Labar na war yivai n'avut 21 - Ɗû na sɗik na wiini Alaw

David a pɵiɗi ɗai na warɗi Izrayel

¹ Mefeŋ ktai Satan a faka amai siɗi Izrayel, a hoga David aŋ pɵiɗi aliɗi Izrayel.

² David a miɗini wiini Yowab gaiɗi n'abakai zi ɵi wuze maini nɵa: hili pɵiɗisi aliɗi Izrayel a Ber-Seba war gal n'amai par haa a Dan war gal n'azumai sek ta. Asakal par ki kiŋasi pɵaɗi ɗa kapai mu sɗaŋ.

³ Yowab a wiyini seŋ wiini pai a miɗini: Jaamus a juva ɓa EPIƊ-ƊAI a riyiɗi ɗaini amai haa azi miya, nagai hanɗa paŋ ɗa e ɗi ɗaiku kai ɗi? Epin-geza ku paya aŋ pɵiɗi tiɓ buri maɗa? Ku firiya ɓa aliɗi Izrayel e bindi maafanai arni Alaw buri maɗa?

⁴ Gaini hanɗa paŋ miɗi na wiini pai a zini dewele wiini Yowab, Yowab a hala a gunasi afti na Izrayel paŋ azumai, asakal par a wayasi aha war Yeruzalem.

⁵ Yowab a sini pɵaɗi aliɗi Izrayel wiini David, ɗai na Izrayel n'e kiɗi aŋ hitimi gaini hlaiɗi paŋ e ɗa ɗai miliyon ɗaw gaini dubu miya ɗaw, ɗai na Yuda e ɗa paŋ ɗai dubu miya puɗu gaini muguzak lai.

⁶ A pɵiɗisi pinzibani Levi gaini Benyamin arbayi kai buri miɗi na wiini pai a yima warni Yowab kai.

EPIƊ-ƊAI a ɵinasi vlak midiɗi Izrayel

⁷ Wala hanɗa a sini firiyi wiini Alaw kai haa a glasi gir midiɗi Izrayel.

⁸ Nɵa David a miɗini wiini Alaw: Mu za na ɗa a tuwur n'abai gara, buri mu za kal-kal maini ɗif zi dûûli nɵa, tiyana ɗa, mu siiwuku saŋa ni burini meefeŋ hanɗa.

⁹ EPIƊ-ƊAI a miɗini wiini Gad ɗif na min Alaw n'a sini gadai wiini David maini nɵa:

¹⁰ Hala miɗini wiini David ɓa EPIƊ-ƊAI a na muɗa maini nɵa: Mu suku wazagai zi gir hu, vara arbani par ktai na kapai mu zaŋ suku.

¹¹ Nɵa Gad a hala sini David a miɗini: EPIƊ-ƊAI a muɗasi a na, vara wala ktai:

¹² Buza hu zi wiyamai, zaw ku nafa rɗi n'amai midiɗi gawku kai haa tile hu, zaw kaɵkar na wiini EPIƊ-ƊAI gaini vlak a za midini afti haa mefeŋ hu, A ɵinasi ɵeŋni zi tûûri hlai edi midini afti na wiiɗi Izrayel paŋ lai. Tiyana ɗa, ku hiina pɗem, vara na ku daraŋ kapai mu wiyini miɗi wiini Ni n'a ɵinaŋasi ɗa.

¹³ David a miɗini wiini Gad: m'an na war hunai n'abai, a pɗem ɓa mu kɵa war tini EPIƊ-ƊAI buri yumni a na abai gara, a juva ɓa mu kɵa war tiɗi ɗai kai.

¹⁴ EPIƊ-ƊAI a ɵinasi vlak aha warɗi Izrayel, ɗai e mri dubu muguzak.

¹⁵ Alaw a ɵinasi ɵeŋni aha war Yeruzalem aŋ tûûriti edi, won hlai n'EPIƊ-ƊAI a tala ɓilki n'edi hanɗa, hiinini haw a yimaŋ burini gir hanɗa. A miɗini wiini ɵeŋni zi ɓilki hlai ɓa suuwi, mula tuku azumai. Ɵeŋ na wiini EPIƊ-ƊAI a na fu ɵimani luluf na wiini Ornan na Yebus par zaw.

