Labar na war yivai n'avut 22 - Ɗû na sɗik na wiini Alaw

¹ Buri nɵa David a muɗa: Dalam na wiini EPIƊ-ƊAI, Alaw aga a za won na, gûwiŋ zi ɓaka zi yi na wiiɗi Izrayel paŋ a na lai.

David a zizina wazagai buri rgini tempel

² David a sa futi buri e tipiɗi nagai paŋ na war pinziba zamai par n'e hilisi e simni midini afti na Izrayel, a siɗi sda na wiini giɵini ali-fuŋ, kapai e giɵisi ali-fuŋ n'abakai n'e rgi Dalamni Alaw gaini.

³ David a payasi kawakai viya n'e zizini ɓere n'e ɵiɓi tapra na mini magala gaini, gaini kawakai na mini gaini fi kaa kaa lai, gaini kiiya viya na gumani a kiɗa a pɵa kai.

⁴ A payasi luwuŋ Sedre viya n'a kiɗa a pɵa kaalai, buri ɗai na Sidon gaiɗi ɗai na Tirus e kinisi luwuŋ Sedre viya.

⁵ David a muɗa: Salmun n'ahiya ɗa agwi, a jeŋe kai, Dalam n'aga a rgaŋ burini EPIƊ-ƊAI ɗa a Dalam na yikini aga a wa edi midini afti paŋ burini abaini gaini jufni lai. Nɵa aga mu piyini kaa wazagai n'a zina pini, buri nɵa David a piyini kaa wazagai viya wuzani mrini.

David a sa rgini tempel tini Salmun

⁶ A yikasi ahini na Salmun, a miɗini buri a rga tempel wiini EPIƊ-ƊAI, Alaw na wiiɗi Izrayel.

⁷ David a miɗini wiini Salmun: ahiya, mu rga wara ɓa, ta dama mu rgini tempel wiini EPIƊ-ƊAI, Alaw na wiya.

⁸ Amma EPIƊ-ƊAI, a muɗa sa maini nɵa, tuku ku ma fel edi viya, ku hitima hatam n'abakai viya lai. Pini hanɗa aga ku rgaŋa Dalam kai, buri ɓa ku ma fel edi viya wuzani ara midini afti.

⁹ Tala aga ku wa ahi ktai, ahi hanɗa ahi zi ɵeɗ, aga mu sini si n'amla wuzaɗi gawni na ɵimaɗi paŋ, aga e yikiŋ ɓa Salmun a dara a muɗa: ɗif zi ɵeɗ. Mefeŋni n'aga a zaŋ warɗi pai ta ɗa, aga mu sa ɵeɗ gaini jam wiini afti na Izrayel.

¹⁰ Aga a rgaŋa tempel ɗa a ni, ni aga a bunda buriya aŋ ahiya, Ta aga mu bunda aŋ epini lai. Aga mu ɗiyiti paini na midiɗi Izrayel gdeŋi haa kureɗ.

¹¹ Tiyana ɗa, EPIƊ-ƊAI a za gaiku ahiya, kapai ku rga tempel na wiini EPIƊ-ƊAI, Alaw na wiiku amai gaini futini, maini n'a muɗaŋ muduku nɵa.

¹² A suwa paŋ ɓa EPIƊ-ƊAI a suku yel n'a za ɓraw arbani pɗem gaini meefeŋ, gaini siɗi lai won hlai n'aga a tukuku aŋ pai midiɗi Izrayel, kapai ku za pini ɗû na wiini EPIƊ-ƊAI, Alaw na wiiku.

¹³ Na ɓa ku yima li pini gadai gaini gadai zi ɗiyi n'EPIƊ-ƊAI a siŋni wiini Musus buriɗi Izrayel, na ɓa ku za li pini lai, aga ku nafa war wazagai paŋ. Ɗiya gdaŋ yimiti agulku, ku huna kai, pa arku wiiku.

¹⁴ Tala gaini hawŋa paŋ tekeɗeɗi, mu paya talent zi or dubu miya ɗaw, talent zi arzaŋ miliyon ɗaw, kiiya na gaini kawai gumani a kiɗa a pɵa kai buri a suwa viya gara. Mu payasi luwuŋ gaini ali-fuŋ viya lai, tuku aga ku paya zamai mini pra.

¹⁵ Ɗai zi sda ahaku viya, zi giɵi ali-fuŋ, zi kirhi ali-fuŋ, zi kilɗi luwuŋ, ɗai n'e siɗi sda zamai zamai gara viya lai.

¹⁶ Or, arzaŋ, kiiya, gaini kawai lai a kiɗa a pɵa kai; faka amai, za sda, EPIƊ-ƊAI a za gaiku.

¹⁷ David a miɗiɗi wiiɗi ɗai n'abakai n'e ɵi wuzaɗi ɗai na Izrayel buri e zini pini ahini na Salmun.

¹⁸ A midiɗi: EPIƊ-ƊAI, Alaw na wiiki ɗa a na gaiki, nɵa kai ɗi? A siki ɵeɗ arbaki gaiɗi nagai na ɵimaki paŋ kai ɗi? Buri nɵa a siɗiŋa nagai n'e ɗi ka midini afti hanɗa war ta. Tiyana aftiɗi a bunda a wiini EPIƊ-ƊAI, a wiiɗi ɗaini lai.

¹⁹ Tiyana ɗa, ki piyi EPIƊ-ƊAI Alaw na wiiki gaiɗi agulki paŋ gaini suŋfaki paŋ lai, fiki amai, rgi hlai na sɗik na wiini EPIƊ-ƊAI, Alaw, kapai ki kisi zunduk zi bonu na wiini EPIƊ-ƊAI gaini wazagai na wiini Alaw lai amlai war Dalam n'a rga burini EPIƊ-ƊAI.