti Penuwel amai.

Ɓraw na wiini yimi

²⁶ Pai Yerobowam a hiina a muɗa: hlai mu talaŋ na ɗa, pai te kiɗa te waya sini pinzibani David sike,

²⁷ na ɓa ɗai hanɗa, e ɗa e hili amai a Yeruzalem aŋ zi ɓaka amlai war Dalam na wiini EPIƊ-ƊAI ɵa yaw ɗa, hiiniɗi aga a waya pini epingezaɗi, Robowam pai na Yuda. Aga e fiɗiŋa edi su, e wiyi pini Robowam pai na Yuda wai lai kaai.

²⁸ Pai Yerobowam a hiina haa a rga ali garakai zi or sulu, a miɗiɗi wiiɗi ɗai na wiini ɓa: tiki ki hili amai a Yeruzalem ɗa a viya, ɵa ta. Tili, tiki na war pinziba na doogo ɗa, alawaiki n'e kûrɗikisi edi war Egipte par ɗa e ɗi na.

²⁹ A ɗiya ktai ɗa a Betel zaw, na ktai ɗa a Dan zaw lai.

³⁰ Hanɗa a tuwur na Yerobowam a zaŋ ɗa, ɗai e ziɓi pini ahini gari na ktai haa a Dan ta.

³¹ Yerobowam a rga dalam n'e siiwi warni war hlai zi ɓaka ɗa, a mula ɗai arbani vok ɗa par a ziɗi aŋ paakai zi ɓaka, e ɗi ɗai na war pinzibani Levi par kaalai.

³² Yerobowam a ɗiyiti fet ktai war mefeŋ n'ag'aŋ doogo pi ɵim na wiini tile n'ag'aŋ mitwis, maiɗi fet n'e ɗa e ziti amai war Yuda ɗa nɵa, a za ɓaka miɗini gûwiŋ zi yi ɓaka ɗa a ni gaini midini, war Betel a za ɓaka wiini ali garakai n'a zizinaŋ ɗa, pra a miliɗi paakai zi ɓaka n'a viriɗi midini hlai zi ɓaka n'a zaŋ ta ta ɗa war sda.

³³ War mefeŋ n'ag'aŋ doogo pi ɵim na wiini tile n'ag'aŋ mitwis, mefeŋ na Yerobowam dama a ɗiyaŋ pini hinini, a ziti fet buriɗi pinziba na doogo ɗa, a za ɓaka miɗini gûwiŋ zi yi ɓaka n'a zizinaŋ ɗa a ni war suŋfani lai.