Labar na war yivai n'avut 15 - Ɗû na sɗik na wiini Alaw

David a zizina sini buri jûgûni zunduk na wiini Alaw aha war Yeruzalem

¹ David a rga dalam viya war fuŋ n'abai na wiini David, a zizina hlai ktai ta burini zunduk na wiini Alaw, a pini gumu tiɓ lai.

² nɵa a muɗa, libini zunduk na wiini Alaw hanɗa e libiŋ ɗa e ɗi Levitekai kiiɗi, buri EPIƊ-ƊAI a viriɗisi edi ɗaw buri e libi zunduk na wiini EPIƊ-ƊAI lai, e zi ɵeŋ na wiini EPIƊ-ƊAI lai haa kureɗ.

³ David a tipiɗi aliɗi Izrayel paŋ aha war Yeruzalem kapai a zogosi zunduk na wiini EPIƊ-ƊAI war hlai n'a zizinaŋ burini.

⁴ A tipiɗi paakai zi ɓaka na war pinzibani Aaron gaiɗi Levitekai paŋ,

⁵ War pinzibani Kehat, abaiɗi a Uriyel, tawalakaini zamai lai e zi paŋ: 120;

⁶ War pinzibani Merari, abaiɗi a Asaya tawalakaini zamai lai e zi paŋ 220;

⁷ War pinzibani Gerson, abaiɗi a Yuwel, tawalakaini zamai lai e zi paŋ 130;

⁸ War pinzibani Elisafan, abaiɗi Asemaya gaiɗi tawalakai zamai paŋ 200;

⁹ War pinzibani Hebron, abaiɗi Eliyel, tawalakaini zamai lai 80;

¹⁰ War pinzibani Uzziyel, abaiɗi a Amminadab gaiɗi tawalakaini paŋ 112.

¹¹ David a yikiɗi paakai zi ɓaka, Sadok gaini Abiyatar, gaini Uriyel, Asaya, Yuwel, Semaya, Eliyel, Amminadab na Levitekai lai.

¹² A miɗiɗi: tiki ki ɗi n'abakai war pinzibani Levi, zi siki edi sɗik, tiki gaiɗi tawalakaiki paŋ, hili tikisi zunduk na wiini EPIƊ-ƊAI, Alaw na wiiɗi Izrayel, kiŋsi war hlai na mu zizinaŋ burini.

¹³ Buri ɓa azi n'avut ki ɗi fu kai; EPIƊ-ƊAI, Alaw na wiimu a ziyi gir buri mi hili aŋ tikiŋsi maini na gadai a ɗiyaŋ ɵa kai.

¹⁴ nɵa Paakai zi ɓaka gaiɗi Levitekai e zi siɗi edi sɗik kapai e hili e tikisi zunduk na wiini EPIƊ-ƊAI, Alaw na wiiɗi Izrayel.

¹⁵ Maini na Musus a gada midini pini seŋ na wiini EPIƊ-ƊAI nɵa, Levitekai e libi zunduk na wiini Alaw amai wulaɗi ta gaini saga.

¹⁶ David a miɗiɗi wiiɗi abakaiɗi Levitekai buri e miliɗi tawalakaiɗi war sdaɗi, nagai zi zini yama gaini wazagai zi zini yama tiɗi, maini: adill, gaŋgraŋ gaini kawai n'a tuwa kapai gaini e zini yama gaini gdaŋɗi, aŋ siŋka firyiɗi edi.

¹⁷ Levitekai e sini sda wiini Heman n'ahini Yuwel, wiini maini zi sda Asaf n'ahini Berekiyahu, pra wiini Etam n'ahini Kusayahu war piɗi humunini Merari.

¹⁸ E miliɗi tawalakaiɗi zamai n'e gi wulaɗi na nagai e ŋi midiɗi lai maini: Sakariyas, Ben, Yaaziyel, Semiramot; Yehiyel, Unni, Eliyab, Benaniyahu, Maaseyahu, Mattitiyahu, Eliflehu, Mikneyahu, Obed-Edom gaini Yehiyel ɗai zi giɗimi mini magala lai.

¹⁹ Arbaɗi nagai zi zini yama ɗa: Heman, Asaf gaini Etan, e ɵiɓi kawai n'a wa zi kiya lai.

²⁰ Sakariyas, Aziyel, Semiramot, Yehiyel, Unni, Eliyab, Maseya gaini Beneya lai e ɵiɓi adill na wulani a wa geleŋ ɗa.

²¹ Matiyahu, Eliflehu, Mikneyahu, Obed-Edom, Yehiyel gaini Azaziyahu lai e ɵiɓi adill na wulani hulum ɗa, na sogomni mitwis, e ɵi wuzaɗi nagai n'e zini yama.

²² Kenaniyahu n'abaiɗi Levitekai n'e libi zunduk a kata sdani libini buri a sɗa futini ya.

²³ Berekiya gaini Elkana e ɗi nagai n'e giɗimi mini magala na wiini zunduk ɗa.

²⁴ Obed-Edom gaini Yehiya lai. Benayahu, Yosafat, Neteneyel, Amasai, Sakariyas, Benaniyahu gaini Eliyeser na paakai zi ɓaka e pɵi faana wuzani zunduk na wiini Alaw.

Gizini zunduk na wiini Alaw aha war Yeruzalem

²⁵ David gaiɗi abakai n'arbaɗi Izrayel, gaiɗi abakaiɗi askarai na ɗai piɗi dubu e hili aŋ tikisi zunduk zi bonu na wiini EPIƊ-ƊAI ahani Obed-Edom par war firiyi.

²⁶ Kapai Alaw a zina piɗi Levitekai n'e libi zunduk zi bonu na wiini EPIƊ-ƊAI ɗa, nɵa e zi ɓaka gaini garakai muguzak, adumai gamalakai muguzak lai.

²⁷ David gaiɗi Levitekai n'e libi zunduk paŋ gaiɗi ɗai zi zini yama, gaini Kenaniya n'abaini sdani wala zi libi e wi sapa zi leŋ na na gaini futini siɗi, David a na fu gaini sapa zi leŋ na wiiɗi paakai zi ɓaka sini ɵew lai.

²⁸ Aliɗi Izrayel paŋ e libi zunduk zi bonu na wiini EPIƊ-ƊAI aha warɗi Yeruzalem, arbani suura zi firyi, gaini miyok, faana zi pɵi, gaini kawai n'a tuwa, gaini adill gaini gaŋgraŋ lai.

²⁹ Won hlai na zunduk zi bonu na wiini EPIƊ-ƊAI a cosi aha war fuŋ n'abai na wiini David, Mikal n'ahini Sawul te wasi wulaɗi arni fenetre. Te tala pai David a na pra amai, a didima lai, te miisaŋ warɗi agulɗi.