Lokwita n'avut na wiiɗi paakai 1 - Ɗû na sɗik na wiini Alaw

Vidiɗi pai na wiini David, tikini piɗi pai na wiini Salmun Adoniya n'ahini David a firiya a simiti pai

¹ Pai David a za wel gara ta, sapa sini bar tekeɗeɗi ɗa sini a kopa kai.

² Ɗaini zi sda e miɗini maini nɵa: Jammus, siyi futi buri mi piyitukusi ɓulmi ktai na te fana gaini wus kai hai, kapai te zina puku, te tukuku hangal, te fana gaiku lai kapai suku a kopa.

³ E piyi midini afti na wiiɗi Izrayel paŋ, e nivitisi ɓulmi ktai na juuvi, yikiɗi ɓa Abisag na war fuŋ na Sunem par, e kitisi wiini pai.

⁴ Ɓulmi hanɗa, te wa juvi griŋ gara, te tikini hangal wiini pai, te zina pini lai. Amma pai ɗa a fana gaiɗi kai.

Adoniya n'ahini David a firiya a simiti pai

⁵ Adoniya n'ahiɗi Haggit a za sini aŋ pai ta, a muɗa: mu simiti kaa pai na mu ta ɵa, a paya saret ktai ta gaini plasai lai, ɗai ɵim n'e rûvi gaini eziɗi wuzani yaw lai.

⁶ Gaini wiini par epini a ɓaraŋ ka ɓa ku za nɵa buri maɗa duk kai, ni ɗa a wa juf griŋ gara, aga miɗini Absalom tar.

⁷ A kata mini gaini Yowab n'ahiɗi Seruya, gaini Pai zi ɓaka Abiyatar lai, nagai e tipi miɗi gaini.

⁸ Amma pai zi ɓaka Sadok ɗa kaalai, Benaya n'ahini Yehoyada kaalai, ɗif na mini Alaw Nataŋ ɗa kaalai, Simey kaalai, Rey kaalai, askarai na agulɗi a huna kai na wiini David ɗa kaalai, ktai n'a tapa mini gaini Adoniya aŋ kai.

Natan gaiɗi Batseba e ɗiyi pini Salmun par

⁹ Mefeŋ ktai ɗa, Adoniya a fuɗa adumai, garakai, ali-ɵakai na nur-nur lai gobi ɵimani ahi-fuŋ na gilɓu n'a na ɵimaɗi Ein-Rogel, a yikiɗisi tawalakaini n'alini pai gaini hlaiɗi paŋ, ɗai na Yuda n'e zi sda ahani pai ɗa gaini hlaiɗi paŋ lai.

¹⁰ Amma a yikasi ɗif na mini Alaw Natan kai, Benaya kai, askarai na agulɗi a huna kai na wiini David ɗa kai, tawalni na Salmun ɗa kaalai.

¹¹ Nɵa Natan a midiɗi wiiɗi Batseba n'emini Salmun maini nɵa: Adoniya n'ahiɗi Haggit a simiti pai ɗa ya, epin-gezamu David maa a habar kai, seŋ hanɗa, tuku ku ɵinaŋ ya ɗi?

¹² Tiyana ɗa, mu suku yel ktai, na ɓa ku za li pini ɗa aga ku kurɗa suŋfaku, gaini na wiini Salmun n'ahiku lai.

¹³ Hala ku niya aha sini pai David, ku miɗini maini nɵa: jammus, ku ha wala muku wiya ta na bagaiku ɓa: aga a simiti pai war balamku ɗa a Salmun n'ahiya, aga a sumna warɗi paramaiku zi pai ɗa a ni lai, ku muɗaŋa ɵa kai ɗi epin-geza? Kapai a bunda a simiti ɗa a Adoniya ɗa maɵa maɵa ɗa!

¹⁴ Nɵa, hlai na ku na muɗa seŋ hanɗa wiini pai ɗa, ta aga mu niyaɗi amlai, mu ɵa pa gaiku par lai.

¹⁵ Batseba te niya amlai sini pai warɗi dilimi na wiini ni ɗa, pai a za wel gara ta, Abisag na Sunem par te na fu aŋ zina pini.

¹⁶ Batseba te goɓa azumai, te hurga azumai wuzani pai, pai a miɗiɗi: ku firiya ɗa a maɗa?

¹⁷ Na te wiyini seŋ te miɗini: epin-geza, tuku ku ha wala muku wiya ta na bagaiku gaini EPIƊ-ƊAI, Alaw na wiiku ɓa: aga a simiti pai war balamku a Salmun n'ahiya, a sumna warɗi Paramai zi pai na wiiku a ni lai.