¹⁶ David a yima arni amai, a tala ɵeŋ na wiini EPIƊ-ƊAI gaini ɗiyi amai arbani hlai zaw gaini kaɵkarni tini gaini hûti edi hot, a siŋkaŋ a Yeruzalem sek. David gaiɗi n'abakai n'arbaɗi ɗai na warɗi Izrayel, gaini sapa zi tuwi siɗi ɗik ɗik, e hûrgû azumai, e pi arɗi azumai tiɓ tiɓ.

¹⁷ David a miɗini wiini Alaw: mu sa futi aŋ pɵiɗi ɗai mu ta kai ɗi? Mu za tuwur mu ta, mu za meefeŋ mu ta lai. Amma ɗai hanɗa, e zi zi meefeŋ ɗa a maɗa? EPIƊ-ƊAI, Alaw na wiya, a pɗem ɓa ku zaŋa gir wiya ta gaiɗi pakataiŋa, amma ɗaiku hanɗa ku tikiɗi gir midiɗi kai.

David a rga hlai zi ɓaka burini EPIƊ-ƊAI

¹⁸ Ɵeŋ na wiini EPIƊ-ƊAI a miɗini wiini Gad buri a miɗini wiini David ɓa a hala a rga hlai zi ɓaka wiini EPIƊ-ƊAI war luluf na wiini Ornan na Yebus par.

¹⁹ David a hala woni pini miɗi n'EPIƊ-ƊAI a miɗiŋni war mini Gad.

²⁰ Ornan a na fu war luluf aŋ gɵa algamani, won hlai n'a ɵa arni duɓani a tala ɵeŋ na wiini EPIƊ-ƊAI, alini na puɗu n'e ɗa gaini e ŋûyi cok.

²¹ David a co sini Ornan. Won hlai na Ornan a tala pai David, a niyasi edi war lulufni par a hala mini a hurga azumai wuzani a pa arni azumai tiɓ.

²² David a miɗini wiini Ornan: saŋa lulufku ta, kapai mu rga gûwiŋ zi yi ɓaka na wiini EPIƊ-ƊAI woni, ku saŋa miɗini wûrini na kas ɗa. Kapai gir n'a halasi midiɗi ɗai ɗa a ɗiya gulai ta.

²³ Ornan a miɗini wiini David: tikaŋ wiiku, Epin-geza, wala na ku dara ku zaŋ woni ɗa zaŋ, tala mu sa garakai buri ɓaka zi yi, saretai aŋ luwuŋ zi yi, algama burini ɓakani alini seyem, mu sa wazagai hanɗa paŋ kafa.

²⁴ Amma pai David a miɗini wiini Ornan: a za kai, ku saŋa miɗini wûrini na kas ɗa, aga mu tika wala na wiiku aŋ siŋni wiini EPIƊ-ƊAI kai. Aga mu za ɓaka zi yi na mu ba wala burini kai wiini EPIƊ-ƊAI kaalai.

²⁵ Nɵa David a sini midini hlai hanɗa sulai zi or miya ɵaara.

²⁶ David a rga hlai zi ɓaka wiini EPIƊ-ƊAI woni, a za ɓaka zi yi gaini ɓaka zi ɵeɗ lai. Asakal par a siiwa EPIƊ-ƊAI, EPIƊ-ƊAI a ɵina siiwani, a hinasi afu amai war hlai n'amai par miɗini gûwiŋ zi ɓaka zi yi.

²⁷ Asakal par EPIƊ-ƊAI a miɗini wiini ɵeŋni buri a wa kaɵkarni war forni.

²⁸ War sarti ni ɗa, hlai na David a tala ɓa, EPIƊ-ƊAI a ɵina siiwani li war luluf na wiini Ornan na Yebus par, a hina aŋ za ɓaka woni ɵa kûreɗ-kûreɗ.

²⁹ Amma war sarti ni ɗa, gumu na wiini EPIƊ-ƊAI, na Musus a zaŋ edi war basga gaini gûwiŋ zi ɓaka zi yi lai a na fu war hlai na wiini Alaw na Gabawon.

³⁰ Amma David a kiɗa aŋ hala woni aŋ zilba dirini Alaw kai, buri kaɵkar na wiini ɵeŋ na wiini EPIƊ-ƊAI a milini hunai pini gara.