Lokwita n'avut na wiiɗi paakai 10 - Ɗû na sɗik na wiini Alaw

Pai na muni na Saba par te hala aŋ ɗugula Salmun

¹ Pai na muni na Saba par te ɵina labarni Salmun n'a na wa edi, te halasi aŋ tetemaŋ gaini seŋ joro.

² Te cosi a Yeruzalem gaiɗi ɗai piɗi viya, gaini ɵigini na gaini wazagai zi ɗûgûdi n'a luguza pɗem viya, gaini or viya, alini fuŋ na pɗamai viya lai. Won hlai na te co sini Salmun, te zilbaŋ midini seŋ paŋ na te hiinaŋ warɗi agulɗi.

³ Salmun a wiyiɗi seŋ midini zilbiɗi paŋ, zilbi ktai n'a ɵina ezini edi kai, n'a kiɗa a wiyiɗi seŋ pini kai aŋ kai.

⁴ Pai na muni na Saba te tala yel na wiini Salmun, dalam zi pai na wiini n'argaŋ,

⁵ wazagai zi simi na midiɗi tabelni, dalamɗi ɗaini zi sda, navarɗi ɗaini zi sda gaini sapa n'e wiŋ siɗi, navarɗi ɗai n'e sini wala zi ci, ɓaka zi yi na Salmun a zaŋ amlai war Dalam na wiini EPIƊ-ƊAI lai ɗa, agulɗi a ɵiɓiti tiɓ.

⁶ Te miɗini wiini Pai: kapai seŋ na mu ɵinaŋ muduku aha miɗini aftiŋa par, miɗini seŋku zi miɗi gaini yelku lai na ɗa a jre sike.

⁷ Hlai na mu halasi kai hai, na ara a tala kai hai lai ɗa, mu yima seŋ hanɗa duk kai, paŋktai n'e miɗiŋa ɗa a kiɗa galni yelku na gaini abaini kai, labar n'a wa edi muku na ɗa a na agwi kadai.

⁸ ɵeɗ midiɗi ɗai n'ahaku, midiɗi ɗaiku zi sda, nagai n'e ɗa mefeŋ paŋ wuzani arku aŋ ɵini seŋku zi miɗi zi yel ɗa.

⁹ Kol sini EPIƊ-ƊAI, Alaw na wiiku, n'a firiya a tukuku aŋ pai midiɗi Paramai na wiiɗi Izrayel, a zaŋ nɵa buri EPIƊ-ƊAI, Alaw na wiiku a diriɗi ɗai na Izrayel, a firiya ɓa pinziba hanɗa a vada edi kai, nɵa a tukuku miɗini aŋ pai kapai ku ɵa wuzaɗi ɗai war jre, ku hitriɗi ɗai aŋ zi pini gadai ɗa lai.

¹⁰ Te sini or wiini pai Salmun kilo dubu hu gaini miya ɵim, wazagai zi ɗûgûdi n'a luguza pɗem gaini ali-fuŋ na pɗamai lai viya kadai, wazagai zi ɗûgûdi na viya maini hanɗa ɵa a sa ka sini pai Salmun duk kai.

¹¹ Hulamai n'abakai na wiini pai Hiram n'a kasi or na Ofir par, a kasi luwuŋ Santal viya gaini ali-fuŋ na pɗamai lai.

¹² Gaini luwuŋ santal hanɗa, pai a zizina hlai n'e pi koŋ tiɗi miɗini amlai warɗi dilimi na wiini EPIƊ-ƊAI gaini na wiini ni lai, a zizina gaŋgraŋ gaini adill wiiɗi ɗai zi zini yama lai. Sini mefeŋ ni par haa girna, luwuŋ santal na viya maini hanɗa ɵa, a niyasi ka aha warɗi Izrayel duk kai.

¹³ Wala na pai na Saba te firiyaŋ paŋ ɗa, pai Salmun a siŋɗi paŋ, pra a siɗi katu, n'a saŋ nɵa ɗa sai a pai Salmun tar. Asakal par te waya, te hala aha midini aftiɗi, na gaiɗi ɗaiɗi na piɗi.