¹⁸ Amma tiyana, a bunda aŋ pai ɗa a Adoniya, tuku epin-geza maa ku habar kaalai.

¹⁹ A za ɓaka gaini garakai viya, ali ɵaakai na nur nur viya, adumai viya lai; a yikiɗisi alini pai ɗa gaini hlaiɗi paŋ, gaini pai zi ɓaka Abiyatar gaini Yowab n'abaiɗi askarai ɗa lai, amma Salmun n'ahiku ɗa, a yikaŋ kai.

²⁰ Paŋktai jaamus, aliɗi Izrayel gaini hlaiɗi, e biyi na ɗa tuku ɓa ku siŋkiɗi ni n'aga a sumna war paramaiku zi pai war balamku ɗa ta.

²¹ Na ɓa ku za hanɗa kai ɗa, hlai na k'aŋ kir kai ɗa, ta gaini Salmun n'ahiya ɗa aga e ziyi gir maiɗi ɗai n'e zi meefeŋ nɵa.

²² Won hlai na te na muɗa gaini pai hai, ɗif na mini Alaw Natan a cosi ahani pai lai.

²³ E zini labar wiini pai ɓa: ɗif na mini Alaw Natan a cosi a na anene, a niya amlai sini, a hurga azumai wuzani, a pa arni azumai.

²⁴ A zilba pai maini nɵa: jaamus, ku sa futi ɓa Adoniya a simiti pai, a sumna warɗi paramaiku zi pai war balamku lai ɗa, ku tuku mal ɗi?

²⁵ Buri ɓa girna a hala a Ein-Rogel, a ziti fet n'amai, miɗi fet hanɗa a za ɓaka gaini garakai viya, alini ɵaakai na nur nur viya, adumai viya lai. A yikiɗi alini pai gaini hlaiɗi, abakaiɗi askarai gaini pai zi ɓaka Abiyatar lai, e ɗisi na e simi lai e ci lai; e ɗûûli ɓa: pai Adoniya ɗa wala a zaŋ kai!

²⁶ A yika pai zi ɓaka Sadok kaalai, Benaya n'ahini Yehoyada kaalai, Salmun n'ahiku kaalai, ta kaalai.

²⁷ Wala hanɗa a za nɵa sini pai n'epin-geza par tiɓ zaw? Paŋktai pai a siŋkaŋa ka ni n'aga a sumna warɗi paramaini zi pai war balamni wiya ta na ɵeŋni duk kai ɗa koo!

David a vara Salmun aŋ pai war balamni

²⁸ Pai David a waya seŋ a muɗa: yikitiŋasi Batseba, te niyasi amlai te ɗiya wuzani zaw,

²⁹ pai a ha wala mini maini nɵa: gaini Alaw na karni n'a kurɗaŋasi edi mini gir paŋ par zaŋ.

³⁰ Maini na mu huku wala ma gaini EPIƊ-ƊAI, Alaw na wiiɗi Izrayel ɗa nɵa, aga a simiti pai war balamŋa ɗa a Salmun n'ahiku, aga a sumna warɗi paramaiŋa zi pai ɗa a ni lai, girna haa, seŋ na mu muɗuŋku ɗa aga mu vaŋ amai.

³¹ Batseba te goɓo azumai, te pa arɗi azumai midini afti, te hurga azumai wuzani pai te muɗa: epin-geza na pai David ɗa wala zaŋ kai.

³² Asakal par pai David a muɗa: yikaŋasi pai zi ɓaka Sadok, ɗif na mini Alaw Natan, Benaya n'ahini Yehoyada lai, e hilisi wuzani pai.

³³ A miɗiɗi: tipiɗi ɗai n'e hini pa gaiki tap lai, ki tiki Salmun n'ahiya midiɗi plesi atoŋai na wiya ta, ki hili gaini war Gihon.

³⁴ Woni pai zi ɓaka Sadok gaini ɗif na mini Alaw Natan aga e mini emel midini kapai e ziŋ aŋ pai na wiiɗi Izrayel, tiki ɗa, ki yibi fana, ki ɗûûli lai ɓa: pai Salmun ɗa wala a zaŋ kai!

³⁵ Asakal par ki wiyisi gaini, a halasi a sumna midiɗi paramaiŋa ɗa, aga a suma pai war balamŋa ɗa, midiɗi Izrayel gaiɗi Yuda ɗa a ni.

³⁶ Benaya n'ahini Yehoyada a wiyini seŋ wiini pai: ku muɗa ɗa a futini, a muɗasi war muku par na ɗa a EPIƊ-ƊAI, Alaw na wiiku gaini midini dama.

