Labar na war yivai n'avut 19 - Ɗû na sɗik na wiini Alaw

Ammonitekai e tikiɗi siyer wiiɗi ɵeŋ na wiini David

¹ Mefeŋ agwi asakal hanɗa, Nahas pai na wiiɗi Ammonitekai a mra, Hanun n'ahini a suma pai war balamni.

² Nɵa David a hiina a muɗa: Aga mu za pɗem sini Hanun n'ahini Nahas buri epini a za pɗem sa gara, David a ɵina ɗai sini aŋ sini arai zi pi buri mri na wiini epini. Ɗai na wiini David e cû midini afti na wiiɗi Ammonitekai sini Hanun aŋ sini arai zi pi.

³ Amma abakai na wiiɗi Ammonitekai e miɗini wiini Hanun: ku hiina na ɓa David a ɵiniɗisi ɗai suku aŋ suku arai zi pi na ɗa, buri hormo na wiini apuku ki ɗi ɗi? Ɗaini e hilisi ahaku na ɗa buri e tili afti, buri e fiki dûrgûzi amai, e tili na ɗa ezini hlai lai kai ɗi?

⁴ Hanun a yimiɗi ɗai na wiini David ɗa, a faɗa muɗgi na miɗi edi, a ɗukla sapa na siɗi haa amai sini flesɗi ta ta, asakal par a birgiɗi.

⁵ Ɗai e kinisi labar wiini David midini wala n'a za siɗi ɗai hanɗa. David a ɵina ɗif miɗi buri e ɗi fu war siyer. Pai a siɗi miɗi maini nɵa: simnisi a Yeriko ca haa muɗgi na miki a diya haw kapai asakal par ki wiyisi aha.

Hatam na gaiɗi Ammonitekai gaiɗi ɗai na Siriya

⁶ Ammonitekai e siɗi ɓa e ɓilki siɗi li arni David, Hanun gaiɗi Ammonitekai e ɵini arzaŋ talan dubu ɗaw aŋ piyisi saret zi gaw gaiɗi ɗai zi dibiri plasai tiɗi ɗai na Siriya na war Mezopotamiya par, na Maka par gaiɗi na Soba par lai.

⁷ E nivi saret zi gaw dubu doogo doogo hu pi sulu, e sini farai wiini pai na Maaka gaiɗi ɗaini lai e hilisi e pi miɗi Madaba tiɓ. Ammonitekai e niyisi edi warni fuŋɗi n'abai par, e tipisi e hili mini hatam lai.

⁸ David a ɵina hanɗa, a ɵina Yowab gaiɗi askarai n'agulɗi a huna kai ɗa.

⁹ Ammonitekai e niyisi edi, e giri siɗi mini hatam, mini magala na wiini Raba kapital na wiiɗi. Amma paakai n'e hilisi aŋ zini piɗi e ɗisi fu edi par war basga kiiɗi lai

¹⁰ Yowab a tala ɓa hatam aŋsi wuzani par lai duɓani par lai, a viriɗi askarai n'e siɗi hatam gara arbaɗi askarai na war Izrayel ɗa paŋ, a giriɗi miɗi ɗai na Siriya gar.

¹¹ Piɗi askarai n'a hina a tika Abisag na tawalni midiɗi ta, a giriɗi miɗi Ammonitekai gar lai.

¹² Asakal par Yowab a miɗini wiini tawalni ɓa: Na ɓa ɗai na Siriya e sûwiŋa li gaini gdaŋ ɗa, ku lawaŋa ɗuwal, na ɓa Ammonitekai e suwuku tuku li gaini gdaŋ ɗe aga mu luwuku ɗuwal lai.

¹³ Ɗiya gdaŋ, hutumumu gaini gdaŋmu buriɗi ɗaimu gaini fuŋ n'abakai na wiini Alaw na wiimu lai. EPIƊ-ƊAI a za maini n'a dara nɵa.

¹⁴ Nɵa Yowab gaini vok na wiini e hili aŋ hitimi gaiɗi ɗai na Siriya, amma ɗai na Siriya e pri edi wuzaɗi.

¹⁵ Won hlai na Ammonitekai e tili ɓa ɗai na Siriya e ɗa rûvi, nagai lai e pri edi wuzani Abisag na tawalni Yowab, e wiyi aha war fuŋɗi n'abai, nɵa Yowab a waya aha war Yeruzalem.

¹⁶ Won hlai na ɗai na Siriya e tili ɓa ɗai na Izrayel e rɗi amai midiɗi li, e ɵini ɗai piɗi ɗai na Siriya n'anene duɓani ra Öfrata par. Sofak abaiɗi askarai na wiini Hadadezer a na fu aŋ abaiɗi.

¹⁷ Ɗai e kinisi labar hanɗa wiini David. David a tipiɗi ɗai na Izrayel paŋ, e hûwi Yurdan ɗa amai, e cû midiɗi, e giri miɗi. David a ziziniɗi ɗaini mini hatam wuzaɗi ɗai na Siriya, ɗai na Siriya e fikisi hatam gaiɗi lai.

¹⁸ Ɗai na Siriya e pri edi wuzaɗi ɗai na Izrayel. David gaiɗi ɗaini e fiɗi ɗai n'e diɓiri saret zi gaw dubu muguzak, gaiɗi askarai na kadai dubu doogo doogo puɗu lai. A fuɗa Sofak abai na wiiɗi askarai hanɗa edi lai.

¹⁹ Won hlai na paakai n'e ɗi ka pini Hadadezer, e tili ɓa ɗai na Izrayel e rɗi amai midiɗi li, e piyi ɵeɗ gaini David, e wi wulaɗi azumai pini lai. Ɗai na Siriya e wiyisi katawai aŋ zini piɗi Ammonitekai kir kai zaŋ.