Spak gaini farai na wiini Salmun

¹⁴ Gumani or n'a niya aha war Yeruzalem sini Salmun war buza ɗa a na kilo dubu caaɓa,

¹⁵ na morkokoi na gaini eziɗi yaw gaiɗi ɗai zi sakala, gaiɗi paakai n'edi par, gaiɗi lawaŋai lai e virgiŋ ɗa, pɵani arni kai.

¹⁶ Pai Salmun a za gamar n'abakai miya sulu gaini or zi hiliyi, gamar paŋ a ɓa or kilo ɵaara ɵaara,

¹⁷ a za gamar n'agogoi miya hu gaini or zi hiliyi, gamar paŋ a ba or kilo ɗaw gaini gal gal. Pai a mula gamar ɗa paŋ amlai warɗi dilimi n'e yikiti ɓa “jur na Liban”.

¹⁸ Pai a rgiti Paramai n'amai gaini sesiyeŋ pekne, asakal par a ɵirɓiti gaini or na gaini futini.

¹⁹ Paramai hanɗa ɓok n'e niyi miɗini siɗi ta ta ɵaara, hlai n'e ɵi duɓaɗi sini gaini rûɗi edi, hlai n'e pi koŋ-tiɗi midini a na war galɗi sulu paŋ, gurnai ɵimani sulu lai, na ktai na par, ktai na par lai,

²⁰ ɓok na ɵaara ɗa e zizini gurnai ɵimani doogo pi sulu, na par ɵaara lai, na par ɵaara lai. Ɗif a za ka wala na maini hanɗa nɵa midiɗi pai ktai duk kai.

²¹ Kopai zi ci wala na wiini Salmun ɗa a zi or, wazagai n'amlai warɗi dilimi n'e yikiti ɓa jur na Liban ɗa paŋ a zi or na gaini futini, na zi arzaŋ arbani kai. Buri war mefeŋ na wiini pai Salmun ɗa, arzaŋ ɗa a tala maini wala na nafani aŋ kai nɵa.

²² Buri ɓa pai Salmun a na fu gaini hulamai n'abakai agoɗom viya n'a hala war Tarsis gaini na wiini Hiram. Buza n'ag'aŋ hu paŋ, hulamai hanɗa a wayasi war Tarsis par gaini vi ca ca gaini or, arzaŋ, sesiyeŋ pekne, aviryagu gaini wala zi ɗufli na juvai lai.

²³ Pai Salmun a bunda abai a sûwiɗi paakai na midiɗi yai paŋ buri faraini, burini yelni lai.

²⁴ Ɗai paŋ e piyi futi aŋ nivi gaini Salmun kapai e tili yel n'Alaw a siŋni ɗa.

²⁵ Buza buza paŋ, asiya ɗi paŋ a kinisi like: wazagai zi arzaŋ gaini zi or, sapa zi wi si, wazagai zi gaw, wasagai zi ɗûgûdi zi lûgûzi, plasai gaini plasai atoŋo lai.

²⁶ Salmun a tapa saret zi gaw gaini plasai, pɵani ɗa, saret dubu gaini miya puɗu, plasai dubu doogo pi sulu lai, a mula zamai sini gobi aha war Yeruzalem, na zamai ɗa a ɵinaŋ war fuŋ n'abakai na wazagai zi hatam aŋ woni ɗa.

²⁷ Pini barkani pai ɗa, arzaŋ a bunda aha war Yeruzalem viya kadai maini ali-fuŋ nɵa, luwuŋ Sedre ɗe viya maini luwuŋ Sikomor na war Sefela nɵa lai.

²⁸ Plasai na wiini Salmun ɗa, e piyiŋnisi war Egipte par, war silikiya par lai. Ɗai zi sakala ɗa, e hili e wiriŋnisi wiini pai woni par.

²⁹ Saret zi gaw n'e kiŋsi war Egipte par ktai a suma sulai zi arzaŋ miya ɵaara, plis ktai ɗa a suma sulai zi arzaŋ miya gaini doogo doogo ɵim lai. Ɗai zi sakala hanɗa e piyiɗisi zamai wiiɗi paakaiɗi Hittitekai gaiɗi paakaiɗi ɗai na Siriya lai.