³⁷ EPIƊ-ƊAI a za gaini Salmun maini n'a na ka gaini pai n'epin-geza nɵa, a riyiti paini amai haa te sûwiti na wiini epin-geza pai David ɗa lai.

Salmun a vara aŋ pai

³⁸ Pai zi ɓaka Sadok, ɗif na mini Alaw Natan, Benaya n'ahini Yehoyada, Kretekai gaiɗi Peletekai n'e giɗimi pai lai e hili gaini, e tikiŋ midiɗi plisi atoŋai na wiini David ɗa ta, e kiŋ war Gihon.

³⁹ Pai zi ɓaka Sadok a tikiti amiyuki zi mi emel amlai war gumu par, a mini emel midini Salmun gaiɗi kapai a zaŋ aŋ pai, asakal par ɗai e yibi fana, e siriyi lai e miɗi: Pai Salmun ɗa wala a zaŋ kai.

⁴⁰ Asakal par ɗai e wiyisi gaini aha war fuŋ n'abai ɗa, ɗai e yibi algaita, e firiyi abai gara haa afti paŋ a dara a naɓa tini suura na miɗi.

Hunai te yima Adoniya

⁴¹ Adoniya gaiɗi n'a yikiɗisi paŋ e ɵini suura hanɗa won hlai n'e vidi gaini simi. Yowab a sɗa tuwi na wiini fana ba, a zilba ɓa: suura na ɗai e sûûri aha war fuŋ na ɗa a siŋka ɗa a maɗa?

⁴² A ɵa mini edi kai hai, a tala ɗa Yonatan n'ahini pai zi ɓaka Abiyatar a na halasi, Adoniya a miɗini: halasi haw, tuku ku ɗif na jreku a na, mu sɗa ɓa labar na pɗem aŋ muku.

⁴³ Yonatan a wiyini seŋ wiini Adoniya: zaw kai, Epin-gezamu pai David a tika Salmun aŋ pai ta.

⁴⁴ Pai ɗa a ɵina pai zi ɓaka Sadok, ɗif na mini Alaw Natan, Benaya n'ahini Yehoyada, Kretekai gaiɗi peletekai n'e giɗimi pai lai gaini, nagai e tikiŋ amai midiɗi plisi atoŋai na wiini pai ta

⁴⁵ Pai zi ɓaka Sadok gaini ɗif na mini Alaw Natan, e mini emel zi pai midini war Gihon, tiyana e hilisi gaini firiyi na ɗa woni par, fuŋ ɗa paŋ aŋ war firiyi n'abai, ki ɵini tiki na ɗa a suura hanɗa.

⁴⁶ A ni ta kai, Salmun a sumna warɗi Paramai zi pai dam ya.

⁴⁷ Pra, ɗai n'abakai na wiini pai ɗa e hilisi e sini kol wiini pai David n'epin-gezamu e miɗi: a juva ɓa Alaw na wiiku a hina yikini Salmun a wa a suwa na wiiku ɗa, a binditi paini amai te sûwiti na wiiku lai. Asakal par pai a pa kurnaini azumai midini li na wiini,

⁴⁸ A muɗa maa maini nɵa: kol sini EPIƊ-ƊAI, Alaw na wiiɗi Izrayel, buri a sa ɗif girna aŋ sumna warɗi paramaiŋa zi pai, a hinaŋa aŋ talaŋ gaini ara lai.

⁴⁹ Ɗai na Adoniya a yikiɗisi ɗa paŋ hunai te yimiɗi, e ziriyi, e fiki amai, ɗif paŋ a ka sini.

⁵⁰ Adoniya, a huna Salmun ta, a faka a hala a ŋoya ɵimani gûwiŋ zi yi ɓaka ɗa cok.

⁵¹ E hilisi e miɗini wiini Salmun ɓa: Adoniya a hunuku ta, tiyana ŋoya aŋ ɵimani gûwiŋ zi yi ɓaka ɗa cok ɓa: girna sai pai Salmun a ha wala mini ɓa aga a fuɗaŋ edi gaini kaɵkar kai haw.

⁵² Salmun a muɗa: na ɓa a za wala na meefeŋ kai ɗa koo ayir na midini ktai kaw wala aga a zaŋ kai, amma na ɓa a za wala na meefeŋ li ɗa, koo ɓa agwi tekeɗeɗi, aga a nava fiɗi n'edi.

⁵³ Pai Salmun a ɵina ɗai buri e yimiŋsi edi ɵimani gûwiŋ zi yi ɓaka par. A halasi a hurga azumai wuzani pai Salmun, Salmun a miɗini: hala aha.